অৰুণাচলৰ কিৰেণ ৰিজিজুৰ আপুনি নজনা কথা, কোন হয় দেশৰ নতুন ক্ৰীড়া মন্ত্ৰী?

News18-Assam
Updated:June 1, 2019, 9:17 AM IST
অৰুণাচলৰ কিৰেণ ৰিজিজুৰ আপুনি নজনা কথা, কোন হয় দেশৰ নতুন ক্ৰীড়া মন্ত্ৰী?
স্কুলীয়া দিনত ৰিজিজু শ্ৰেষ্ঠ খেলুৱৈ আছিল, তেওঁ ৰাষ্ট্ৰীয় পৰ্যায়ৰ টুৰ্ণামেণ্টতো অংশগ্ৰহণ কৰিছিল। 

স্কুলীয়া দিনত ৰিজিজু শ্ৰেষ্ঠ খেলুৱৈ আছিল, তেওঁ ৰাষ্ট্ৰীয় পৰ্যায়ৰ টুৰ্ণামেণ্টতো অংশগ্ৰহণ কৰিছিল। 

  • Share this:
লোকসভা নিৰ্বাচনত বৃহৎ জয় সাব্যস্ত কৰাৰ পিছত নৰেন্দ্ৰ মোদীয়ে বৃহস্পতিবাৰে কেন্দ্ৰীয় মন্ত্ৰীমণ্ডলৰ সৈত শপতগ্ৰহণ কৰে। উত্তৰ পূবত বিজেপিৰ অন্যতম শক্তিশালী মুখ কিৰেণ ৰিজিজুক মোদী চৰকাৰে যুৱ কল্যাণ আৰু ক্ৰীড়া বিভাগৰ ৰাজ্যিক মন্ত্ৰী (স্বতন্ত্ৰ) দায়িত্ব অৰ্পণ কৰিছে। বিগত চৰকাৰত ৰিজিজু গৃহ বিভাগৰ ৰাজ্যমন্ত্ৰী আছিল। বিগত মন্ত্ৰীসভাত অলিম্পিক ব্ৰঞ্জ মেডেলিষ্ট ৰাজ্যবৰ্ধন ৰাথোড়ে ক্ৰীড়া বিভাগৰ দায়িত্বত আছিল। নতুন মন্ত্ৰীসভাত বাদ পৰিছে ৰাথোড়ৰ নাম।

ৰাষ্ট্ৰীয় পৰ্যায়ৰ খেলুৱৈ ৰিজিজু

অসমৰ ৰামেশ্বৰ তেলী আৰু অৰুণাচল প্ৰদেশৰ কিৰেণ ৰিজিজু এইদুজন সাংসদকে মোদীয়ে মন্ত্ৰীসভাত স্থান দিছে। ৰিজিজু ক্ৰীড়া মন্ত্ৰীৰ পদৰ বাবে সুযোগ্য দাবীদাৰ বুলি ক’ব পাৰি। যুৱ নেতাগৰাকী স্কুলীয়া জীৱনত শ্ৰেষ্ঠ খেলুৱৈ থকাৰ লগতে ফিটনেছক লৈ সাংঘাতিক সক্ৰিয়। খেলৰ সৈতে তেওঁৰ সম্পৰ্ক পুৰণি। ছচিয়েল মিডিয়াত প্ৰায়ে তেওঁ নিজৰ ব্যায়ামৰ ফটো আপলোড কৰি ফিটনেছৰ প্ৰতি সজাগতা সৃষ্টি কৰিবলৈ চেষ্টা কৰি আছে।

স্কুলীয়া দিনত ৰিজিজু খেলৰ বাহিৰেও সমাজসেৱাৰ সৈতে সক্ৰিয়ভাৱে জৰিত আছিল। তেওঁ কেইবাটাও আন্দোলনত অংশ লৈছিল। যুৱ আৰু সাংস্কৃতিক দলৰ সদস্য হিচাপে তেওঁ ১৯৮৭ চনৰ তদানীন্তন ছোভিয়েট সংঘৰ ভাৰত উৎসৱত অংশ ল’বলৈ গৈছিল। যুৱ নেতা আৰু সংসদীয় প্ৰতিনিধিমণ্ডলৰ সদস্য হিচাপে কেইবাখনো দেশ পৰিভ্ৰমণ কৰা ৰিজিজুৱে দিল্লী বিশ্ববিদ্যালয়ৰ অধীনস্থ হন্সৰাজ কলেজৰ পৰা স্নাতক আৰু দিল্লী বিশ্ববিদ্যালয়ৰ পৰা আইন বিষয়ত স্নাতকোত্তৰ ডিগ্ৰী লাভ কৰিছে।

উত্তৰ পূবত বিজেপিৰ শক্তিশালী নেতা কিৰেণ ৰিজিজু

৪৮বছৰীয়া কিৰেণ ৰিজিজুৱে ২০০৪চনত অৰুণাচল পশ্চিম লোকসভা আসনত নিৰ্বাচন খেলি সংসদত প্ৰৱেশ কৰে। চতুৰ্দশ লোকসভাৰ অন্যতম প্ৰখৰ বক্তাৰূপে তেওঁ নিজৰ নাম সন্নিবিষ্ট কৰে। ইয়াৰ পৰৱৰ্তী নিৰ্বাচনত তেওঁ ১৩১৪ ভোটত পৰাস্ত হয় কিন্তু ২০১৪চনত পুনৰ এইখন আসনৰ পৰাই জয়ী হয়।

বিগত নিৰ্বাচনত তেওঁ কংগ্ৰেছৰ টাকাম সঞ্জয়ক ৪৩,৭৩৮টা ভোটত পৰাস্ত কৰিছিল আৰু মোদী কেবিনেটৰ অংশ হৈছিল। এইবাৰ তেওঁ দুবাৰৰ মুখ্যমন্ত্ৰী নাবাম টুকীক ডেৰ লাখতকৈও অধিক ভোটত পৰাস্ত কৰে।
First published: June 1, 2019, 8:02 AM IST
আৰু চাওক
পৰৱৰ্তী বাতৰি

শেহতীয়া বাতৰি

corona virus btn
corona virus btn
Loading