Rahul Gandhi in ED Office: বুধবাৰৰ বাবেও ইডিৰ কাৰ্যালয়ত হাজিৰ ৰাহুল গান্ধী, অখিলেশ যাদৱৰ ক্ষুৰধাৰ টুইটত EDক নতুনকৈ নামাংকন

প্ৰৱৰ্তন সঞ্চালকালৰ কাৰ্যালয়ত তৃতীয় দিনৰ বাবে বুধবাৰে হাজিৰ হ'ল ৰাহুল গান্ধী। নেচনেল হেৰাল্ড গোচৰৰ সন্দৰ্ভত কংগ্ৰেছ নেতা ৰাহুল গান্ধীক আজি একেৰাহে তৃতীয় দিনৰ বাবে প্ৰৱৰ্তন সঞ্চালকালয়ে সোধা-পোছা কৰি আছে। সোমবাৰে নিশা ১১.৩০ বজালৈ আৰু মঙলবাৰে নিশা ১১ বজালৈকে প্ৰশ্ন কৰা হৈছিল গান্ধীক। আজি পুনৰ তেওঁক প্ৰশ্ন কৰি আছে ইডিৰ (Enforcement Directorate) বিষয়াই।

ইফালে এই ঘটনাক লৈ দেশৰ ৰাজধানীত উত্তাল প্ৰতিবাদ সাব্যস্ত কৰে মহিলা কংগ্ৰেছে। কংগ্ৰেছ সাংসদ অধীৰ চৌধুৰীয়ে অভিযোগ কৰিছে যে আৰক্ষীয়ে কংগ্ৰেছৰ মুখ্য কাৰ্যালয়ত প্ৰৱেশ কৰি কৰ্মীসকলক প্ৰহাৰ কৰিছে। সাংসদজনে এই ঘটনাক "গণতন্ত্ৰৰ হত্যা" বুলি কয়।

আনহাতে, প্ৰৱৰ্তন সঞ্চালকালয়ৰ নতুন নাম ৰাখে সমাজবাদী পাৰ্টীৰ ৰাষ্ট্ৰীয় সভাপতি অখিলেশ যাদৱে। তেওঁ কয় যে ইডিৰ অৰ্থ হৈছে ‘Examination in Democracy’বা 'গণতন্ত্ৰত পৰীক্ষা'। অখিলেশ যাদৱে টুইট কৰিছিল যে ইডি এতিয়া "গণতন্ত্ৰত পৰীক্ষা"ৰ দৰে হৈ পৰিছে। ৰাজনীতিত বিৰোধীয়ে এই পৰীক্ষাত উত্তীৰ্ণ হ'ব লাগিব। যেতিয়া চৰকাৰ নিজেই বিফল হয়, ই এই পৰীক্ষাটো ঘোষণা কৰে। যিসকলে ভালদৰে প্ৰস্তুত তেওঁলোকে লিখিত বা পঢ়া পৰীক্ষা, বা মৌখিক পৰীক্ষালৈ ভয় নকৰে... আৰু আপুনি কেতিয়াও ভয় কৰা উচিত নহয়।

ED का मतलब अब ‘Examination in Democracy’ बन गया है। राजनीति में विपक्ष को ये परीक्षा पास करनी होती है। जब सरकार स्वयं फ़ेल हो जाती है तब वो इस परीक्षा की घोषणा करती है। जिनकी तैयारी अच्छी होती है वो न तो लिखा-पढ़ी की परीक्षा से डरते हैं, न मौखिक से… और कभी डरना भी नहीं चाहिए।

— Akhilesh Yadav (@yadavakhilesh) June 15, 2022

উল্লেখ্য, নেচনেল হেৰাল্ড গোচৰত মানি লণ্ডাৰিং অভিযোগৰ ওপৰত দুদিন ধৰি নিৰন্তৰ প্ৰশ্ন কৰাৰ পিছত প্ৰৱৰ্তন সঞ্চালকালয়ে বুধবাৰে পুনৰ কংগ্ৰেছ নেতা ৰাহুল গান্ধীক (Congress leader Rahul Gandhi) সোধা-পোছাৰ বাবে মাতি পঠিওৱাত ৰাজস্থানৰ মুখ্যমন্ত্ৰী তথা কংগ্ৰেছ নেতা অশোক গেহলটে কয় যে এইটো ৮ বছৰীয়া শাসনৰ এক ক'লা অধ্যায়।