''প্ৰধানমন্ত্ৰী মোদী আৰু শক্তিশালী হ'ব, ৰাজনীতিক লৈ ছিৰিয়াছ নহয় কংগ্ৰেছ''- গোৱাত মমতা বেনাৰ্জীৰ মন্তব্য

গোৱাৰ পৰা তৃণমূল কংগ্ৰেছৰ নেত্ৰী মমতা বেনাৰ্জীয়ে (Mamata Banerjee) শনিবাৰে কয় যে প্ৰধানমন্ত্ৰী নৰেন্দ্ৰ মোদী (Narendra Modi) আৰু শক্তিশালী হ'ব, কিয়নো কংগ্ৰেছ দলে ৰাজনীতিক ছিৰিয়াছলী লোৱা নাই। গোৱা ভ্ৰমণৰ অন্তিম দিনা মমতা বেনাৰ্জীয়ে দেশৰ আটাইতকৈ পুৰণি দলটোৱে সিদ্ধান্ত নোলোৱাৰ অভিযোগ তোলে।

তিনিদিনীয়া গোৱা ভ্ৰমণৰ অন্তিম দিনা পানাজীত সংবাদ মাধ্যমৰ লোকসকলক সম্বোধন কৰি বেনাৰ্জীয়ে লগতে কয়– ''কংগ্ৰেছে সিদ্ধান্ত ল'ব নোৱাৰাৰ পৰিণাম দেশখনে ভুগি আছে। মই এই মুহূৰ্তত সকলো কথা ক'ব নোৱাৰোঁ, কাৰণ তেওঁলোকে ৰাজনীতিক গুৰুত্বসহকাৰে নলয়। কংগ্ৰেছৰ কাৰণে মোদীজী অধিক শক্তিশালী হৈ উঠিছে।'' বেনাৰ্জীয়ে কয় যে কোনেও যদি সিদ্ধান্ত ল'ব নোৱাৰে, তেন্তে দেশখনে ইয়াৰ বাবে কিয় ভুগিব লাগে? তেওঁ কয় যে বিজেপিৰ বিৰুদ্ধে যুঁজ দিয়াৰ পৰিৱৰ্তে কংগ্ৰেছে পশ্চিমবংগত তৃণমূলৰ বিৰুদ্ধে প্ৰতিদ্বন্দ্বিতা কৰিছিল।

উল্লেখ্য, তৃণমূলে ঘোষণা কৰিছে যে তেওঁলোকে আগন্তুক গোৱা বিধানসভা নিৰ্বাচনত ৪০খন আসনত প্ৰতিদ্বন্দ্বিতা কৰিব। বেনাৰ্জীয়ে কয় যে টিএমচিয়ে নিৰ্বাচনত আঞ্চলিক দলসমূহক আসন আৱণ্টন কৰাত বিশ্বাস কৰে। তেওঁ আঞ্চলিক দল শক্তিশালী হোৱাটো বিচাৰে বুলি প্ৰকাশ কৰে। তেওঁ কয়– ''আমি ফেডাৰেল ফ্ৰেমৱৰ্ক শক্তিশালী হোৱাটো বিচাৰোঁ। আমি ৰাজ্যসমূহক শক্তিশালী কৰা উচিত, যদি ৰাজ্যবোৰ শক্তিশালী হয়, কেন্দ্ৰও শক্তিশালী হ'ব। আমি দিল্লীৰ দাদাগিৰি নিবিচাৰোঁ, সেয়াই।''

বেনাৰ্জীক কংগ্ৰেছে কি সিদ্ধান্ত ল'ব লাগে বুলি তেওঁ ভাবে বুলি সোধাত তেওঁ কয়, "মই কংগ্ৰেছৰ বিষয়ে আলোচনা কৰিবলৈ নাযাওঁ, কাৰণ ই মোৰ দল নহয়। মই মোৰ নিজৰ আঞ্চলিক দল গঠন কৰিছোঁ আৰু আমি কাৰো পৰা সমৰ্থন নোলোৱাকৈ তিনিবাৰ চৰকাৰ গঠন কৰিছিলোঁ। তেওঁলোকক সিদ্ধান্ত ল'বলৈ দিয়ক। মই আন কোনো ৰাজনৈতিক দলৰ কাম-কাজত হস্তক্ষেপ নকৰোঁ। মই মোৰ ৰাজনৈতিক দলৰ বিষয়ে ক'ব পাৰোঁ যে আমাৰ যুঁজ অব্যাহত থাকিব। আমি বিজেপিৰ সন্মুখত আঁঠু কাঢ়িবলৈ যোৱা নাই।''

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।