নতুন সংসদ ভৱন–প্ৰধানমন্ত্ৰী বাসগৃহৰ নিৰ্মাণকাৰ্য স্থগিত ৰাখিবলৈ পত্ৰযোগে মোদীক আহ্বান ১২ বিৰোধী দলৰ নেতাৰ

বুধবাৰে ১২জন বিৰোধী দলৰ নেতাই প্ৰধানমন্ত্ৰী নৰেন্দ্ৰ মোদীলৈ এখন উমৈহতীয়া পত্ৰ প্ৰেৰণ কৰে। ২ পৃষ্ঠাৰ এই পত্ৰত নেতাসকলে প্ৰধানমন্ত্ৰীক সংহাৰী ৰূপ ধাৰণ কৰা কোৰোণা মহামাৰী প্ৰতিৰোধ কৰিবলৈ কেতবোৰ পৰামৰ্শ প্ৰদান কৰে। পত্ৰত কংগ্ৰেছ সভানেত্ৰী ছোনিয়া গান্ধী, প্ৰাক্তন প্ৰধানমন্ত্ৰী এইছ ডি দেৱেগৌৰা আৰু ৰাষ্ট্ৰবাদী কংগ্ৰেছ পাৰ্টীৰ মূৰব্বী শাৰদ পাৱাৰেও স্বাক্ষৰ কৰে। পত্ৰত মোদীক Central Vistaৰ নিৰ্মাণ কাৰ্য স্থগিত ৰাখিবলৈ আহ্বান জনোৱা হয়।

পত্ৰখনত নেতাসকলে প্ৰধানমন্ত্ৰীক সকলো সম্ভাব্য উৎসৰ পৰা ভেকচিন সংগ্ৰহ কৰিবলৈ পৰামৰ্শ প্ৰদান কৰে। লগতে PM Care Fundত জমা হোৱা ধনৰে অধিক অক্সিজেন আৰু ভেকচিন ক্ৰয় কৰিবলৈ আহ্বান জনায়। সকলো নিবনুৱাক ৬০০০ টকাৰ ভাট্টা আৰু দৰিদ্ৰ লোকক খাদ্য যোগান ধৰাৰ সন্দৰ্ভতো পদক্ষেপ ল’বলৈ প্ৰধানমন্ত্ৰীক পৰামৰ্শ দিয়ে ১২ নেতাই।

উল্লেখযোগ্য যে, কেন্দ্ৰীয় চৰকাৰৰে গৃহীত কৰা তিনি কৃষি আইন বাতিল কৰি মহামাৰীৰ সময়ত ‘অন্নদাতা’ সকলক সুৰক্ষা দিয়াৰো দাবী উত্থাপন কৰে নেতাকেইগৰাকীয়ে। এই পত্ৰত জম্মু–কাশ্মীৰৰ প্ৰাক্তন মুখ্যমন্ত্ৰী ফৰুক আব্দুল্লা, উত্তৰ প্ৰদেশৰ প্রাক্তন মুখ্যমন্ত্ৰী অখিলেশ যাদৱ আৰু ভাৰতীয় কমিউনিষ্ট পাৰ্টীৰ ডি ৰাজায়ো স্বাক্ষৰ কৰে।

ইয়াৰ পূৰ্বেও প্ৰাক্তন প্ৰধানমন্ত্ৰী ড০ মনমোহন সিঙে নৰেন্দ্র মোদীলৈ কোৰোণা মহামাৰীৰে মোকাবিলা কৰিবলৈ কিছু পৰামৰ্শ আগবঢ়াই পত্ৰ প্ৰেৰণ কৰিছিল। এই পত্ৰক কিন্তু সহজভাৱে লোৱা নাছিল শাসক দল ভাৰতীয় জনতা পাৰ্টীয়ে। পত্ৰৰ উত্তৰ দি কেন্দ্ৰীয় স্বাস্থ্য মন্ত্ৰীয়ে কংগ্ৰেছক ক্ষুৰধাৰ সমালোচনা কৰিছিল। তেনে পৰিপ্ৰেক্ষিতত এই পত্ৰখনক প্ৰধানমন্ত্ৰীয়ে আৰু শাসক দলটোৱে কেনেধৰণে গ্ৰহণ কৰে সেয়া লক্ষণীয় হ’ব।

