উত্তৰ প্ৰদেশঃ যমুনাত নাও ডুবি ৪ জন নিহত, বহুলোক ডুবি যোৱাৰ আশংকা; চলি আছে উদ্ধাৰ অভিযান

যোৱা বৃহস্পতিবাৰে উত্তৰ প্ৰদেশৰ বান্দাৰ যমুনা নদীত মানুহ কঢ়িয়াই নিয়া এখন যাত্ৰীবাহী নাও ডুবি যোৱাৰ ফলত চাৰিজন লোকৰ মৃত্যু হোৱাৰ লগতে কেইবাজনো লোক সন্ধানহীন হোৱাৰ আশংকা কৰা হৈছে। দুৰ্ঘটনাটো সংঘটিত হোৱাৰ সময়ত মুঠ ১৫ জন লোকক উদ্ধাৰ কৰা হৈছে আৰু সাতৰ পৰা আঠজন সাঁতুৰি সুৰক্ষিত স্থানলৈ গৈছে বুলি আৰক্ষীয়ে জনায়। এনডিআৰএফ আৰু এছডিআৰএফ দলো এক বৃহৎ অনুসন্ধান আৰু উদ্ধাৰ অভিযান ব্যস্ত আছে বুলিও আৰক্ষীয়ে উল্লেখ কৰে।

আৰক্ষীয়ে জনোৱা অনুসৰি, নাওখন মাৰ্কাৰ পৰা ফাতেহপুৰ জিলাৰ জাৰাউলি ঘাটলৈ যোৱাৰ সময়তে এই ঘটনা সংঘটিত হয়। আৰক্ষী অধীক্ষক অভিনন্দনে কয় যে নাওখনত ৩০ ৰ পৰা ৩৫ জন লোক আছিল। সন্ধানহীন লোকসকলক বিচাৰি উলিওৱাৰ বাবে ডুবাৰুসকলৰ সহায় লোৱা হৈছে।

অতিৰিক্ত এছ পি লক্ষ্মী নিৱাস মিশ্ৰাই কয় যে সাতৰ পৰা আঠজন লোক সুৰক্ষিত স্থানলৈ সাঁতুৰি গৈছিল আৰু বহুতো ডুবি যোৱাৰ আশংকা কৰা হৈছে। এতিয়ালৈকে চাৰিটা মৃতদেহ উদ্ধাৰ কৰা হৈছে বুলি এজন জ্যেষ্ঠ বিষয়াই সংবাদ মাধ্যমৰ আগত প্ৰকাশ কৰে। তদুপৰি আৰক্ষীৰ মতে নাওখন যাত্ৰীৰে ভৰি আছিল আৰু ই আবেলি প্ৰায় ৩ বজাত তীব্ৰ বতাহৰ কাৰণে ডুব গৈছিল।

মুখ্যমন্ত্ৰী যোগী আদিত্যনাথে জিলা প্ৰশাসনৰ জ্যেষ্ঠ বিষয়াসকলক ঘটনাস্থলীত উপস্থিত হ'বলৈ আৰু সাহায্য আৰু উদ্ধাৰ অভিযান তদাৰক কৰিবলৈ নিৰ্দেশ দিছে। প্ৰাণহানিৰ প্ৰতি শোক প্ৰকাশ কৰি মুখ্যমন্ত্ৰীয়ে বিষয়াসকলক তৎক্ষণাৎ এন ডি আৰ এফ আৰু এছ ডি আৰ এফৰ দলসমূহক ঘটনাস্থলীত ততাতৈয়াকৈ যাবলৈ নিৰ্দেশ দিয়ে। তেওঁ বিষয়াসকলক আঘাতপ্ৰাপ্তসকলক সৰ্বশ্ৰেষ্ঠ চিকিৎসা প্ৰদান কৰাটো নিশ্চিত কৰিবলৈও কৈছে।