‘বিজেপিৰ নেতা–মন্ত্ৰীয়ে গুলী চলাবলৈ উচতনি দিলে এনে ঘটনা হোৱাতো অপ্ৰত্যাশিত নহয়’

দিল্লীৰ জামিয়া নগৰত নাগৰিকত্ব সংশোধনী আইনৰ বিৰুদ্ধে চলি থকা প্ৰতিবাদৰ মাজত এজন যুৱকে প্ৰতিবাদকাৰীলৈ লক্ষ্য কৰি গুলীচালনা কৰা ঘটনাই সমগ্ৰ দেশতে তোলপাৰ লগাইছে।

দিল্লীৰ জামিয়া নগৰত গুলীচালনা কৰা ব্যক্তিজনৰ চিনাক্তকৰণক ইতিমধ্যে গ্ৰেপ্তাৰ কৰিছে আৰক্ষীয়ে। বৃহস্পতিবাৰে বন্দুক হাতত লৈ ফায়াৰিং কৰা ব্যক্তিজনৰ হৈছে গোপাল আৰু তেওঁ ফেচবুকত ৰামভক্ত গোপাল হিচাপে আছে।

ঘটনাক তীব্ৰ ভাষাৰে গৰিহনা দিছে কংগ্ৰেছে। কংগ্ৰেছৰ মহাসচিব প্ৰিয়ংকা গান্ধীয়ে ঘটনা সংঘটিত হোৱাৰ পিছতে প্ৰধানমন্ত্ৰী নৰেন্দ্ৰ মোদীক তীব্ৰ সমালোচনা কৰে। প্ৰিয়ংকা গান্ধীয়ে কয় যে, ‘ যেতিয়া বিজেপিৰ নেতা মন্ত্ৰীয়ে ভাষণত মানুহক গুলী কৰিবলৈ উচতনি দিব, তেতিয়া এনেধৰণৰ ঘটনা সংঘটিত হোৱাতো কোনো অপ্ৰত্যাশিত নহয়। প্ৰধানমন্ত্ৰী মোদীয়ে উত্তৰ দিব লাগে যে, তেওঁলোকে কেনেকুৱা দিল্লী নিৰ্মাণ কৰিব বিচাৰে। তেওঁলোক হিংসাৰ লগত আছে নে অহিংসাৰ লগত আছে? স্থিতি স্পষ্ট কৰিব লাগে। বিকাশৰ সৈতে আছে নে অৰাজকতাৰ পক্ষত তেওঁলোক?