বহু কংগ্ৰেছীৰ পাখি কাটিবলৈ অসমলৈ আহি আছে জীতেন্দ্ৰ সিং

ৰাহুল গান্ধীৰ সৈতে একেলগে উঠা-বহা কৰে অসম কংগ্ৰেছৰ দায়িত্ব লাভ কৰা জীতেন্দ্ৰ সিঙে ৷  ৰাহুলৰ অতি বিশ্বাসী বন্ধু জীতেন্দ্ৰ সিঙৰ ওপৰতে এতিয়া অসম প্ৰদেশৰ দায়িত্ব অৰ্পণ কৰা হৈছে ৷ ৰাহুলে গান্ধীয়েও ভালকৈ জানে যে,  তেওঁৰ অন্যতম বিদ্বেষী হিমন্ত বিশ্ব শৰ্মাৰ গৃহ ৰাজ্য অসমত কংগ্ৰেছৰ পুনৰুদ্ধাৰৰ বাবে লাগিব নতুন কৌশল ৷ সেই হিচাপতে ৰাহুলৰ ৰণনীতি মতে অসমৰ দায়িত্ব দিয়া হ'ল জীতেন্দ্ৰ সিঙক ৷ কিন্তু জীতেন্দ্ৰ সিঙে পুনৰুদ্ধাৰ কৰিব পাৰিবনে কংগ্ৰেছক?

আমাৰ হাতত পৰা তথ্য মতে, অক্টোবৰৰ পহিলা সপ্তাহত অসমলৈ আহিব জীতেন্দ্ৰ সিং ৷ অসমৰ দায়িত্ব লাভ কৰাৰ পিছতে জীতেন্দ্ৰ সিঙে অসমত নিয়োগ কৰে তেৰজনীয়া এটা বিশেষ দল ৷ দলটোৱে ছাৰ্ভে কৰিলে ৰাজ্য খনত কংগ্ৰেছ দলৰ অৱস্থাৰ সন্দৰ্ভত। আনকি তেৰজনীয়া দলটোৱে ইতিমধ্যে প্ৰতিবেদনো দাখিল কৰিছে জীতেন্দ্ৰ সিঙক ৷ খবৰ মতে, জীতেন্দ্ৰ সিং সন্তুষ্ট নহয় প্ৰদেশ কংগ্ৰেছৰ কেতবোৰ কাৰ্য্যত ৷

ইপিনে গুৱাহাটীৰ ৰাজীৱ ভৱনত চলিছে ব্যাপক প্ৰস্তুতি ৷ জীতেন্দ্ৰ সিঙৰ ফটো সম্বলিত  বেনাৰ আৰু হৰ্ডিং অঁৰা হৈছে ৰাজীৱ ভৱনত ৷ ৰাজীৱ ভৱনত এতিয়া তৰুণ গগৈ, ৰাহুল গান্ধী, ৰিপুণ বৰা আৰু দেৱব্ৰত শইকীয়াৰ ফটোৰ লগত আৰি দিয়া হৈছে অসমৰ দায়িত্ববাহী জীতেন্দ্ৰ সিঙৰ ফটো ৷ মুঠতে নতুন দায়িত্ববাহী সিঙক আদৰিবলৈ সাজু অসম প্ৰদেশ কংগ্ৰেছ ৷ পিছে- APCCৰ কেতবোৰ কাৰ্যত অসন্তুষ্ট সিঙে অসমলৈ আহি পাখি কাটিব বহু কেইজন জ্যেষ্ঠ নেতাৰ ৷ AICCৰ শীৰ্ষ সুত্ৰই সদৰি কৰা মতে, বিসম্বাদী নেতাক নাকী লগাবলৈ সাজু জিতেন্দ্ৰ সিং।

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।