Rajasthan Lightning Accident: ছেলফি লৈ থকা অৱস্থাত পৰিল বজ্ৰ, ১১জনৰ মৃত্যু, প্ৰধানমন্ত্ৰীৰ শোক প্ৰকাশ

প্ৰধানমন্ত্ৰী নৰেন্দ্ৰ মোদী (Narendra Modi)য়ে ৰাজস্থানৰ বিভিন্ন অঞ্চলত বজ্ৰপাতৰ ফলত হোৱা মৃত্যুৰ ঘটনাক লৈ শোক প্ৰকাশ কৰিছে। উল্লেখযোগ্য যে জয়পুৰ, ঝালাৱাড় আৰু ধলপুৰ জিলাত দেওবাৰে বজ্ৰপাতৰ পৃথক পৃথক ঘটনাত ৭টা শিশুসহ ১৮জন লোকৰ মৃত্যু হয়। আৰক্ষীৰ মতে, পৃথক পৃথক গাঁৱত হোৱা এই ঘটনাত ৬টা শিশুসহ ২১জন লোক আহতও হৈছে। প্ৰধানমন্ত্ৰী মোদীয়ে সোমবাৰে পুৱা এক টুইটযোগে কয়, ‘ৰাজস্থানৰ কিছু অঞ্চলত বজ্ৰপাতৰ ফলত কেইবাজনো লোকে নিজৰ প্ৰাণ হেৰুৱাবলগীয়া হৈছে। এই ঘটনাত অত্যন্ত মৰ্মাহত। মই মৃতকৰ পৰিয়াললৈ সমবেদনা জ্ঞাপন কৰিছো।’

উল্লেখযোগ্য যে ৰাজধানী জয়পুৰৰ আমেৰ কিলাৰ সমীপত বজ্ৰ পৰাৰ ফলত ১১জন লোকৰ মৃত্যু হয়। আন ৮জন লোক আহত হয় এই ঘটনাত। মৃতসকলৰ অধিকসংখ্যক যুৱক, যিসকলে পাহাৰৰ ওপৰত মনোমোহা বতৰৰ আনন্দ ল’বলৈ গৈছিল। তাৰ কিছুসংখ্যকে ৱাচ টাৱাৰৰ ওপৰত ছেলফি লৈ আছিল। জয়পুৰৰ আৰক্ষী আয়ুক্ত আনন্দ শ্ৰীবাস্তৱে কয়, ‘বজ্ৰপাতৰ ফলত ১১জন লোকৰ মৃত্যু হোৱাৰ বিপৰীতে ৮জন আহত হৈছে।’