Heart Attack|Artist Die: হনুমানৰ পিছত এইবাৰ পাৰ্বতী! মঞ্চত নাচি থাকোতেই হাৰ্ট এটেক হৈ ঢুকাল পাৰ্বতীৰূপী যুৱক!

মঞ্চত নৃত্য কৰি থাকোতেই হৃদযন্ত্ৰৰ ক্ৰিয়া বন্ধ হৈ অকাল মৃত্যুক আঁকোৱালি ল’লে আৰু এজন লোকে। বুধবাৰে জম্মুৰ বিষ্ণাহ অঞ্চলত হাৰ্ট এটেক (Heart Attack)ৰ ফলত অনুষ্ঠান পৰিৱেশন কৰি থকা অৱস্থাত মঞ্চত মৃত্যু হয় যোগেশ গুপ্তা (Yogesh Gupta) নামৰ এজন মঞ্চ শিল্পীৰ। জম্মু (Jammu)ৰ কোঠে গাঁৱত গণেশ উৎসৱ (Ganesh Utasav) অনুষ্ঠানৰ সময়ত নৃত্য প্ৰদৰ্শন কৰি থাকোঁতে ঢলি পৰে শিল্পীগৰাকী। জানিব পৰা মতে শিল্পীগৰাকীৰ বয়স আছিল মাত্ৰ ২০ বছৰ।

এটা ভিডিঅ’ ক্লিপত শিল্পীগৰাকীয়ে দেৱী পাৰ্বতীৰ সাজ পৰিধান কৰি গণেশ উৎসৱ উপলক্ষে আয়োজন কৰা এক নাট্য অনুষ্ঠানত দৰ্শকৰ সন্মুখত নৃত্য কৰি আছিল। অভিনয় কৰি থাকোঁতেই হঠাতে তেওঁ ঢলি পৰে। কিন্তু দৰ্শক আৰু সহশিল্পীসকলে ধৰিবই পৰা নাছিল যে যোগেশৰ হাৰ্ট এটেক হৈছে। তেওঁলোকে ভাবিছিল যোগেশে অভিনয় কৰি নাটকখনত নিজৰ ভূমিকা পালন কৰি আছে। আনকি নাটকৰ পটভূমিত শিৱ বন্দনাৰ গানো পূৰাদমে বাজি আছিল। খন্তেক পিছতে শিৱৰ ভাও লোৱা সহশিল্পীজনে নিজৰ ভাওত অভিনয় কৰিব আহোতেহে গম পালে যে যোগেশ গুপ্তা অচেতন হৈ পৰি আছে। যোগেশক জগাই তোলাৰ চেষ্টা কৰে যদিও যোগেশৰ চেতনা নহাত আন সহকৰ্মীক সহায়ৰ বাবে মাতে। ততাতৈয়াকৈ যোগেশক চিকিৎসালয়লৈ নিয়া হয় যদিও ইতিমধ্যে তেওঁৰ মৃত্যু ঘটিছিল।

#BREAKING
Yogesh Gupta, who was playing the role of Mother Parvati in #Jammu, suddenly had a cardiac arrest and then died in a few moments. He was just 20 years Old.
Its #Shocking

May god Rest him in peace.#RIP #heartattack pic.twitter.com/chT0Shjy84

— Jasmeen Kaur (@Jasmeen66480371) September 8, 2022

উল্লেখ্য যে ইয়াৰ পূৰ্বে মঞ্চতে বলীউডৰ প্ৰখ্যাত কণ্ঠশিল্পী কে কে (KK)ৰ মৃত্যুৱে সমগ্ৰ দেশতে শ্বকৱেভৰ সৃষ্টি কৰিছিল যেতিয়া তেওঁ কলকাতাত এটা লাইভ কনচাৰ্টত অনুষ্ঠান পৰিৱেশন কৰি থাকোতেই শেষ নিশ্বাস ত্যাগ কৰিছিল। কে কেৰ মৃত্যুৰ মাত্ৰ দুদিন আগতে মালয়ালম গায়িকা এদাভা বছিৰে (Edava Basheer)ও ২৮ মে’ত এক অনুষ্ঠান পৰিবেশনৰ সময়ত মঞ্চত মৃত্যুক আঁকোৱালি লৈছিল।

মাত্ৰ কেইদিনমান পূৰ্বে উত্তৰ প্ৰদেশৰ মইনপুৰীত ৰবী শৰ্মা নামৰ এজন ৩৫ বছৰীয়া যুৱকৰ হনুমানৰ ভাওত অভিনয় কৰি থাকোতেই মঞ্চত হাৰ্ট এটেক হৈ মৃত্যু হৈছিল।