NRCক লৈ ৰঞ্জন গগৈয়ে লোৱা পদক্ষেপৰ কাৰণেই উত্থাপন হৈছিল যৌন নিৰ্যাতনৰ অভিযোগ ! 

দেশৰ প্ৰাক্তন মুখ্য ন্যায়াধীশ ৰঞ্জন গগৈৰ বিৰুদ্ধে অসাধু চক্ৰই ষড়যন্ত্ৰ ৰচিছিল ! মুখ্য ন্যায়াধীশৰ কাৰ্যকালত ৰাষ্ট্ৰীয় নাগৰিক পঞ্জীৰ সন্দৰ্ভত লোৱা সবল স্থিতিৰ কাৰণে তেওঁৰ বিৰুদ্ধে ষড়যন্ত্ৰমূলক ভাৱে যৌন নিৰ্যাতনৰ অভিযোগ অনাৰ সম্ভাৱনীয়তা নুই কৰা নাই উচ্চ স্তৰীয় কমিটীয়ে । উচ্চতম ন্যায়ালয়ৰ প্ৰাক্তন ন্যায়াধীশ একে পাটনায়কৰ নেতৃত্ব গঠিত কমিটীয়ে গগৈয়ে পঞ্জীয়কৰ কাৰ্যালয় সু-সংগঠিত কৰাৰ দিশত লোৱা পদক্ষেপ আৰু NRCৰ সন্দৰ্ভত লোৱা স্থিতিৰ পৰিপ্ৰেক্ষিতত এচামে এনে ষড়যন্ত্ৰ ৰচাৰ সম্ভাৱনীয়তা প্ৰকট কৰিছে ।

আজি ন্যায়াধীশ এছকে কৌলৰ নেতৃত্বত গঠিত এখন তিনিজনীয়া বিচাৰপীঠে কমিটীৰ প্ৰতিবেদনৰ উদ্ধৃতি দি গোচৰটো নিষ্পত্তি কৰে । এজন অধিবক্তাৰ আবেদনৰ ভিত্তিত উচ্চতম ন্যায়ালয়ৰ দ্বাৰা ২০১৯চনত ন্যায়ধীশ পাটনায়কৰ নেতৃত্বত এখন কমিটী গঠন কৰি দিয়া হৈছিল । কমিটীখনক সমগ্ৰ ঘটনাৰ আঁৰত কি উদ্দেশ্য অন্তৰ্নিহিত হৈ আছে – এই সন্দৰ্ভত তদন্ত কৰিবলৈ দায়িত্ব অৰ্পণ কৰা  হৈছিল ।

উল্লেখযোগ্য যে ২০১৯চনৰ প্ৰথমাৰ্ধত উচ্চতম ন্যায়ালয়ত কৰ্মৰত এগৰাকী মহিলাই সেই সময়ৰ দেশৰ মুখ্য ন্যায়াধীশ ৰঞ্জন গগৈৰ বিৰুদ্ধে যৌন নিৰ্যাতনৰ গুৰুতৰ অভিযোগ উত্থাপন কৰিছিল । তেতিয়া তৎক্ষণাৎ ন্যায়াধীশ এছএ ববড়ে  (এতিয়াৰ মুখ্য ন্যায়াধীশ), ইন্দু মালহোত্ৰা আৰু ইন্দিৰা বেনাৰ্জীৰ তিনিজনীয়া তদন্ত কমিটী গঠন কৰি দিয়া হৈছিল । কমিটীখনে তদন্তৰ অন্তত গগৈক দোষমুক্ত কৰিছিল । আনহাতে অভিযোগকাৰী মহিলা গৰাকীক ২০২০চনৰ জানুৱাৰী মাহত উচ্চতম ন্যায়ালয়ত চাকৰি যোগদান কৰিবলৈ অনুমতি প্ৰদান কৰা হয় ।