Nagaland Election : নগা সমস্যা সমাধান নে নাগালেণ্ডত নিৰ্বাচন! NSCN-IMৰ সৈতে নিৰ্বাচনৰ পূৰ্বে হ'বনে ভাৰত চৰকাৰৰ চূড়ান্ত চুক্তি?
২৭ ফ্ৰেব্ৰুৱাৰীত নাগালেণ্ড বিধানসভাৰ নিৰ্বাচন
সম্পৰ্কীয় বাতৰি
প্ৰথমে সমস্যা সমাধান নে নিৰ্বাচন? এই প্ৰশ্ন ২০১৮ৰ নিৰ্বাচনৰ পূৰ্বে চলাৰ দৰে এইবাৰো চলিছে নাগালেণ্ডত৷ ইয়াৰ মাজতে ভাৰতীয় নিৰ্বাচন আয়োগে বুধবাৰে ঘোষণা কৰিলে নাগালেণ্ডসহ মেঘালয় আৰু ত্ৰিপুৰাৰ নিৰ্বাচনৰ দিন (Assembly election 2023) ৷ এই হিচাপত নাগালেণ্ডৰ ক্ষেত্ৰত গেজেট নটিফিকেচন হ'ব ৩১ জানুৱাৰীত ৷
মুখ্য নিৰ্বাচনী আয়ুক্ত ৰাজীৱ কুমাৰে বুধবাৰে ঘোষণা কৰা মতে, নাগালেণ্ড বিধানসভাৰ নিৰ্বাচনৰ মনোনয়নপত্ৰ দাখিলৰ শেষ দিন ৭ ফেব্ৰুৱাৰী৷ মনোনয়নপত্ৰ পৰীক্ষণৰ দিন ৮ ফেব্ৰুৱাৰীত ৷ মনোনয়নপত্ৰ প্ৰত্যাহাৰৰ অন্তিম দিন ১০ ফ্ৰেব্ৰুৱাৰীত ৷ ইয়াৰ পিছত বহু চৰ্চিত নাগালেণ্ড বিধানসভাৰ ভোটগ্ৰহণ অনুষ্ঠিত হ'ব ২৭ ফেব্ৰুৱাৰীত ৷ ভোটগ্ৰহণ হ'ব মেঘালয়, ত্ৰিপুৰাৰ লগতে ২ মাৰ্চত ৷
নাগালেণ্ড বিধানসভাৰ আসনৰ মুঠ সংখ্যা হ'ল ৬০ ৷ ২০১৮ চনৰ বিধানসভাৰ নিৰ্বাচনো অনুষ্ঠিত হৈছিল ২৭ ফেব্ৰুৱাৰীতেই ৷ বৰ্তমান বিৰোধী শূন্য নাগালেণ্ডত UDA চৰকাৰ চলি আছে মুখ্যমন্ত্ৰী নেফিঅ' ৰিঅ'ৰ নেতৃত্বত ৷ ইয়াৰে NDPPৰ দখলত আছে ৪২ আসন, BJPৰ দখলত আছে ১২ আসন, NPFৰ দখলত আছে ৪খন আসন আৰুঅন্যানৰ দখলত আছে ২খন আসন ৷
এতিয়া কথা হ'ল ১৯৯৭ চনৰে পৰা আলোচনাৰ মেজত থকা নগা সশস্ত্ৰ বিদ্ৰোহী সংগঠন NSCN-IMৰ সৈতে নিৰ্বাচনৰ পূৰ্বে হ'বনে ভাৰত চৰকাৰৰ চূড়ান্ত চুক্তি? সাতটা বিদ্ৰোহী সংগঠনৰ উমৈহতীয়া ঐক্যমঞ্চ NNPGsয়ে ২০১৭ চনতে ভাৰত চৰকাৰৰ সৈতে কৰি থোৱা এগ্ৰীড পজিছনক লৈ চুক্তি কৰিবলৈ সাজু আছে ৷ কিন্তু ২০১৫ৰ ৩ আগষ্ট ফ্ৰেমৱৰ্ক এগ্ৰিমেণ্ট কৰিও আজি পৰ্যন্ত চূড়ান্ত চুক্তি কৰিব পৰা নাই NSCN-IMয়ে ৷ ওলমি ৰৈছে পৃথক পতাকা আৰু সংবিধানৰ বিষয়টোৱে ৷ পৃথক পতাকা আৰু সংবিধান অবিহনে NSCN-IM-এ নকৰে চুক্তি।
ইপিনে নাগালেণ্ড বিধানসভাৰ ৬০গৰাকী বিধায়কেই নগা সমস্যাৰ আশু সমাধানৰ দাবীত একত্ৰিত হৈ আছে ৷ বিৰোধী বুলিবলৈ নাই কোনো ৷ এসময়ত বিৰোধীৰ আসনত বহা NPFও নগা সমস্যাৰ সমাধানৰ দাবীত নেফিঅ' ৰিঅ'ৰ UDA চৰকাৰৰ সৈতে মিলি আছে ৷
NPFয়ে স্পষ্ট কৰি থৈছে— নগা সমস্যা প্ৰথম ৷ পিছত বাকীবোৰ বিষয় ৷ কিন্তু নগা সমস্যা আশু মীমাংসাৰ দাবী তুলিও মুখ্যমন্ত্ৰী ৰিঅ'ই নাগালেণ্ডত সাংবিধানিক সমস্যা হ'বলৈ তেওঁৰ চৰকাৰে নিদিয়ে বুলি ঘোষণা কৰিছে ৷
অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।
