দিল্লীৰ তালকাটোৰা ষ্টেডিয়ামত আজি ‘পৰীক্ষা পে চৰ্চা ২০২৩’; এইবাৰৰ পঞ্জীভুক্ত শিক্ষাৰ্থীৰ সংখ্যা ৩৮ লক্ষাধিক

দেশৰ প্ৰধানমন্ত্ৰীৰ বিশেষ কাৰ্যসূচী ‘পৰীক্ষা পে চৰ্চা ২০২৩’ আজি পুৱা দিল্লীৰ তালকাটোৰা ষ্টেডিয়ামত অনুষ্ঠিত হ’ব। এই কাৰ্যসূচীত ২০০০ শিক্ষাৰ্থীয়ে ষ্টেডিয়ামত অংশগ্ৰহণ কৰিব। আনহাতে, বহু প্ৰাৰ্থীসকলে লাইভ টেলিকাষ্টৰ জৰিয়তে কাৰ্যসূচীটোত অংশ ল’ব। ‘পৰীক্ষা পে চৰ্চা’ হৈছে এক অনন্য কাৰ্যসূচী যি প্ৰতি বছৰে ব’ৰ্ড পৰীক্ষাৰ পূৰ্বে আয়োজন কৰা হয়। ২০১৮ বৰ্ষত প্ৰধানমন্ত্ৰী নৰেন্দ্ৰ মোদীয়ে এই কাৰ্যসূচীৰ আৰম্ভ কৰে য’ত তেওঁ দেশৰ শিশু, শিক্ষক আৰু অভিভাৱক আৰু অভিভাৱকৰ সৈতে বাৰ্তালাপ কৰে। এই বছৰ, ৩৮ লাখতকৈও অধিক শিক্ষাৰ্থীয়ে এই কাৰ্যসূচীত অংশগ্ৰহণ কৰিবলৈ পঞ্জীয়ন কৰিছে। এই সংখ্যা বিগত বছৰৰ তুলনাত দুগুণতকৈও অধিক।

‘পৰীক্ষা পে চৰ্চা’ কাৰ্যসূচী বিভিন্ন প্লেটফৰ্ম যেনে টুইটাৰ, ফেচবুক আৰু শিক্ষা মন্ত্ৰালয় আৰু প্ৰধানমন্ত্ৰীৰ কাৰ্যালয়ৰ ৱেবছাইটত পোনপটীয়াকৈ সম্প্ৰচাৰ কৰা হ’ব। শিক্ষা মন্ত্ৰালয়ৰ অফিচিয়েল ৱেবছাইট education.gov.in ত এই কাৰ্যসূচীৰ পোনপটীয়া সম্প্ৰচাৰৰ লিংক দিয়া হৈছে। ‘পৰীক্ষা পে চৰ্চা ২০২৩' প্ৰতিযোগিতাৰ বিজয়ীসকলে প্ৰধানমন্ত্ৰী মোদীৰ সৈতে বাৰ্তালাপ কৰাৰ সুযোগ পাব।

কেন্দ্ৰীয় শিক্ষা মন্ত্ৰী ধৰ্মেন্দ্ৰ প্ৰধানে এক সংবাদমেলত কয় যে, তেওঁলোকলৈ এই কাৰ্যসূচীত প্ৰায় ২০ লাখ প্ৰশ্ন আহিছে, যিসমূহক এনচিআৰটিয়ে তালিকাভুক্ত কৰিছে। এই ২০ লাখ প্ৰশ্নত, শিক্ষাৰ্থীসকলে পাৰিবাৰিক চাপ, চাপ ব্যৱস্থাপনা, অন্যায় উপায় প্ৰতিৰোধ, স্বাস্থ্য আৰু কেনেদৰে ফিট থাকিব লাগে, কেৰিয়াৰ বাছনি আদি বিষয়ৰ ওপৰত প্ৰশ্ন কৰিছে।

অসমীয়াত ব্ৰেকিং নিউজ সৰ্বপ্ৰথম News18 অসমীয়াত| শেহতীয়া খবৰ, লাইভ নিউজ আপডেট. সবাতোকৈ বিশ্বাসযোগ্য অসমীয়া নিউজ ৱেবছাইট News18 অসমীয়া|