NSCN-Kত সামৰিক উত্থান! হেড কোৱাৰ্টাৰ এৰি পলাল অধ্যক্ষ ন্যামলাং, সেনাধ্যক্ষ নিকি আৰু সাধাৰণ সম্পাদক ষ্টাৰচন

৩৭ দিনীয়া এখন নাটকৰ অৱসান ঘটিল ম্যানমাৰৰ গভীৰ জংঘলত৷ য়ুং আঙ নেতৃত্বাধীন NSCN-Kত বিভাজন আনি নিজাকৈ এটা গোট গঠন কৰিছিল নিকি ছুমি আৰু ষ্টাৰছনে ৷ অধ্যক্ষ হিচাপে নিযুক্তি দিছিল ন্যামলাং কন্যাকক ৷ সেয়া আছিল বিগত ২৮ জুলাইৰ ঘটনা ৷ কিন্তু পিছদিনা অৰ্থাৎ ২৯ জুলাইৰ দিনা য়ুং আঙ নেতৃত্বাধীন মূল NSCN-Kএ ন্যামলাং-নিকি-ষ্টাৰছনক সংগঠন বিৰোধী কাৰ্যত লিপ্ত হোৱাৰ অভিযোগত বহিস্কাৰ কৰে ৷ এই বহিস্কৃত গোটটোৰ হেড কোৱাৰ্টাৰ এতিয়া দখল কৰিলে য়ুং আঙ নেতৃত্বাধীন NSCN-Kএ ৷



বৃহস্পতিবাৰে বিয়লি ভাগৰে পৰা চলা এক অভিযানত ন্যামলাং গোটৰ হেড কোৱাৰ্টাৰ আৰু সকলো অধ্যুষিত অঞ্চল নিজ দখললৈ নিয়ে য়ুং আঙে ৷ ইমানেই নহয়, য়ুং আঙ গোটৰ সন্মুখত তিস্তিব নোৱাৰি অধ্যক্ষ ন্যামলাং কন্যাক, সাধাৰণতে সম্পাদক ষ্টাৰছন আৰু সেনাধ্যক্ষ নিকি ছুমিয়ে সৰ্তীথ পাঁচজনীয়া এটা দলৰ সৈতে পলায়ন কৰে ৷

যুদ্ধক্ষেত্ৰ এৰি অধ্যক্ষ, সাধাৰণ সম্পাদক আৰু খোম সেনাধ্যক্ষ নিকি ছুমিয়ে পলায়ন কৰাৰ লগে লগে গোটটোৰ সকলো নেতা-কেডাৰে যোগদান কৰে য়ুং আঙ গোটত ৷ ন্যামলাং গোটত থকা দ্বিতীয় আৰু তৃতীয় বিগ্ৰেডে এই ঘটনাৰ পূৰ্বে য়ুং আঙ গোটত যোগ দিয়াৰ সিদ্ধান্ত লৈছিল ৷

ম্যানমাৰৰ যুদ্ধক্ষেত্ৰ এৰি পলায়ন কৰা ন্যামলাং-নিকি-ষ্টাৰছনৰ বৰ্তমানৰ অৱস্থিতি জানিব পৰা হোৱা নাই ৷ লংৱাৰ এক সুত্ৰই সদৰি কৰা মতে পলাতক তিনি নেতাই খাংগু কন্যাক নেতৃত্বাধীন গোটত যোগ দিব ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।