কৃষকৰ বাবে আজি ৰাজপথত নামিব ৰাহুল গান্ধী, ৰাষ্ট্ৰপতি ভৱনলৈ কংগ্ৰেছে উলিয়াব সমদল

নতুন কৃষি আইনৰ বিৰুদ্ধে দিল্লীত অব্যাহত আছে কৃষকৰ আন্দোলন। ইয়াৰ মাজতে আজি কংগ্ৰেছ নেতা ৰাহুল গান্ধীয়ে কৃষকৰ পক্ষত পুৱা ১০.৪৫ বজাত বিজয় চ’কৰ পৰা ৰাষ্ট্ৰপতি ভৱনলৈ সমদল উলিয়াব। ৰাহুল গান্ধীৰ নেতৃত্বত আন কংগ্ৰেছী সাংসদেও এই সমদলত অংশগ্ৰহণ কৰিব। সমদলৰ অন্তত ৰাহুল গান্ধী আৰু কংগ্ৰেছৰ আন জ্যেষ্ঠ নেতাসকলে ৰাষ্ট্ৰপতি ৰামনাথ কোবিন্দক সাক্ষাৎ কৰিব আৰু ২ কোটি হস্তাক্ষৰ সম্বলিত স্মাৰকপত্ৰ প্ৰদান কৰিব। ইয়াৰ দ্বাৰা কেন্দ্ৰীয় কৃষি আইন বাতিল কৰাৰ দাবী জনোৱা হ’ব।

কে চি বেণুগোপালে এক বিবৃতিত অভিযোগ কৰিছে যে কেন্দ্ৰীয় চৰকাৰে প্ৰথমে কৃষি বিৰোধী আইন বনাই কৃষকক আঘাত দিছে আৰু এতিয়া তেওঁৰ মন্ত্ৰীয়ে অন্নদাতাসকলক অপমান কৰিছে। তেওঁ কয়, কৃষি বিৰোধী আইনক লৈ চলি থকা আন্দোলনক আগবঢ়াই নিবলৈ আৰু শক্তিশালী কৰাৰ বাবে কংগ্ৰেছে আইনৰ বিৰুদ্ধে ৰাষ্ট্ৰজোৰা হস্তাক্ষৰ অভিযান আৰম্ভ কৰিছিল। এই আইন বাতিল কৰাৰ পক্ষত প্ৰায় ২ কোটি লোকৰ হস্তাক্ষৰ সংগ্ৰহ কৰা হৈছে।