উল্লেখযোগ্য যে, Covid-19 মহামাৰীয়ে নতুন দিল্লীত ভয়ংকৰ ৰূপ ধাৰণ কৰি সহস্ৰাধিক লোকৰ প্ৰাণ লোৱাৰ সময়তে সান্ধ্য আইনৰ মাজতো পূৰ্ণ গতিত চলি আছে নতুন প্ৰধানমন্ত্ৰীৰ বাসগৃহ নিৰ্মাণৰ কাম। যদিও দিল্লীত অন্য সকলো নির্মাণকাৰ্য বন্ধ হৈ আছে; এই নিৰ্মাণ কার্যক Essential Service হিচাপে গণ্য কৰি আগবঢ়াই লোৱা যোৱা হৈছে।

এই নিৰ্মাণ কাৰ্যৰ Nodal Agency Central Public Work Department চমুকৈ CPWDয়ে অলপতে জনোৱা মতে, ইতিমধ্যে প্ৰধানমন্ত্ৰীৰ আৰু উপ–ৰাষ্ট্ৰপতিৰ বাসগৃহ নির্মাণৰ কাৰণে কেন্দ্ৰীয় পৰিৱেশ মন্ত্ৰণালয়ৰ তৰফৰ  প্ৰয়োজনীয় অনুমোদন লাভ কৰা হৈছে। নতুন সংসদ ভৱন নির্মাণৰ কাৰণে পূৰ্বতেই এই অনুমোদন লাভ কৰা হৈছিল। বৰ্তমানৰ South Blocৰ প্ৰধানমন্ত্ৰীৰ কাৰ্যালয়ৰ ঠিক পাছফালে নিৰ্মাণ হ’ব প্ৰধানমন্ত্ৰীৰ বাসগৃহ। অন্যহাতেদি North Blocৰ বর্তমানৰ বিত্ত মন্ত্ৰণালয়ৰ সমীপত নিৰ্মাণ হ’ব উপ–ৰাষ্ট্ৰপতিৰ বাসগৃহ।

উল্লেখযোগ্য যে, প্ৰধানমন্ত্ৰীৰ বাসগৃহ আৰু Special Protection Group (SPG) কাৰ্যালয় ভৱনৰ নিৰ্মাণ কাৰ্য সমাপ্ত হ’ব ২০২২ চনৰ ডিচেম্বৰ মাহত। সংসদ ভৱনৰ নির্মাণ কাৰ্য সমাপ্ত হ’ব একে বছৰৰ নৱেম্বৰ মাহত আৰু উপ–ৰাষ্ট্ৰপতিৰ বাসগৃহ নিৰ্মাণ হৈ উঠিব ২০২২চনৰ মে’ মাহত।

গোটেই প্ৰকল্পটোৰ কাৰণে ৰাজকোষৰ ধন ব্যয় হ’ব ১৩,৫০০কোটি টকা। উচ্চতম ন্যায়ালয়েও এই নিৰ্মাণকাৰ্যত সেউজ সংকেত প্ৰদান কৰিছে। বৰ্তমান প্ৰধানমন্ত্ৰীৰ ঠিকনা হৈছে ৭, লোক কল্যাণ মাৰ্গ। পূৰ্বতে এই ৰাস্তাৰ নাম আছিল ৰেচ কোৰ্ছ ৰোড। প্ৰয়াত প্ৰধানমন্ত্ৰী ৰাজীৱ গান্ধীৰ সময়ৰ পৰা এই স্থান প্ৰধানমন্ত্ৰীৰ ঠিকনা হৈ আছে।