আৰক্ষীয়ে মদ্যপান কৰিলেই হেৰুৱাব লাগিব চাকৰি, ঘোষণা এইখন ৰাজ্যৰ মুখ্যমন্ত্ৰীৰ

বিহাৰৰ মুখ্যমন্ত্ৰী নীতিশ কুমাৰে আৰক্ষীৰ লোকে মদ খালে দেখা মাত্ৰকে চাকৰিৰ পৰা বৰ্খাস্ত কৰিবলৈ নিৰ্দেশ জাৰি কৰিছে। কিন্তু বিৰোধী দলসমূহে মুখ্যমন্ত্ৰীৰ এনে নিৰ্দেশৰ তীব্ৰ বিৰোধিতা কৰিছে। এনে কাৰ্যৰে মুখ্যমন্ত্ৰীয়ে আৰক্ষীক বলিৰ পঠা সজোৱাৰ অভিযোগ তুলিছে বিৰোধী দল আৰজেডিয়ে। মঙলবাৰে আবকাৰী শুল্ক বিভাগৰ এখন বৈঠকত উপস্থিত থাকি মুখ্যমন্ত্ৰী গৰাকীয়ে কয় – আৰক্ষীসকলে প্ৰতিবছৰে সুৰাপান নকৰাৰ শপত লয়। গতিকে কোনো আৰক্ষীৰ লোকে মদ্যপান কৰিলে বা সুৰামত্ত অৱস্থাত পালে অনুশাসনমূলক ব্যৱস্থা গ্ৰহণ কৰা হওক আৰু তৎক্ষণাৎ চাকৰিৰ পৰা বৰ্খাস্ত কৰা হওক।

বিহাৰত আৰক্ষী বিভাগত ৮০০০০ লোক কৰ্মৰত আৰু ২০১৬ চনতে ৰাজ্যখনত সুৰা নিষিদ্ধ কৰা হৈছিল। উল্লেখযোগ্য যে এইবাৰ আৰক্ষী সঞ্চালকৰ পদবীৰ পৰা অৱসৰ লৈ নিৰ্বাচনত জয়লাভ কৰা সুনীল কুমাৰক আবকাৰী বিভাগৰ মন্ত্ৰিত্ব প্ৰদান কৰা হৈছে। মুখ্যমন্ত্ৰী গৰাকীয়ে আবকাৰী মন্ত্ৰীৰ উপস্থিতিত বিষয়াসকলক চুবুৰীয়া ৰাজ্যৰ পৰা সুৰাৰ সৰবৰাহ বন্ধ কৰিবলৈ পদক্ষেপ ল’বলৈও নির্দেশ প্ৰদান কৰিছে।

অৱশ্যে বিৰোধী দল ৰাষ্ট্ৰীয় জনতা দলে মুখ্যমন্ত্ৰীৰ এনে কাৰ্যৰ তীব্ৰ সমালোচনা কৰিছে। আৰজেডিৰ মুখপাত্ৰ মৃত্যুঞ্জয় তিৱাৰীয়ে কয় – কেৱল আৰক্ষীয়েই কিয়, আন বিভাগৰ চৰকাৰী বিষয়াৰ বিৰুদ্ধেও মদ্যপান কৰিলে অনুৰূপ ব্যৱস্থা গ্ৰহণ কৰক। এনে নিৰ্দেশৰে আৰক্ষীক বলিৰ পঠা সজোৱা হৈছে।

উল্লেখযোগ্য যে ২০১৬ চনত বিহাৰত মদ নিষিদ্ধ কৰা হৈছিল যদিও ৰাজ্যখনত অবৈধ মদৰ বেহা চলি আছে। দৈনিক আৰক্ষীয়ে অবৈধ সুৰা জব্দ কৰে। ২০১৬ চনৰ পৰা আজিলৈকে বিহাৰ আৰক্ষীয়ে ৫২ লাখ লিটাৰ সুৰা জব্দ কৰিছে।