‘প্ৰতিবাদ কৰাটো আপোনাৰ অধিকাৰ, পথ বন্ধ কৰাটো নহয়’ : উচ্চতম ন্যায়ালয়

নাগৰিকত্ব সংশোধনী আইনৰ বিৰুদ্ধে দিল্লীৰ শ্বাহীন বাগত বিগত ৬৪ দিন ধৰি অব্যাহত থকা প্ৰতিবাদক লৈ সোমবাৰে উচ্চতম ন্যায়ালয়ে গ্ৰহণ কৰে শুনানি। ন্যায়াধীশ সঞ্জয় কৌশল, ন্যায়াধীশ কে এম যোছেফৰ বিচাৰপীঠে কয় যে গণতন্ত্ৰ সকলোৰে বাবে। প্ৰতিবাদ কৰাটো আপোনাৰ অধিকাৰ, কিন্তু আপুনি পথ বন্ধ কৰিব নোৱাৰে। এই গোচৰৰ পৰৱৰ্তী শুনানি হ’ব ২৪ ফেব্ৰুৱাৰীত।

ন্যায়ালয়ে শ্বাহীন বাগৰ ঘটনাৰ গোচৰত জ্যেষ্ঠ অধিবক্তা সঞ্জয় হেগড়েক মুখ্য মধ্যস্থতাকাৰী হিচাপে নিযুক্তি দিছে। তেওঁক প্ৰতিবাদকাৰীক সন্মত কৰোৱাৰ দায়িত্ব দিয়া হৈছে। ইয়াৰ উপৰি অধিবক্তা সাধনা ৰামচন্দ্ৰন, ৱজহত হবিবুল্লাহ, চন্দ্ৰশেখৰ আজাদে সহযোগিতা কৰিব।

উচ্চতম ন্যায়ালয়ে কয় যে গণতন্ত্ৰ জনতাৰ অভিব্যক্তিৰ দ্বাৰা চালিত, কিন্তু ইয়াৰ এটা সীমা আছে। যদি পথ বন্ধ কৰে তেন্তে সমস্যাৰ সৃষ্টি হয়। যান–বাহনৰ চলাচল বন্ধ হোৱা উচিত নহয়। যদি সকলো লোকে পথ বন্ধ কৰিবলৈ লয়, তাৰ কাৰণ যিয়েই নহওক, তেন্তে কি হ’ব। আমাৰ উদ্বেগৰ কাৰণ হ’ল প্ৰতিবাদ ৰাজপথত কৰা হৈছে।

কেৱল শ্বাহীন বাগেই নহয়, আন ঘটনাৰ ক্ষেত্ৰতো যদি পথ অৱৰোধ কৰা হয় তেন্তে উত্তপ্ত পৰিস্থিতিৰ সৃষ্টি হ’ব। বিগত ৬৪ দিন ধৰি শ্বাহীন বাগত প্ৰতিবাদ হৈ আছে, কিন্তু কোনো প্ৰতিবাদকাৰীক আঁতৰ কৰিব পৰা নাই। আলোচনাৰ মাধ্যমেৰে সমাধানসূত্ৰ নোলালে কৰ্তৃপক্ষক ব্যৱস্থা গ্ৰহণ কৰাৰ বাবে অধিকাৰ দিয়া হ’ব।

ন্যায়ালয়ে দিল্লী চৰকাৰ, দিল্লী আৰক্ষী আৰু কেন্দ্ৰীয় চৰকাৰক প্ৰতিবাদকাৰীক আঁতৰাবলৈ বিকল্প ব্যৱস্থাৰ ওপৰত আলোচনা কৰিবলৈ আৰু প্ৰতিবাদকাৰীৰ সৈতে কথা পাতিবলৈ নিৰ্দেশ দিয়ে। প্ৰতিবাদকাৰীক এক উচিত সমাধানৰ বাবে সন্মত কৰোৱাৰ নিৰ্দেশ সৰ্বোচ্চ ন্যায়ালয়ৰ।