পেঞ্চনাৰসকলে অনলাইনযোগে দাখিল কৰিব পাৰিব জীৱন প্ৰমাণ পত্ৰ; জানক কেনেকৈ লাভ কৰিব এই সুবিধা

কেন্দ্ৰীয় চৰকাৰৰ পেঞ্চনাৰসকলে পেঞ্চন লাভ কৰিবলৈ প্ৰতি বছৰে জীৱন প্ৰমাণ বা বাৰ্ষিক জীৱন প্ৰমাণ পত্ৰ পেঞ্চন বিতৰণ সংস্থা (পিডিএ)ত জমা দিব লাগে।

প্ৰমাণ পত্ৰখন গুৰুত্বপূৰ্ণ কাৰণ ই পেঞ্চনাৰজনৰ অস্তিত্বৰ প্ৰমাণ।

প্ৰতি বছৰে ১ নৱেম্বৰৰ পৰা জীৱন প্ৰমাণ পত্ৰ জমা দিব লাগে। কিন্তু কেন্দ্ৰীয় চৰকাৰে ৮০ বছৰ আৰু তাৰ ওপৰৰ জ্যেষ্ঠ পেঞ্চনাৰসকলক অতিৰিক্ত সময় প্ৰদান কৰিছিল, যিসকলক ১ অক্টোবৰৰ পৰা প্ৰমাণ পত্ৰ জমা দিয়াৰ সুবিধা দিয়া হৈছিল।

পেঞ্চনাৰসকলৰ বাবে জীৱন প্ৰমাণ পত্ৰ জমা দিয়াৰ প্ৰক্ৰিয়াটো সহজ কৰি তুলিবলৈ চৰকাৰে একাধিক বিকল্প প্ৰদান কৰিছে।

পেঞ্চনাৰ এজনে হয় বেংক, ডাকঘৰ, আৰু ৰাজ্যিক/কেন্দ্ৰীয় শাসিত অঞ্চল চৰকাৰী কাৰ্যালয়ৰ দৰে পেঞ্চন বিতৰণ সংস্থাসমূহলৈ শাৰীৰিকভাৱে গৈ প্ৰমাণপত্ৰখন জমা দিব পাৰে অথবা ডিজিটেলভাৱে জমা দিয়াৰ সুযোগ গ্ৰহণ কৰিব পাৰে।

যদি পেঞ্চনাৰজনে পিডিএৰ আগত শাৰীৰিকভাৱে হাজিৰ হ’ব নিবিচাৰে তেন্তে তেওঁলোকে নিৰ্ধাৰিত ফৰ্মেটত যিকোনো নিৰ্দিষ্ট বিষয়াৰ স্বাক্ষৰিত জীৱন প্ৰমাণ পত্ৰ দাখিল কৰিব পাৰে।

কেন্দ্ৰীয় পেঞ্চন একাউণ্টিং অফিচে (চিপিআইঅ’) জাৰি কৰা আঁচনিৰ পুস্তিকা অনুসৰি এনে পেঞ্চনাৰসকলক ব্যক্তিগত হাজিৰ হোৱাৰ পৰা ৰেহাই দিয়া হৈছে।

পেঞ্চনাৰসকলে জীৱন প্ৰমাণ পৰ্টেল ব্যৱহাৰ কৰি বাৰ্ষিক জীৱনৰ প্ৰমাণ পত্ৰ অনলাইনযোগে জমা দিব পাৰিব। এই পদ্ধতিত পেঞ্চনাৰসকলে জীৱন প্ৰমাণ এপ্লিকেচন ডাউনলোড কৰি ইউআইডিএআইৰ নিৰ্দেশিত ডিভাইচৰ জৰিয়তে ধৰা পৰা বায়’মেট্ৰিক প্ৰদান কৰিব লাগিব।

জীৱন প্ৰমাণ ডিজিটেল প্ৰমাণপত্ৰৰ বাবে এজন ব্যক্তিৰ বায়’মেট্ৰিক্স ৰেকৰ্ড কৰিবলৈ অনুমোদিত সকলো ডিভাইচৰ তালিকা ইউআইডিএআইয়ে প্ৰকাশ কৰে।

ইলেক্ট্ৰনিকছ আৰু তথ্য প্ৰযুক্তি মন্ত্ৰালয় (Meity) আৰু ডাক বিভাগৰ ইণ্ডিয়া পোষ্ট পেমেণ্টছ বেংকে ২০২০ চনত ডাকঘৰৰ জৰিয়তে ডিজিটেল লাইফ চাৰ্টিফিকেট পদূলিমুখতে জমা দিয়াৰ সেৱা আৰম্ভ কৰে।

পেঞ্চনাৰসকলে গুগল প্লেষ্ট’ৰৰ পৰা পোষ্টইনফ’ এপ্লিকেচন ডাউনলোড কৰি এই সুবিধা গ্ৰহণ কৰিব পাৰিব।

চৰকাৰে অনুমোদিত বাকী সংস্থাসমূহৰ জৰিয়তে জীৱন প্ৰমাণ পত্ৰ উৎপাদন আৰু সংগ্ৰহৰ বাবেও ঘৰতে বেংকিং সেৱা আগবঢ়ায়। ইয়াত ১২ টা ৰাজহুৱা খণ্ডৰ বেংক আছে যিয়ে ১০০ খন ডাঙৰ চহৰত সেৱা আগবঢ়ায়।

এজন পেঞ্চনাৰ ড’ৰষ্টেপ বেংকিং (ডি এছ বি) মোবাইল এপ্লিকেচন, ডি এছ বিৰ অফিচিয়েল ৱেবছাইট বা টোল ফ্ৰী নম্বৰ - ১৮০০১২১৩৭২১, ১৮০০১০৩৭১৮৮ ৰ জৰিয়তে এই সেৱা বুকিং কৰিব পাৰে।

জীৱন প্ৰমাণ পত্ৰ জমা দিয়াৰ আন এটা পদ্ধতি হ’ল ইউআইডিএআই আধাৰ চফটৱেৰৰ ওপৰত ভিত্তি কৰি মুখ প্ৰমাণীকৰণ প্ৰযুক্তি ব্যৱহাৰ কৰা।

ইয়াৰ জৰিয়তে পেঞ্চনাৰসকলে এণ্ড্ৰইড ডিভাইচৰ পৰা ডিজিটেল লাইফ চাৰ্টিফিকেট সৃষ্টি কৰিব পাৰে। পেঞ্চনাৰজনৰ এখন লাইভ ফটো স্মাৰ্টফোনৰ জৰিয়তে বন্দী কৰি তাৰ পিছত জীৱন প্ৰমাণ এপত আপলোড কৰি ডিজিটেল লাইফ চাৰ্টিফিকেট তৈয়াৰ কৰিব লাগিব।