Supreme Court of India: উচ্চতম ন্যায়ালয়ে অগ্ৰাহ্য কৰিলে শিক্ষানুষ্ঠানত 'কমন ড্ৰেছ কোড'ৰ বাবে কৰা আবেদন

শুকুৰবাৰে উচ্চতম ন্যায়ালয়ে পঞ্জীয়নভুক্ত শিক্ষানুষ্ঠানৰ কৰ্মচাৰী আৰু ছাত্ৰ-ছাত্ৰীৰ বাবে এক উমৈহতীয়া সাজ-পোছাক নিয়ম কাৰ্যকৰী কৰিবলৈ কেন্দ্ৰ, ৰাজ্য আৰু কেন্দ্ৰীয় শাসিত অঞ্চললৈ নিৰ্দেশ বিচাৰি কৰা ৰাজহুৱা স্বাৰ্থজড়িত আবেদন অগ্ৰাহ্য কৰে। ন্যায়াধীশ হেমন্ত গুপ্তা আৰু সুধাংশু ধুলীয়াৰ বিচাৰপীঠে কয় যে এইটো এনেকুৱা বিষয় নহয় যিটো বিচাৰৰ বাবে আদালতলৈ আহিব লাগে।

পিআইএলে যুক্তি দিছিল যে সমতা সুৰক্ষিত কৰাৰ বাবে আৰু ভ্ৰাতৃত্ববোধ আৰু জাতীয় সংহতিক প্ৰসাৰিত কৰাৰ বাবে এক সাজ-পোছাক নিয়ম কাৰ্যকৰী কৰা উচিত। পি আই এলৰ আবেদনকাৰী নিখিল উপাধ্যায়ৰ হৈ হাজিৰ হোৱা জ্যেষ্ঠ অধিবক্তা গৌৰৱ ভাটিয়াই এয়া সাংবিধানিক বিষয় বুলি উল্লেখ কৰি শিক্ষাৰ অধিকাৰ আইনৰ অধীনত নিৰ্দেশনা বিচাৰিছিল। পিআইএলক গ্ৰহণ কৰিবলৈ বিচাৰপীঠৰ অনিচ্ছা অনুভৱ কৰি অধিবক্তাই ইয়াক প্ৰত্যাহাৰ কৰে। কৰ্ণাটকৰ ‘হিজাব’ বিষয়টোৰ পটভূমিত এই আবেদন দাখিল কৰা হৈছিল।

ৰাজ্যখনৰ শিক্ষানুষ্ঠানসমূহত হিজাব নিষিদ্ধকৰণ প্ৰত্যাহাৰ কৰিবলৈ অস্বীকাৰ কৰা কৰ্ণাটক উচ্চ ন্যায়ালয়ৰ ৰায়ক প্ৰত্যাহ্বান জনাই ন্যায়াধীশ গুপ্তাৰ নেতৃত্বত একেখন বিচাৰপীঠে যুক্তিৰ শুনানি গ্ৰহণ কৰি আছে। অধিবক্তা অশ্বিনী উপাধ্যায় আৰু অশ্বানী ডুবেৰ জৰিয়তে দাখিল কৰা পি আই এলত কেন্দ্ৰক ন্যায়িক আয়োগ বা বিশেষজ্ঞ পেনেল গঠন কৰি সামাজিক আৰু অৰ্থনৈতিক ন্যায়, সমাজবাদ ধৰ্মনিৰপেক্ষতা আৰু গণতন্ত্ৰৰ মূল্যবোধৰ বীজ সিঁচিবলৈ পদক্ষেপৰ পৰামৰ্শ দিবলৈ আৰু ছাত্ৰ-ছাত্ৰীসকলৰ মাজত ভ্ৰাতৃত্ববোধৰ মৰ্যাদা ঐক্য আৰু জাতীয় সংহতি প্ৰসাৰৰ বাবে এক নিৰ্দেশনা বিচাৰিছিল।

নতুবা সংবিধানৰ ৰক্ষক আৰু মৌলিক অধিকাৰৰ ৰক্ষক হোৱাৰ বাবে ভাৰতীয় আইন আয়োগক সামাজিক সমতা সুৰক্ষিত কৰাৰ বাবে আৰু ভ্ৰাতৃত্ববোধৰ মৰ্যাদা ঐক্য আৰু জাতীয় সংহতিৰ প্ৰসাৰৰ বাবে তিনিমাহৰ ভিতৰত পদক্ষেপৰ পৰামৰ্শ দি প্ৰতিবেদন প্ৰস্তুত কৰিবলৈ নিৰ্দেশ দিয়া বুলিও ইয়াত কোৱা হৈছে। শিক্ষানুষ্ঠানসমূহ ধৰ্মনিৰপেক্ষ ৰাজহুৱা স্থান আৰু ইয়াৰ উদ্দেশ্য হৈছে জ্ঞান আৰু প্ৰজ্ঞা নিয়োগ, সুস্বাস্থ্য আৰু জাতি গঠনত অৰিহণা যোগোৱা, অত্যাৱশ্যকীয় আৰু অপ্ৰয়োজনীয় ধৰ্মীয় পদ্ধতিসমূহ মানি চলাৰ বাবে নহয়, বুলি ইয়াত কোৱা হৈছে। শিক্ষানুষ্ঠানৰ ধৰ্মনিৰপেক্ষ চৰিত্ৰ ৰক্ষাৰ বাবে সকলো বিদ্যালয়-মহাবিদ্যালয়তে Common Dress Code প্ৰৱৰ্তন কৰাটো অতি প্ৰয়োজনীয়, নহ’লে কাইলৈ নগা সাধুসকলে কলেজত নামভৰ্তি ল’ব পাৰে আৰু অত্যাৱশ্যকীয় ধৰ্মীয় চৰ্চাৰ উল্লেখ কৰি কাপোৰ নোলোৱাকৈ শ্ৰেণীত উপস্থিত থাকিব পাৰে বুলি পিআইএলে যুক্তি দিছে।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।