১২ বছৰে বঢ়োৱা নাই নিজৰ দৰমহা, যোৱা বছৰত কিমান টকা দৰমহা পাইছিল ৰিলায়েন্স ইণ্ডাষ্ট্ৰীজৰ অধ্যক্ষ মুকেশ আম্বানীয়ে?

ভাৰতৰ আটাইতকৈ ধনী ব্যক্তি মুকেশ আম্বানীয়ে যোৱা ১২ বছৰ ধৰি নিজৰ দৰমহা বৃদ্ধি কৰা নাই। যোৱা ১২ বছৰ ধৰি বাৰ্ষিক ১৫ কোটি টকা দৰমহা লৈ আহিছে ৰিলায়েন্স ইণ্ডাষ্ট্ৰীজৰ অধ্যক্ষগৰাকীয়ে। ইয়াৰ মাজতে কোৰোণা ভাইৰাছৰ সংক্ৰমণলৈ চাই যোৱা ৩১ মাৰ্চত এই দৰমহাও নোলোৱাৰ সিদ্ধান্ত ঘোষণা কৰে।

২০০৮-০৯ বিত্তীয় বৰ্ষৰ পৰা মুকেশ আম্বানীয়ে নিজৰ দৰমহা ১৫ কোটিকৈ লৈ আহিছে। কিন্তু একে সময়তে অন্যান্য প্ৰতিষ্ঠানৰ মুৰব্বীয়ে বৃদ্ধি কৰিছে নিজৰ দৰমহা। তাৰে ভিতৰত নিজৰ সম্বন্ধীয় নিখিল, হিটাল মেছৱানীয়ে বিত্তীয় বৰ্ষৰ শেষত বৃদ্ধি কৰিছে নিজৰ দৰমহা।

কোৰোণা ভাইৰাছৰ ভয়াৱহতা শেষ নোহাৱা পৰ্যন্ত দৰমহা নলয় বুলি স্ব ইচ্ছাৰে মুকেশ আম্বানীয়ে বৰ্ড অৱ ডিৰেক্টৰছক জনাইছে।

যিসময়ত মুকেশ আম্বানীয়ে দৰমহা নোলোৱাৰ সিদ্ধান্ত গ্ৰহণ কৰিছে, সেই সময়তে এপ্ৰিলৰ শেষত নিৰ্দিষ্ট পৰিমাণৰ মোটা দৰমহা আদায় কৰা কোম্পানীৰ একাংশ বিষয়াৰ ১০-৫০ শতাংশ দৰমহা কৰ্তন কৰাৰ সিদ্ধান্ত গ্ৰহণ কৰা হৈছিল।