'মুখ বন্ধ' ৰাখিব লাগিব অৱসৰপ্ৰাপ্ত কৰ্মচাৰীয়ে! মুখ খুলিলেই সংশোধিত Pension Rulesৰ অধীনত বন্ধ হ'ব পেন্সন

বিজেপি নেতৃত্বাধীন কেন্দ্ৰীয় চৰকাৰে সংশোধন কৰিছে পেন্সনৰ নিয়ম। চৰকাৰে অসামৰিক কৰ্মচাৰীসকলৰ বাবে দেশৰ আভ্যন্তৰীণ সুৰক্ষাৰ প্ৰতি লক্ষ্য ৰাখি গ্ৰহণ কৰিছে এই সিদ্ধান্ত। ইয়াৰ লগতে নিৰাপত্তা আৰু চোৰাংচোৱা সংস্থাৰ অৱসৰপ্ৰাপ্ত বিষয়াসকলে তেওঁলোকৰ সংগঠনৰ মুৰব্বীৰ অনুমোদন অবিহনে প্ৰতিষ্ঠানটোৰ সৈতে সম্পৰ্কিত কোনো কথা প্ৰকাশ কৰিব নোৱাৰিব। যদি তেওঁলোকে অনুমতি অবিহনে এনে কোনো কাৰ্যত লিপ্ত হয়, তেতিয়া তেওঁলোকৰ পেন্সন বন্ধ ৰখা হ'ব।

বিষয়াসকলে সিদ্ধান্ত ল'ব সমলসমূহ সংবেদনশীল হয় নে নহয়

পেন্সন নিয়মৰ (Pension Rules) সংশোধন অনুসৰি প্ৰকাশনৰ বাবে প্ৰস্তাৱিত সামগ্ৰী সংবেদনশীল নে অসংবেদনশীল সেয়া সিদ্ধান্ত লোৱাৰ অধিকাৰ দায়বদ্ধ বিষয়াৰ হাতত থাকিব। লগতে সমলটো সংগঠনৰ ক্ষেত্ৰৰ অধিকাৰত পৰে নে নাই সেয়াও লক্ষ্য কৰা হ'ব। অৰ্থাৎ সংশ্লিষ্ট সংগঠনৰ মুৰব্বীসকলে এইটো ঠিৰাং কৰিব যে প্ৰকাশনৰ বাবে বিষয়টো সংবেদনশীল হয় নে নহয়।

এই নিয়মবোৰ কি জানি লওক?

কেন্দ্ৰীয় অসামৰিক সেৱা (পেন্সন) নিয়ম, ১৯৭২ সংশোধন কৰি ডিঅ'পিটি (DOPT)এ এটা ধাৰা অন্তৰ্ভুক্ত কৰিছে। ইয়াত এইটো কোৱা হৈছে যে অৱসৰ সন্দৰ্ভত আৰটিআই আইনৰ দ্বিতীয় অনুসূচীত অন্তৰ্ভুক্ত সংগঠনত কাম কৰা কৰ্মচাৰীসকলক সংগঠনটোৰ মুৰব্বীৰ আগতীয়া অনুমোদন অবিহনে সংগঠনটোৰ ক্ষেত্ৰৰ সৈতে সম্পৰ্কিত একো প্ৰকাশ কৰিবলৈ অনুমতি দিয়া নহ'ব।

এই নিয়মবোৰ এনে প্ৰতিষ্ঠানসমূহৰ বাবে প্ৰযোজ্য হ'ব:

সংশোধিত নিয়ম চোৰাংচোৱা সংগঠন, গৱেষণা আৰু বিশ্লেষণ শাখা, কেন্দ্ৰীয় অৰ্থনৈতিক চোৰাংচোৱা সংস্থা, প্ৰৱৰ্তন সঞ্চালকালয়, নাৰ্কোটিক্স নিয়ন্ত্ৰণ ব্যুৰো, চিবিআই (CBI), ৰাজহ চোৰাংচোৱা সঞ্চালকালয়, বিমান গৱেষণা কেন্দ্ৰ, বিশেষ সীমান্ত বাহিনী, সীমান্ত সুৰক্ষা বাহিনী, ভাৰত-তিব্বত সীমান্ত আৰক্ষী, কেন্দ্ৰীয় ঔদ্যোগিক সুৰক্ষা বাহিনী, ৰাষ্ট্ৰীয় সুৰক্ষা বাহিনী, অসম ৰাইফলছ, বিশেষ শাখা (CID), আন্দামান আৰু নিকোবৰ, অপৰাধ শাখা-চিআইডি-চিবি, প্ৰতিৰক্ষা গৱেষণা আৰু উন্নয়ন সংস্থা, সীমান্ত পথ উন্নয়ন বোৰ্ড আৰু বিত্তীয় চোৰাংচোৱা গোটৰ প্ৰতিষ্ঠানসমূহৰ কৰ্মচাৰীসকলৰ ওপৰত কাৰ্যকৰী হ'ব।