বিমানত হঠাৎ শ শ মৌ–মাখিৰ খুন্দা! কলকাতা বিমানবন্দৰত অভাৱনীয় ঘটনা, চাওক VIDEO

কলকাতাঃ কলকাতা বিমানবন্দৰত ‘অবাঞ্চিত অতিথি’! জাকে জাকে মৌ–মাখিৰ দলৰ আক্ৰমণত দিশহাৰা অৱস্থা বিমানবন্দৰৰ কৰ্মচাৰীৰ। সোমবাৰে বিয়লি সংঘটিত হয় এই ঘটনা। ভিস্তাৰা এয়াৰলাইন্সৰ এখন এয়াৰবাছ–৩২০ বিমানৰ ককপিটৰ ঠিক পিছফালে মহা আয়াসত বহা মৌ–মাখিৰ দলটোৱে ব্যতিব্যস্ত কৰি তোলে বিমান বন্দৰৰ কৰ্মীসকলক। জনায় প্ৰত্যক্ষদৰ্শীসকলে।

কলকাতা বিমানবন্দৰৰ বিমানৰ গাত মৌ–মাখিৰ খুন্দাৰ ফলত বিমানখনৰ উৰণত যথেষ্ট পলম হয়। সোমবাৰে বিয়লি চাৰিটা বজাত সংঘটিত হয় এই ঘটনা। বিমানখন উৰাৰ কথা আছিল সন্ধিয়া ৫বজাত। কিন্তু সেয়া শেষপৰ্যন্ত নহয়গৈ। প্ৰায় এঘণ্টা পিছতহে বিমানখন গন্তব্য স্থানলৈ যায়। ছচিয়েল মিডিয়াত ঘটনাৰ ভিডিও যোৱাৰ লগে লগে ভাইৰেল হৈ পৰে। শ–শ মৌ–মাখি একে সময়তে উৰি সকলোকে চমকাই তোলে। মৌ–মাখি খেদিবলৈ অৱশেষত দমকলৰ গাড়ী ব্যৱহাৰ কৰিব লগীয়া হয়। উচ্চ ক্ষমতাসম্পন্ন পানীৰ জেট ব্যৱহাৰ কৰি বিমানৰ পৰা মৌ–মাখিৰ জাকটো এৰুৱাই দমকল বাহিনীয়ে।

Looks like honey pancakes inside 🧇

Kolkata yesterday. @airvistara 🛫 pic.twitter.com/Pu7ydGt8bY

— Tarun Shukla (@shukla_tarun) November 30, 2020

বিমানবন্দৰ কৰ্তৃপক্ষৰ মতে, কলকাতা বিমানবন্দৰত কিছু পুৰণি হেঙাৰ আছে। সেইসমূহৰ ছাদত মৌ–মাখিৰ বাঁহ প্ৰায়েই দেখা যায়। ইয়াৰ পূৰ্বে ইয়াৰ ইণ্ডিয়াৰ এখন বিমানত মৌ–মাখিৰ জাকে এনেকৈয়ে আক্ৰমণ কৰিছিল। এইবছৰ সেই একেই কাম ভিস্তাৰা বিমানত ঘটিল। মাজে মাজে মৌ–মাখি দৰজাৰ ফাঁকেৰে বিমানৰ ভিতৰতো সোমাই পৰে। যাৰ কাৰণেই বাৰুকৈ অস্বস্তিত পৰে যাত্ৰী তথা বিমানকৰ্মীসকল।