কাৰ্যকাল বৃদ্ধিৰ পিছত জে পি নাড্ডাৰ প্ৰথম পশ্চিমবংগ ভ্ৰমণ; আজি নাদিয়াত অংশ ল'ব বিশাল জনসভাত

ভাৰতীয় জনতা পাৰ্টিৰ ৰাষ্ট্ৰীয় অধ্যক্ষ জে পি নাড্ডা বৃহস্পতিবাৰে কলকাতাত উপস্থিত হৈছে। বিজেপিৰ ৰাষ্ট্ৰীয় অধ্যক্ষগৰাকীয়ে আজি নাদিয়া জিলাত এখন বিশাল ৰাজহুৱা সভা সম্বোধন কৰাৰ কথা আছে। তেওঁ প্ৰথমে ৰাতিপুৱা মায়ানপুৰৰ ইস্কন মন্দিৰত প্ৰাৰ্থনা কৰে, তাৰ পিছত দুপৰীয়া প্ৰায় ১২ বাজি ৩০ মিনিটত এখন ৰাজহুৱা সভা অংশগ্ৰহণ কৰিব। এই ভ্ৰমণকালত তেওঁ বিজেপি দলৰ বহু নেতাকো সাক্ষাৎ কৰিব। উল্লেখ্য যে, পশ্চিমবংগত কম সময়ৰ ভিতৰতে পঞ্চায়ত নিৰ্বাচন অনুষ্ঠিত হ'ব, ইয়াৰ উপৰিও অহা বছৰ লোকসভা নিৰ্বাচন অনুষ্ঠিত হ'ব। ইয়াৰ পৰিপ্ৰেক্ষিতত জে পি নাড্ডাৰ পশ্চিমবংগ ভ্ৰমণে তাৎপৰ্য বহন কৰিছে।

বিজেপি অধ্যক্ষৰূপে কাৰ্যকাল ডেৰ বছৰ লৈ বৃদ্ধি হোৱাৰ পিছত এইটো জে পি নাড্ডাৰ প্ৰথম ৰাজ্য ভ্ৰমণ। মন কৰিবলগীয়া যে, ১৬ আৰু ১৭ জানুৱাৰীত ৰাজধানীত দিল্লীত অনুষ্ঠিত বিজেপিৰ ৰাষ্ট্ৰীয় কাৰ্যনিৰ্বাহক সভাত বিজেপিৰ ৰাষ্ট্ৰীয় অধ্যক্ষ হিচাপে জে পি নাড্ডাৰ কাৰ্যকাল ২০২৪ চনৰ জুন লৈকে বৃদ্ধি কৰাৰ সিদ্ধান্ত লোৱা হয়, যিটো কেন্দ্ৰীয় গৃহ মন্ত্ৰী অমিত শ্বাহে ঘোষণা কৰিছিল। অমিত শ্বাহে কৈছিল যে জে পি নাড্ডাৰ সম্প্ৰসাৰণৰ প্ৰস্তাৱটো কেন্দ্ৰীয় প্ৰতিৰক্ষা মন্ত্ৰী ৰাজনাথ সিঙে প্ৰস্তাৱ দিছিল আৰু ৰাষ্ট্ৰীয় কাৰ্যনিৰ্বাহকৰ সকলো সদস্যই সৰ্বসন্মতিক্ৰমে ইয়াত সন্মত হৈছিল।

মোহন ভাগৱতে কলকাতা ভ্ৰমণ কৰিব-

ইফালে, নেতাজী সুভাষ চন্দ্ৰ বসুৰ জন্মজয়ন্তী উপলক্ষে ২৩ জানুৱাৰীত কলকাতাৰ শ্বহীদ মিনাৰ খেলপথাৰত ৰাষ্ট্ৰীয় স্বয়ংসেৱক সংঘৰ (আৰ এছ এছ) মুৰব্বী মোহন ভাগৱতেও এখন ৰাজহুৱা সভা সম্বোধন কৰিব। ২৩ জানুৱাৰীত আৰএছএছ মুৰব্বীজনে নেতাজী সুভাষ চন্দ্ৰ বসুৰ ১২৬ তম জন্ম জয়ন্তী উপলক্ষে সংগঠনটোৱে আয়োজিত এক অনুষ্ঠানত অংশগ্ৰহণ কৰিব, য'ত তেখেতে নাগৰিকত্ব সংশোধনী আইন, জন্ম নিয়ন্ত্ৰণ বিধেয়কৰ দৰে সংবেদনশীল বিষয়ত গুৰুত্বপূৰ্ণ বাৰ্তা প্ৰদান কৰিব বুলি আশা কৰা হৈছে। এই সভাৰ প্ৰস্তুতি পূৰ্ণ গতিত চলি আছে। সংঘৰ সূত্ৰ অনুসৰি, মোহন ভাগৱতে নেতাজীৰ আদৰ্শ, দৃষ্টিভংগী আৰু দেশৰ স্বাধীনতাৰ বাবে তেওঁ কেনেদৰে যুঁজিছিল তাৰ বিষয়ে আলোকপাত কৰিব। এই কাৰ্যসূচীত সমগ্ৰ ৰাজ্যৰ পৰা হাজাৰ হাজাৰ স্বেচ্ছাসেৱকে অংশগ্ৰহণ কৰিব।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।