ভাৰতৰ কোনো অংশ দখল কৰা নাই চীনে, সেনাক পূৰ্ণ স্বাধীনতা দিয়া হৈছে, সৰ্বদলীয় বৈঠকত ক’লে প্ৰধানমন্ত্ৰীয়ে

ভাৰতৰ কোনো অংশ দখল কৰা নাই চীনে। লাডাখৰ সন্দৰ্ভত আয়োজন কৰা সৰ্বদলীয় বৈঠকত এনেদৰে ক’লে প্ৰধানমন্ত্ৰী নৰেন্দ্ৰ মোদীয়ে। লগতে প্ৰধানমন্ত্ৰীয়ে কয় যে, ‘সীমান্তৰ নিৰাপত্তা প্ৰদান কৰিবলৈ সক্ষম ভাৰতীয় সেনা। তেওঁলোকৰ ওপৰত দেশবাসীৰ সম্পূৰ্ণ বিশ্বাস আছে। কোনো বাহিৰা শত্ৰুৰ চাপ সহ্য নকৰে ভাৰতে।’

দেশৰ সুৰক্ষাৰ বাবে যি যি কৰণীয় আছে, সকলো কৰা হ’ব বুলিও বৈঠকত জনালে প্ৰধানমন্ত্ৰী নৰেন্দ্ৰ মোদীয়ে। লগতে প্ৰধানমন্ত্ৰীয়ে জনাই যে, ‘পৰিস্থিতি অনুযায়ী পদক্ষেপ ল’বলৈ সেনা-বাহিনীক পূৰ্ণ স্বাধীনতা প্ৰদান কৰা হৈছে।’

#WATCH Neither have they intruded into our border, nor has any post been taken over by them (China). 20 of our jawans were martyred, but those who dared Bharat Mata, they were taught a lesson: PM Narendra Modi at all-party meet on India-China border issue pic.twitter.com/tWojnnrLOY

— ANI (@ANI) June 19, 2020

উল্লেখযোগ্য যে, লাডাখৰ শেহতীয়া পৰিস্থিতিৰ সন্দৰ্ভত প্ৰধানমন্ত্ৰীয়ে আহ্বান জনোৱা সৰ্বদলীয় বৈঠকত সকলো বিৰোধী দলে চৰকাৰক সহযোগিতা আগবঢ়োৱাৰ কথা ঘোষণা কৰিলে। যদিও প্ৰত্যাশিত ভাবেই চৰকাৰৰ আগত বহু কেইটা প্ৰশ্ন দাঙি ধৰিছে কংগ্ৰেছ সভানেত্ৰী ছোনিয়া গান্ধীয়ে। শুকুৰবাৰে কংগ্ৰেছ, তৃণমুল কংগ্ৰেছ, শিৱসেনাৰ লগতে প্ৰায় ২০ টা বিৰোধী দলৰ নেতাৰ সৈতে লাডাখৰ পৰিস্থিতি সন্দৰ্ভত বৈঠকত বহিল প্ৰধানমন্ত্ৰী নৰেন্দ্ৰ মোদী।

লাডাখৰ পৰিস্থিতি সন্দৰ্ভত আলোচনা কৰিবলৈ শুকুৰবাৰে বিয়লি সৰ্বদলীয় বৈঠকৰ আহ্বান জনাইছিল প্ৰধানমন্ত্ৰী নৰেন্দ্ৰ মোদীয়ে। কংগ্ৰেছ সভানেত্ৰী ছোনিয়া গান্ধী, পশ্চিমবংগৰ মুখ্যমন্ত্ৰী মমতা বেনাৰ্জীৰ লগতে উদ্ধৱ থাকৰে, এম কে ষ্টেলীন, সীতাৰাম ইয়েচুৰী, নিতিশ কুমাৰ, জগন মোহন ৰেড্ডী, এন চন্দ্ৰবাবু নাইডু, শৰদ পাৱাৰ, অখিলেশ যাদৱৰ দৰে নেতাই ভাগ লয় বৈঠকত।