Sonia Gandhi: ছোনিয়া গান্ধীক হাস্পতালৰ পৰা ৰিলিজ, জিৰণিৰ পৰামৰ্শ; ধন সৰবৰাহৰ গোচৰৰ তদন্তৰ সন্মুখীন 

সোমবাৰে ছাৰ গংগা ৰাম হাস্পতালৰ পৰা যাবলৈ দিয়া হয় কংগ্ৰেছ সভানেত্ৰী ছোনিয়া গান্ধী (Sonia Gandhi)ক। হাস্পতালৰ পৰা মুকলি কৰি দিলেও ঘৰতে জিৰণি ল’বলৈ পৰামৰ্শ দিয়ে চিকিৎসকে। যোৱা ২ জুনত ছোনিয়াৰ দেহত নোভেল ক’ৰোনা ভাইৰাছ (Corona Virus) পজিটিভ পোৱা গৈছিল আৰু ক’ভিড-পৰৱৰ্তী সমস্যাৰ বাবে ১২ জুনৰ পৰা গংগা ৰাম হাস্পতাল (Sir Ganga Ram Hospital)ত চিকিৎসাধীন হৈ আছিল।

এই খবৰটো টুইট কৰি কংগ্ৰেছৰ সাংসদ জয়ৰাম ৰমেশে কয় যে, ‘কংগ্ৰেছৰ সভানেত্ৰী শ্ৰীমতী  ছোনিয়া গান্ধীক আজি সন্ধিয়া ছাৰ গংগা ৰাম হাস্পতালৰ পৰা ৰিলিজ দিয়া হৈছে আৰু ঘৰতে জিৰণি লোৱাৰ পৰামৰ্শ দিয়া হৈছে।"

Congress President Smt. Sonia Gandhi has been discharged from Sir Ganga Ram Hospital this evening and advised rest at home.

— Jairam Ramesh (@Jairam_Ramesh) June 20, 2022

দলৰ জ্যেষ্ঠ নেতা ৰাহুল গান্ধীৰ দৰেই ছোনিয়াও নেশ্যনেল হেৰাল্ড (National Herald)ৰ ধন সৰবৰাহ গোচৰৰ তদন্তৰ সন্মুখীন হৈছে আৰু ২৩ জুনত তেওঁক বলবৎকাৰী সঞ্চালকালয়ে (Enforcement Directorate) নতুন চমনৰ জৰিয়তে মাতিছে। ৭৫ বছৰীয়া নেত্ৰীগৰাকীয়ে ৮ জুনত কেন্দ্ৰীয় সংস্থাটোৰ সন্মুখত হাজিৰ হোৱাৰ কথা আছিল যদিও তেওঁৰ Covid-সম্পৰ্কীয় অসুস্থতাৰ বাবে তেওঁ অধিক সময় বিচাৰিছিল।