ৰাহুল গান্ধীৰ বাটৰ কাঁইট তেওঁ হ’ব নোৱাৰে, সেইকাৰণে মনমোহন সিঙক প্ৰধানমন্ত্ৰী পাতিছিল ছোনীয়া গান্ধীয়ে! গ্ৰন্থত দাবী বাৰাক অ’বামাৰ

নতুন দিল্লীঃ নিজৰ ল’ৰা ৰাহুল গান্ধীৰ ভৱিষ্যত সুৰক্ষিত হৈ থাকিব। সেইকাৰণেই মনমোহন সিঙক প্ৰধানমন্ত্ৰী পাতিছিল ছোনীয়া গান্ধীয়ে। নিজৰ গ্ৰন্থ ‘এ প্ৰমিচড লেণ্ড’ত এই দাবী প্ৰাক্তন মাৰ্কিন ৰাষ্ট্ৰপতি বাৰাক অ’বামাৰ। গ্ৰন্থখনত ৰাহুল গান্ধীক নাৰ্ভাছ ছাত্ৰ তথা অপৰিণত আখ্যা দিছে অ’বামাই।

ৰাষ্ট্ৰপতি থকাৰ সময়ত যিসকল ৰাজনৈতিক নেতাৰ সৈতে কথা–বতৰা হৈছে সেইসকলৰ সন্দৰ্ভত নিজৰ অভিমত গ্ৰন্থখনত তুলি ধৰিছে বাৰাক অ’বামাই। আৰু তাতেই ছোনীয়া, ৰাহুল গান্ধী, মনমোহন সিঙক লৈ নিজৰ মতামত ব্যক্ত কৰিছে প্ৰাক্তন মাৰ্কিন ৰাষ্ট্ৰপতিয়ে। ইয়াৰ পিছতে যথেষ্ট আলোচনা আৰম্ভ হৈছে। অৱশ্যে এই গ্ৰন্থত প্ৰধানমন্ত্ৰী নৰেন্দ্ৰ মোদী সন্দৰ্ভত কোনো কথা কোৱা নাই অ’বামাই।

ডঃ মনমোহন সিঙৰ প্ৰজ্ঞা, ব্যক্তিত্বক ভূয়সী প্ৰশংসা কৰিলেও বাৰাক অ’বামাই এঠাইত লিখিছে, 'একাধিক ৰাজনৈতিক বিশ্লেষকৰ এটাই মত যে ছোনিয়া গান্ধীয়ে মনমোহন সিঙক বাছি লোৱাৰ কাৰণ এটাই আছিল যে তেওঁ এজন প্ৰৱীণ শিখ তথা তেওঁৰ নিজৰ কোনো ৰাজনৈতিক ভিত্তি নাই। ফলত ৰাহুল গান্ধীৰ কাৰণে ভৱিষ্যতে কোনো ধৰণৰ সমস্যাৰ সৃষ্টি নহ’ব। সেই সময়ত চল্লিশ বছৰীয়া ৰাহুল গান্ধীক কংগ্ৰেছ দলৰ দায়িত্ব লোৱাৰ কাৰণে প্ৰস্তুত কৰিছিল ছোনীয়া গান্ধীয়ে।'

মনমোহন সিঙৰ ঘৰত এটা নৈশভোজত অংশ লোৱাৰ কথাও উল্লেখ কৰিছে বাৰাক অ’বামাই। য’ত ছোনীয়া তথা ৰাহুল গান্ধীও উপস্থিত আছিল। মনমোহন সিঙে প্ৰধানমন্ত্ৰীৰ পদ ত্যাগ কৰাৰ পিছত ৰাহুলক সেই পদত বহুৱাব নে নাই তাক লৈও মনত কৌতুহল থকাৰ কথা নিজৰ গ্ৰন্থত স্বীকাৰ কৰিছে অ’বামাই।

মনমোহন সিঙক প্ৰশংসা কৰি অ’বামাই লিখিছে, ২০০৯ বৰ্ষত মুম্বাই আক্ৰমণৰ পিছত পাকিস্তানত ওলোটাই আক্ৰমণৰ একাধিক প্ৰস্তাৱ পালেও সংযম দেখুৱাইছিল মনমোহন সিঙে৷ কাৰণ তেওঁ বিশ্বাস কৰিছিল দেশত মুছলিম বিৰোধী আৱেগক প্ৰশ্ৰয় দিলে বিজেপিৰে সুবিধা হ’ব।