» দেশ

দেশত শিশুৰ কাৰণে Covid-19ৰ প্রতিষেধক প্ৰদানৰ প্ৰক্ৰিয়া আগষ্টৰ ভিতৰত আৰম্ভ কৰাৰ পূৰ্ণ সম্ভাৱনা আছে। মঙলবাৰে কেন্দ্ৰীয় স্বাস্থ্য মন্ত্ৰী মনসুখ মান্দাব্যাই ভাৰতীয় জনতা পাৰ্টীৰ সংসদীয় কমিটীৰ এখন বৈঠকত এই কথা সদৰী কৰে। ইংৰাজী দৈনিক ‘দ্য হিন্দু’ৰ আজিৰ সংস্কৰণত প্রকাশ পোৱা মতে, স্বাস্থ্য মন্ত্ৰীগৰাকীয়ে ভাৰত বিশ্বৰ সৰ্ববৃহৎ ভেকচিন নির্মাতা হোৱাৰ দিশে অগ্ৰসৰ হৈছে বুলিও মন্তব্য কৰে। শীঘ্ৰে আন আন দেশীয় ঔষধ প্ৰস্তুতকাৰী প্ৰতিষ্ঠানক Covid-19ৰ প্রতিষেধক প্ৰস্তুতৰ অনুজ্ঞাপত্ৰ প্ৰদান কৰা হ’ব বুলিও কয় নৱনিযুক্ত স্বাস্থ্য মন্ত্ৰীগৰাকীয়ে।

উল্লেখযোগ্য যে, কিছু দিনৰ আগতে কেন্দ্ৰীয় চৰকাৰে দিল্লী উচ্চ ন্যায়ালয়ক শিশুৰ কাৰণে শীঘ্ৰে ভেকচিন উপলব্ধ হোৱাৰ আৰু এই সন্দৰ্ভত নিয়মাৱলী প্ৰস্তুত কৰাৰ কথা অৱগত কৰিছিল।

মন্ত্ৰীৰ কথাৰ আঁত ধৰি স্বাস্থ্য বিভাগৰ যুটীয়া সচিব লৱ আগৰৱালে কয় – Bharat Biotechৰ Covaxin আৰু Zydus Cadilaৰ DNA ভেকচিনক ১২ বছৰৰ পৰা ১৮ বছৰ বয়সৰ শিশু-কিশোৰৰ কাৰণে অনুমোদন প্ৰদান কৰাৰ চিন্তা চৰ্চা চলি আছে। Final Trialৰ ফলাফল হাতত পৰাৰ পিছত যাৱতীয় নিৰীক্ষণসমূহ কৰি শীঘ্ৰে এই দুই ভেকচিন শিশুক প্ৰদানৰ প্ৰক্ৰিয়া আৰম্ভ কৰা হ’ব, মন্তব্য আগৰৱালৰ।