Home Minister Amit Shah : কাইলৈ নাগালেণ্ডলৈ দুদিনীয়া ভ্ৰমণসূচীৰে গৃহমন্ত্ৰী অমিত শ্বাহ, ২৪ ফেব্ৰুৱাৰীত আহিব প্ৰধানমন্ত্ৰী নৰেন্দ্ৰ মোদীও

সাত দশক পুৰণি নগা সমস্যা সমাধান নহ'ব পাৰে ৷ কিন্তু নগা পাহাৰত এতিয়া পুনৰ চলিছে ব্যাপক হাৰত নিৰ্বাচনী প্ৰচাৰ ৷ ইয়াৰ মাজতে সোমবাৰে দুদিনীয়া ভ্ৰমণসূচীৰে নাগালেণ্ডত উপস্থিত হ'ব কেন্দ্ৰীয় গৃহমন্ত্ৰী অমিত শ্বাহ (Nagaland Election2023) ৷ ইয়াৰ বিপৰীতে AICCৰ সভাপতি মল্লিকাৰ্জুন খাৰ্গেও আহিব নিৰ্বাচনী প্ৰচাৰৰ বাবে ডিমাপুৰলৈ ৷ ২৪ ফেব্ৰুৱাৰীত NDPP আৰু BJPৰ হৈ প্ৰচাৰ চলাবলৈ প্ৰধানমন্ত্ৰী নৰেন্দ্ৰ মোদীয়ে (PM Narendra Modi) ৷

এতিয়া বেলেগ কোনো কথাই নচলে নগা পাহাৰত ৷ কেৱল চলিছে নিৰ্বাচনৰ কথা ৷ চলিছে প্ৰতিশ্ৰুতিৰ বন্যা ৷ চলিছে নিজ নিজ দল আৰু সমৰ্থিত প্ৰাৰ্থীৰ জয়-জয়কাৰ ধ্বনি ৷ জিন্দাবাদ ধ্বনি ৷ শাসকীয় NDPP আৰু BJPৰ নিৰ্বাচনী যোৰ এইবেলি বেছিকৈ চলা দেখা গৈছে ৷ এই উৎসাহত সাৰ পানী যোগাইছে কেন্দ্ৰীয় মন্ত্ৰী সৰ্বানন্দ সোণোৱাল (Union Minister Kiren Rijiju) আৰু কিৰেণ ৰিজিজুৱে ৷ ইয়াৰ মাজতে দুদিনীয়া ভ্ৰমণসূচী লৈ নগা পাহাৰলৈ আহিব কেন্দ্ৰীয় গৃহমন্ত্ৰী অমিত শ্বাহ ৷

খবৰ মতে কাইলৈ আবেলি ৩:২০ত ডিব্ৰুগড় উপস্থিত হ'ব অমিত শ্বাহ (Home Minister Amit Shah) ৷ ডিব্ৰুগড়ৰ পৰা উৰিব অমিত শ্বাহৰ হেলিকপ্টাৰ নাগালেণ্ডৰ মনলৈ ৷ মনৰ ৰাজহুৱা খেলপথাৰত জনসভাত ভাষণ দিব আবেলি ৪:১০ত ৷ মনৰ আছাম ৰাইফলছৰ অতিথিশালাত সন্ধিয়া ৫:২০ৰ পৰা ৭ বজালৈ দলীয় কৰ্মীৰ সৈতে মিলিত হ'ব আলোচনাত ৷ নিশাটো আছাম ৰাইফলছৰ অতিথিশালাতে কটাব কেন্দ্ৰীয় গৃহমন্ত্ৰী শ্বাহ ৷ পিছদিনা অৰ্থাৎ মঙলবাৰে পুৱা ১০ বজাত বহিব ENPO আৰু গীৰ্জাৰ নেতৃত্বৰে আলোচনাত ৷ ১১ বজাত কন্যাক নেতৃত্বৰ সৈতে বহিব আন এক আলোচনাত ৷

ইয়াৰ পিছতে কেন্দ্ৰীয় গৃহমন্ত্ৰী অমিত শ্বাহ ৰাওনা হ'ব টেয়েনছাঙলৈ ৷ টুয়েনছাঙত দুপৰীয়া ১২:১৫ত এক নিৰ্বাচনী সভাত অংশগ্ৰহণ কৰিব শ্বাহে ৷ তাৰ পিছত মুকছুঙলৈ উৰিব শ্বাহৰ হেলিকপ্টাৰ ৷ আবেলি ২ বজাত মুককছুঙত অংশগ্ৰহণ কৰিব আন এক নিৰ্বাচনী সভাত মুকছুঙৰ নিৰ্বাচনী প্ৰচাৰসভাত অংশগ্ৰহণ কৰি ডিমাপুৰ হৈ অমিত শ্বাহ ৰাওনা হ'ব মেঘালয়ৰ ৰাজধানী শ্বিলঙলৈ ৷

অমিত শ্বাহৰ এই দুদিনীয়া নগা পাহাৰ ভ্ৰমণসূচীৰ মাজতে কাইলৈ ডিমাপুৰলৈ আহিব AICCৰ সভাপতি মল্লিকাৰ্জুন খাৰ্গে ৷ কংগ্ৰেছ সভাপতি খাৰ্গেই কংগ্ৰেছ প্ৰাৰ্থীৰ হৈ ডিমাপুৰত এক নিৰ্বাচনী সভাত অংশগ্ৰহণ কৰাৰ কথা ৷

ইপিনে অহা ২৪ ফেব্ৰুৱাৰীত ডিমাপুৰলৈ আহিব প্ৰধানমন্ত্ৰী নৰেন্দ্ৰ মোদী ৷ প্ৰধানমন্ত্ৰী মোদীয়ে ডিমাপুৰৰ এগ্ৰি এস্কো ফিল্ডত NDPP আৰু BJPৰ এক যুটীয়া নিৰ্বাচনী সভাত অংশগ্ৰহণ কৰিব ৷

ইপিনে নিৰ্বাচনী প্ৰচাৰৰ মাজতে কেন্দ্ৰীয় আৰু ৰাজ্যিক বিভিন্ন চৰকাৰী সন্থাই নাগালেণ্ডত অব্যাহত ৰাখিছে অভিযান ৷ এই অভিযানত শনিবাৰ পৰ্যন্ত ৪৩ কোটি ৮০ লাখ টকাৰ সা-সামগ্ৰী জব্দ কৰিছে ৷

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।