শ্ৰাদ্ধ অনুষ্ঠানৰ আগদিনা ঘৰলৈ উভতিল কোৰোণাত ‘মৃত’ ৰোগী!

যোৱা ১১ নৱেম্বৰত কোৰোণাত আক্ৰান্ত এগৰাকী ৰোগীক চিকিত্‍সালয়ত ভৰ্তি কৰোৱা হৈছিল। লোকজনৰ নাম শিৱনাথ বেনাৰ্জী। ঘৰ পশ্চিম বংগত। তাৰ পিছত হাস্পতালৰ পৰা যোৱা ১৩ নৱেম্বৰত খবৰ দিয়া হ’ল যে, কোৰোণাত আক্ৰান্ত শিৱনাথৰ মৃত্যু হৈছে। মৃতদেহ ল’বলৈ পৰিয়ালৰ লোক আহিব লাগে। পিছত শ্মশানত অন্তিম সত্‍কাৰো কৰা হয়। কাইলৈ অৰ্থাত্‍ দেওবাৰে লোকজনৰ বাসগৃহত শ্ৰাদ্ধ অনুষ্ঠানৰ আয়োজন কৰা হৈছিল। পৰিয়ালৰ লোকে প্ৰস্তুতি প্ৰায় সম্পূৰ্ণ কৰি তুলিছিল।

হঠাত্‍ শুকুৰবাৰে পৰিয়াললৈ হাস্পতালৰ ফালৰ পৰা ফোন আহে, আপোনাৰ ৰোগী সুস্থ। আহক তেখেতক লৈ যাওক। সেই মৰ্মে শনিবাৰে এম্বুলেন্স যোগে শিৱনাথ বেনাৰ্জীক ঘৰলৈ লৈ অনা হ’ল।

এতিয়া প্ৰশ্ন উঠিছে হাস্পতাল কৰ্তৃপক্ষৰ বিৰুদ্ধে। কাৰ মৃতদেহ শিৱনাথ বেনাৰ্জীৰ পৰিয়ালৰ হাতত গটাই দিয়া হৈছিল? দেও‍বাৰে বেনাৰ্জীৰ শ্ৰাদ্ধ অনুষ্ঠান হোৱাৰ কথা আছিল। আত্মীয়-স্বজন আহি উপস্থিত হৈছিল শিৱনাথৰ ঘৰত। ঘৰত পেণ্ডেল দিয়া হৈছিল। আৰু তাৰ পিছতে শিৱনাথ পুনৰ ঘৰলৈ উভতি অহাত এতিয়া পৰিয়ালৰ মাজত আনন্দ উল্লাস।