Maharashtra Political Crisis : গুৱাহাটীৰ হোটেলত মহাৰাষ্ট্ৰৰ ৰাজনীতিৰ হাইভ’ল্টেজ খেল, সিন্দেই ক’লে – ‘তেওঁলোকৰ ভৰিৰ তলৰ মাটি খহিছে’

গুৱাহাটীৰ হোটেল ৰেডিছন ব্লুত চলিছে মহাৰাষ্ট্ৰ চৰকাৰ ভঙা–পতাৰ হাইভ’ল্টেজ খেল। বিগত তিনিদিন ধৰি একনাথ সিন্দেৰ নেতৃত্বত গুৱাহাটীত বাহৰ পাতিছে বিসম্বাদী মহাৰাষ্ট্ৰৰ বিধায়কৰ দলে। এই বিসম্বাদৰ ফলত এতিয়া গভীৰ সংকটত মহাৰাষ্ট্ৰ চৰকাৰ।

ইয়াৰ মাজতে একনাথ সিন্দেই এক টেলিফোনিক বাৰ্তালাপত কয়, ‘‘তেওঁলোকৰ ভৰিৰ তলৰ মাটি খহিছে। তেওঁলোকে নিজে ভয় খাইছে আৰু আনক ভয় খুৱাব বিচাৰিছে। তেওঁলোকে মোৰ পৰিয়ালৰ লোককো ভাবুকি দিছে। ১২জন বিধায়কৰ চহী লৈ তেওঁলোকে কাক ভাবুকি দিছে।’’

নিজৰ হাতত সংখ্যা থকাৰ দাবী কৰি সিন্দেই কয়, ‘‘আমাৰ বিৰুদ্ধে তেওঁলোকে কি ব্যৱস্থা ল’ব পাৰে? আমিহে তেওঁলোকৰ বিৰুদ্ধে ব্যৱস্থা ল’ম। আমাৰ হাতত সংখ্যা আছে। আমি মেজৰিটী তেওঁলোক মাইনৰিটী। এই মুহূৰ্তত মুঠ ৫০জন বিধায়কৰ সমৰ্থন আছে। বিধায়কৰ সংখ্যা আৰু বাঢ়িব।’’

কোনো বিধায়কক হেঁচা বা ভাবুকি দিয়া হোৱা নাই বুলিও টেলিফোনিক বাৰ্তালাপত উল্লেখ কৰে সিন্দেই। তেওঁ কয়, আমি বালাচাহেব থাকৰেৰ হিন্দুত্বৰ আদৰ্শ আগুৱাই নিব বিচাৰো।