সংবিধানৰ প্ৰস্তাৱনাৰ পৰা ধৰ্মনিৰপেক্ষ শব্দটো পৰিহাৰ কৰাৰ আৱেদন গ্ৰহণ উচ্চতম ন্যায়ালয়ৰ; ২৩ ছেপ্টেম্বৰৰ পৰা শুনানি

ৰাজ্যসভাৰ সাংসদ ডঃ সুব্ৰমনিয়াম স্বামীয়ে ভাৰতীয় সংবিধানৰ প্ৰস্তাৱনাৰ পৰা ‘ধৰ্মনিৰপেক্ষতা’ আৰু ‘সমাজবাদী’ এই শব্দ দুটাৰ পৰিহাৰ বিচাৰি দাখিল কৰা লেখ আবেদন উচ্চতম ন্যায়ালয়ে গ্ৰহণ কৰিছে । ন্যায়াধীশ ইন্দিৰা বেনাৰ্জী আৰু ন্যায়াধীশ এম এম সুন্দৰেশৰে গঠিত খণ্ড বিচাৰপীঠে লেখ আবেদনখন গ্ৰহণ কৰি মুখ্য ন্যায়াধীশৰ বিচাৰপীঠত দাখিল হৈ থকা অনুৰূপ আবেদনৰে সংলগ্ন কৰে । এই বিষয়ৰ সন্দৰ্ভত শুনানি অহা ছেপ্টেম্বৰৰ ২৩ তাৰিখৰ পৰা আৰম্ভ হ’ব ।

উল্লেখযোগ্য যে ১৯৫০চনত গৃহীত ভাৰতীয় সংবিধানখনৰ প্ৰস্তাৱনাত ‘Secularism’ আৰু ‘Socialism’ শব্দ দুটাৰ উল্লেখ নাছিল । ১৯৭৬চনত তদানীন্তন দেশৰ প্ৰধানমন্ত্ৰী ইন্দিৰা গান্ধীৰ পৃষ্ঠপোষকতাত সংবিধানৰ ৪২সংখ্যক সংশোধন ঘটাই এই দুটা শব্দ সংযোজন কৰা হৈছিল । সেই সময়ত দেশত জৰুৰীকালীন অৱস্থা চলি আছিল ।

আবেদনখনত কোৱা হৈছে সংবিধানৰ অনুচ্ছেদ ৩৬৮ অনুসৰি তেনে পৰিস্থিতিত সংসদে সংবিধান সংশোধন বিধেয়ক গৃহীত কৰিব নোৱাৰে নতুবা কৰিলেও বৈধ নহয় । লগতে কোৱা হৈছে সংবিধান প্ৰণেতা ডঃ বি আৰ আম্বেদকাৰেও কেতিয়াও এই দুই শব্দ সংবিধানৰ অংশ হোৱাটো বিচৰা নাছিল । কাৰণ এই সংযোজন ফলত নাগৰিকৰ ওপৰৰ এটা বিশেষ ৰাজনৈতিক ধাৰা জাপি দিয়া হয় আৰু নাগৰিকৰ ৰাজনৈতিক ধাৰা স্বতন্ত্ৰভাৱে গ্রহণ কৰাৰ অধিকাৰ খৰ্ব কৰা হয় ।

ইয়াৰ উপৰিও আবেদনত কোৱা হৈছে ১৯৭৩চনতে কেশৱানন্দ ভাৰতী গোচৰত উচ্চতম ন্যায়ালয়ৰ সাংবিধানিক বিচাৰপীঠে প্ৰস্তাৱনাক মৌলিক পৰিকাঠামো বুলি ঘোষণা কৰি থৈছে যিটোৰ পৰিবৰ্তন কৰিব পৰা নাযায় । তেনে স্থলত জৰুৰীকালীন অৱস্থাৰ আছিলা লৈ এই দুই শব্দৰ সংযোজন অবৈধ । অৱশ্যে ১৯৯৪ চনত বুম্মাই গোচৰত প্ৰস্তাৱনাৰ ধৰ্মনিৰপেক্ষতা শব্দটোৰ বৈধতা প্ৰদান কৰা হৈছিল ।

ইফালে আবেদনকাৰীসকলে Representation of People Act 1951ৰ দফা 29A(5) পৰিহাৰ কৰাৰ দিশতো নিৰ্দেশ বিচাৰিছে । এই দফা অনুসৰি এটা ৰাজনৈতিক দলে ধৰ্মনিৰপেক্ষতা আৰু সমাজবাদৰ নীতিৰ আনুগত্য বুলি ঘোষণা কৰিব লাগে ।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।