ট্ৰাক ড্ৰাইভাৰৰ পৰা লিফট লোৱাই হ’ল কাল! দলৱদ্ধ বলাৎকাৰ কৰি জ্বলাই দিলে ২২বছৰীয়া মহিলা চিকিৎসকক

এগৰাকী ২২বছৰীয়া যুৱতী। পেছাত এগৰাকী পশু চিকিৎসক। জীৱনে পোখা মেলিবলৈ আৰম্ভ কৰাৰ সময়তে যুৱতীগৰাকীৰ জীৱন বন্তি নুমাই গ’ল। কোনো দুৰ্ঘটনাজনিত কাৰণত নহয়, যুৱতীগৰাকীৰ মৃত্যুৰ কাৰণ জানিলে আপুনি হতভম্ব হ’ব। প্ৰথমে উপৰ্যুপৰি দলৱদ্ধ বলাৎকাৰ আৰু তাৰ পিছত অগ্নিসংযোগ কৰি জ্বলাই হত্যা কৰা হ’ল যুৱতীগৰাকীক। যুৱতীগৰাকীৰ অপৰাধ? স্কুটাৰ পাংচাৰ হোৱাৰ কাৰণে ঘৰলৈ যাবলৈ দুজন ট্ৰাক ড্ৰাইভাৰৰ সহায় বিচাৰিছিল। সেই ড্ৰাইভাৰৰূপী নৰপিশাচ দুটাই যুৱতীগৰাকীক সহায় কৰাৰ সলনি উন্মত্ত হৈ জঁপিয়াই পৰে। প্ৰথমে যুৱতীগৰাকীক বলাৎকাৰ কৰি নৃশংসভাৱে হত্যা কৰি  এখন নিৰ্জন ব্ৰীজৰ তলত জ্বলাই মৃতদেহ নষ্ট কৰাৰ অপচেষ্টা কৰা হয়। পেছাত এগৰাকী পশু চিকিৎসকগৰাকীৰ নৃশংস হত্যাকাণ্ডই দেশ জোকাৰি গৈছে। ইতিমধ্যে আৰক্ষীৰ জালত পৰিছে এই ভয়ংকৰ ঘটনাৰ চাৰি অভিযুক্ত।

আৰক্ষীৰ মতে যুৱতীগৰাকীক তনডুপল্লি টোলপ্লাজাৰ ওচৰত বলাৎকাৰ কৰি হত্যা কৰা হয়। তাৰ পিছত ট্ৰাকত মৃতদেহ তুলি নি এঠাইত মৃতদেহ জ্বলাই দিয়ে ড্ৰাইভাৰ আৰু সহযোগীয়ে। পুৰি যোৱা মৃতদেহৰ কাষত যুৱতীগৰাকীয়ে পৰিধান কৰা পোছাকৰ কেতবোৰ টুকুৰা উদ্ধাৰ কৰিছে আৰক্ষীয়ে। আৰক্ষীৰ মতে, জ্বলাই দিয়াৰ পূৰ্বে দেহৰ সকলো কাপোৰ খুলি নগ্ন কৰি লোৱা হৈছিল যুৱতীগৰাকীক।

চাইবাৰাবাদ আৰক্ষীৰ জালত পৰা ব্যক্তিকেইজনৰ ভাষ্যৰ ভিত্তিত যুৱতীগৰাকীৰ পোছাক, জোতা, এটা পানীৰ বটল উদ্ধাৰ কৰা হৈছে। ভয়ংকৰ কাণ্ড সংঘটিত হোৱা ঠাইৰ সমীপৰ এখন টায়াৰ ৰিপেয়াৰ কৰা দোকানৰ মালিকৰ মতে, বৃহস্পতিবাৰে ৰাতি ৯টাৰ পৰা ১০বজাৰ ভিতৰত এগৰাকী যুৱতীয়ে তেওঁৰ স্কুটিখন আনিছিল টায়াৰ সলনি কৰাৰ কাৰণে। 

তেওঁ নিজৰ ভগ্নীক নিশা ১০ বাজি যোৱাৰ পিছত ফোন কৰিছিল, টায়াৰ পাংচাৰ হোৱাৰ কথা জানি এজন ট্ৰাক ড্ৰাইভাৰে ঘৰত থৈ অহাৰ প্ৰস্তাৱ দিছিল। কিন্তু ট্ৰাক ড্ৰাইভাৰজনৰ আচৰণ সুবিধাৰ যেন লগা নাছিল যুৱতীগৰাকীৰ। ভগ্নীয়ে ফোনতে প্ৰস্তাৱ দিছিল ট্ৰাকৰ সলনি এখন কেব বুক কৰি ঘৰলৈ উভতাৰ। ইয়াৰ পিছত ৰাতি ১১বজাত যুৱতীগৰাকী সন্ধানহীন হোৱাৰ সন্দৰ্ভত পৰিয়ালে থানাত আৱেদন কৰে। বৃহস্পতিবাৰে পুৱা যুৱতীগৰাকীক উদ্ধাৰ কৰা হয় কিন্তু জীৱিত অৱস্থাত নহয়। সদনগৰত জ্বলি যোৱা অৱস্থাত উদ্ধাৰ কৰা হয় যুৱতীগৰাকীৰ মৃতদহে। চাইবাৰাবাদ আৰক্ষীয়ে টোল প্লাজাৰ চিচিটিভি ফুটেজ নিৰীক্ষণ কৰিছে।