মধ্যপ্ৰদেশ উচ্চ ন্যায়ালয়ৰ তাৎপৰ্যপূৰ্ণ ৰায়: খঙত উচ্চাৰণ কৰা শব্দবোৰক আত্মহত্যাৰ বাবে উদগনি হিচাপে গণ্য কৰিব নোৱাৰি

খঙত উচ্চাৰণ কৰা শব্দবোৰক আত্মহত্যাৰ বাবে উদগনি হিচাপে গণ্য কৰিব নোৱাৰি। এক গোচৰৰ শুনানিৰ সময়ত এই তাৎপৰ্যপূৰ্ণ ৰায় প্ৰদান কৰিছে মধ্য প্ৰদেশ উচ্চ ন্যায়ালয়ে। জানিব পৰা মতে, ২০২০ চনৰ ২৯ অক্টোবৰত দামোহ জিলাৰ পাথাৰিয়াৰ মুৰাট লোধিয়ে ঘৰত কীটনাশক সেৱন কৰি আত্মহত্যা কৰা ঘটনা সন্দৰ্ভত চলা গোচৰ সংক্ৰান্তত উচ্চ ন্যায়ালয়ে কৃষকজনক আত্মহত্যাত উদগনি দিয়াৰ অভিযোগত অভিযুক্ত তিনিজন লোকৰ বিৰুদ্ধে জিলা আদালতত চলি থকা কাৰ্যক্ৰম বাতিল কৰিছে।

দ্য টাইমছ অৱ ইণ্ডিয়াত প্ৰকাশিত এক প্ৰতিবেদন অনুসৰি, মৃত্যুৰ পূৰ্বে মুৰাট লোধি নামৰ এজন ব্যক্তিয়ে তেওঁক লাঠিৰে আক্ৰমণ কৰি দুৰ্ব্যৱহাৰ কৰিছিল বুলি অভিযোগ কৰিছিল। মুৰাটে কৈছিল যে তেওঁ এই সন্দৰ্ভত পাথাৰিয়া আৰক্ষী থানাত এখন এজাহাৰো দাখিল কৰিছিল। যেতিয়া তেওঁ আৰক্ষীৰ অভিযোগ দাখিল কৰি ঘৰলৈ উভতি আহিছিল, ৰাজেন্দ্ৰ লোধি আৰু ভানু লোধিয়ে তেওঁক আপোচ কৰিবলৈ হেঁচা দিছিল। তেওঁ কৈছিল যে যদি তেওঁ চুক্তিত সন্মত নহয় তেন্তে তেওঁলোকে তেওঁক ভয়ানক পৰিণামৰ ভাবুকি দিছিল।

পৰৱৰ্তীকালত ব্যক্তিজনে আত্মহত্যাৰ পথ বাচি লৈছিল আৰু ইয়াৰ ভিত্তিত, আৰক্ষীয়ে মুৰাট লোধিৰ আত্মহত্যাত উদগনি দিয়াৰ বাবে আইপিচিৰ ৩০৬ আৰু ৩৪ ধাৰাৰ অধীনত ৰাজেন্দ্ৰ, ভূপেন্দ্ৰ আৰু ভানুৰ বিৰুদ্ধে এটা গোচৰ ৰুজু কৰিছিল।

উল্লেখ্য যে, নিম্ন আদালতে অভিযোগ গঠন কৰাৰ পিছত, তিনিওজন অভিযুক্তই অভিযোগ বাতিল কৰিবলৈ উচ্চ ন্যায়ালয়ৰ কাষ চাপিছিল। ন্যায়াধীশ সুজয় পলৰ নেতৃত্বত এখন বিচাৰপীঠে দুয়োপক্ষৰ শুনানিৰ পিছত একে ধৰণৰ গোচৰত উচ্চতম ন্যায়ালয়ৰ পূৰ্বৰ আদেশৰ কথা উল্লেখ কৰে আৰু কয় যে কাৰোবাৰ আত্মহত্যাক উদগনি দিয়াটো এক "মানসিক প্ৰক্ৰিয়া"। আদালতে কয় যে "যদি এজন ব্যক্তিয়ে মৌখিকভাৱে উৎপীড়ন কৰে বা ভাবুকি দিয়ে, খঙত উচ্চাৰণ কৰা শব্দবোৰ ব্যক্তি বা ব্যক্তিৰ এটা গোটৰ বিৰুদ্ধে আত্মহত্যাৰ অভিযোগ ৰখাৰ বাবে উপযুক্ত গোচৰ নহয়"।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।