‘‘সাংবাদিক হোৱাৰ ভাও নল’ব, বিজেপিৰ বেজ পিন্ধি লওঁক’’- সাংসদ পদ খাৰিজ হোৱাৰ এদিন পিছতে এজন সাংবাদিকক উদ্দেশ্যি অপমানসূচক মন্তব্য ৰাহুল গান্ধীৰ

যেন বিতৰ্কই লগ নেৰা হৈছে কংগ্ৰেছ নেতা ৰাহুল গান্ধীক। লোকসভাৰ সাংসদ পদ খাৰিজ হোৱাৰ ঘোষণাৰ এদিন পিছতেই শনিবাৰে এক সংবাদমেলত এজন সাংবাদিকৰ সৈতে ৰাজহুৱা বাকযুদ্ধত লিপ্ত হয় যিয়ে তেওঁক মানহানিৰ গোচৰত শেহতীয়াকৈ দোষী সাব্যস্ত হোৱাৰ বিষয়ে প্ৰশ্ন কৰিছিল। কংগ্ৰেছ নেতাজনে লোকসভাৰ পৰা অযোগ্য হোৱাৰ পিছত তেওঁৰ প্ৰথম সংবাদ মাধ্যমৰ বাৰ্তালাপৰ সময়ত সাংবাদিকজনক এক প্ৰকাৰ অপমান কৰিছিল।

দৰাচলতে, সংবাদমেল সম্বোধনৰ সময়ত যেতিয়া এজন সাংবাদিকে তেওঁক 'মোদী উপাধি' মানহানিৰ গোচৰত দোষী সাব্যস্ত হোৱাৰ বিষয়ে প্ৰশ্ন কৰিছিল, ৰাহুল গান্ধীয়ে সাংবাদিকজনক তীব্ৰ সমালোচনা কৰি কৈছিল, ‘‘সাংবাদিক হোৱাৰ ভাও নল’ব।’’

সাংবাদিকজনে ৰাহুল গান্ধীৰ আগত সমগ্ৰ অ'বিচি সম্প্ৰদায়ক অপমান কৰাৰ প্ৰসংগ উত্থাপন কৰিছিল। তেওঁ লগতে দাবী কৰে যে ভাৰতীয় জনতা পাৰ্টীয়ে মানহানিৰ গোচৰত গান্ধীৰ দোষী সাব্যস্ত হোৱা আৰু তাৰ পিছত সংসদৰ পৰা অযোগ্য হোৱাৰ কথা উল্লেখ কৰিবলৈ সমগ্ৰ দেশতে সংবাদ মাধ্যমৰ সৈতে বাৰ্তালাপ কৰি আছে।

ৰাহুল গান্ধীয়ে ওলোটাই সাংবাদিকজনক প্ৰশ্ন কৰি কয় যে, ‘‘চাওক, আপোনাৰ প্ৰথম প্ৰয়াস তাৰ পৰা আছিল (তেওঁৰ বাওঁফালে আঙুলিয়াই), দ্বিতীয় প্ৰয়াসটো তাৰ পৰা আছিল (মাজৰ ফালে আঙুলিয়াই) আৰু তৃতীয় প্ৰয়াসটো ইয়াৰ পৰা (তেওঁৰ সোঁফালে আঙুলিয়াই)। আপুনি কিয় ইমান পোনপটীয়াকৈ বিজেপিৰ হৈ কাম কৰি আছে? অন্ততঃ কিছু বিবেচনাৰে এইটো কৰিব নেকি? চাওক, এতিয়া সাংবাদিকজনে হাঁহি আছে। মই আপোনাক এটা উদাহৰণ দিওঁ, যদি আপুনি বিজেপিৰ হৈ কাম কৰিব বিচাৰে, তেন্তে ইয়াত বিজেপিৰ চিহ্ন (বেজ) পিন্ধি আপোনাৰ বুকুত ৰাখক। তেতিয়া মই সেইবোৰৰ উত্তৰ দিয়াৰ দৰেই আপোনাক উত্তৰ দিম। কেৱল সাংবাদিক হোৱাৰ ভাও নল'ব।’’

কংগ্ৰেছ নেতাজনে লগতে দাবী কৰিছিল যে তেওঁক সংসদৰ পৰা অযোগ্য ঘোষণা কৰা হৈছিল কিয়নো প্ৰধানমন্ত্ৰী নৰেন্দ্ৰ মোদীয়ে ৰাহুল গান্ধীয়ে পৰৱৰ্তী ভাষণৰ সময়ত কি প্ৰকাশ কৰিব তাক লৈ ভয় খাইছিল। তেওঁ লণ্ডনত নিজৰ মন্তব্যৰ বাবে আৰু তেওঁ দোষী সাব্যস্ত হোৱা মানহানিৰ বিচাৰৰ সময়ত তেওঁ কিয় ক্ষমা বিচৰা নাছিল তাৰ উত্তৰ দিবলৈ বীৰ চাভাৰকাৰৰ কথাও উল্লেখ কৰিছিল। কংগ্ৰেছ নেতাজনে কয় যে, ‘‘প্ৰধানমন্ত্ৰীয়ে মোৰ পৰৱৰ্তী ভাষণক লৈ ভয় খাই থকাৰ বাবে মোক অযোগ্য ঘোষণা কৰা হৈছে। মই তেওঁৰ চকুত ভয় দেখিছোঁ। সেয়েহে তেওঁলোকে মোক সংসদত কথা কোৱাটো নিবিচাৰে।’’

গান্ধীয়ে কয় যে, তেওঁক অযোগ্য ঘোষণা কৰি বা কাৰাগাৰত ৰাখি তেওঁৰ কণ্ঠস্বৰ ৰুদ্ধ কৰিব নোৱাৰে আৰু পথত বাধা থকা স্বত্বেও তেওঁ বিজেপি নেতৃত্বাধীন কেন্দ্ৰৰ বিৰুদ্ধে যুঁজ অব্যাহত ৰাখিব। তেওঁ লগতে কয়, ‘‘মোক আজীৱন অযোগ্য ঘোষণা কৰক, মোক আজীৱন কাৰাগাৰ লৈ যাওক, মই আগবাঢ়ি যাম।’’

কিন্তু তেওঁক সাংবাদিকে যেতিয়া প্ৰশ্ন কৰা হৈছিল, তেতিয়া গান্ধীয়ে অযোগ্যতাৰ পিছত তেওঁৰ বা কংগ্ৰেছ দলৰ পৰৱৰ্তী আইনী বা ৰাজনৈতিক কাৰ্যপন্থা সম্পৰ্কে একো স্পষ্ট কৰা নাছিল।

উল্লেখ্য যে, ৰাহুল গান্ধীক বৃহস্পতিবাৰে চুৰাট আদালতে ২০১৯ ৰ অপৰাধমূলক মানহানিৰ গোচৰত দোষী সাব্যস্ত কৰিছিল। পৰৱৰ্তীকালত, ন্যায়ালয়ৰ ৰায়দানৰ পিছত তেওঁৰ লোকসভাৰ সাংসদ পদ খাৰিজ কৰা হয়।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।