ফুটবলৰ ফেন! কেৰালাৰ দম্পতীয়ে মেছি আৰু এমবাপেৰ জাৰ্ছী পৰিধানেৰে আৱদ্ধ হ'ল বিবাহপাশত

বিবাহ সকলোৰে জীৱনৰ এক বিশেষ দিন আৰু এই দিনটোক স্মৰণীয় কৰিবলৈ বহু দিশ অৱলম্বন কৰে দৰা–কনা দুয়োপক্ষই। আজিকালি বিবাহৰ বিভিন্ন থীম, ৰং, সাজ–সজ্জা আদি দিশৰ ওপৰত বিশেশ গুৰুত্ব দিয়া দেখিবলৈ পোৱা যায়। কিন্তু এইবাৰ কোনো থীম বা চিনেমা সদৃশ বিবাহ নহয় বৰঞ্চ দৰা আৰু কইনা দুয়োৱে ফুটবল খেলত নিজ নিজ প্ৰিয় খেলুৱৈৰ জাৰ্ছী পিন্ধি বিবাহপাশত আৱদ্ধ হৈছে। বহু ফুটবল অনুৰাগীক বিভিন্ন আজব কাণ্ড কৰা দেখিবলৈ পোৱা যায় কিন্তু নিজ বিবাহত ফুটবলপ্ৰেমী দম্পতীহালে লোৱা এই পদক্ষেপে বৰ্তমান সামাজিক মাধ্যমত বহু চৰ্চা লাভ কৰিছে।

দৰা আৰু কইনা দুয়ো ফুটবল অনুৰাগী আৰু তেওঁলোকে বিভিন্ন দলক সমৰ্থন কৰে। কইনা আথিৰাই ফৰাচী দলটোক সমৰ্থন কৰে আৰু তেওঁ বিয়াৰ কাপোৰজোৰৰ ওপৰত কেলিয়ান এমবাপেৰ জাৰ্ছী পিন্ধিছিল। আনহাতে, দৰা শচীন আৰ্জেণ্টিনাৰ এজন উৎসাহী অনুৰাগী আৰু তেওঁৰ বিয়াৰ শ্বেৰৱানীৰ ওপৰত লিঅ’নেল মেছিৰ জাৰ্ছী নম্বৰ ১০ পিন্ধিছিল।

দুয়োজনে তেওঁলোকৰ বিয়াৰ পোছাকযোৰৰ ওপৰত জাৰ্ছী পিন্ধিছিল। সংবাদ মাধ্যম বিবিচিয়ে তেওঁলোকৰ এখন ফটো ইনষ্টাগ্ৰামত শ্বেয়াৰ কৰিছিল। কাটাৰৰ লুচাইল ষ্টেডিয়ামত অনুষ্ঠিত কাটাৰ ফিফা বিশ্বকাপ, ২০২২ত দুয়োটা দলে তুমুল প্ৰতিদ্বন্দিতা কৰি ফিফা বিশ্বকাপৰ ইতিহাসৰ আটাইতকৈ আকৰ্ষণীয় খেলৰ কৃতিত্ব অনাৰ মাত্ৰ কেইঘণ্টামান আগতে ভাৰতৰ কোচি চহৰত এক বিবাহ অনুষ্ঠানত এহাল দম্পতি বিবাহ পাশত আৱদ্ধ হৈছিল বুলি জানিব পৰা গৈছে।

দম্পতীহালে সঠিক সময়ত চূড়ান্ত খেলখন উপভোগ কৰিবলৈ বিয়াৰ অভ্যৰ্থনা শেষ কৰিবলৈ লৰালৰি কৰিছিল আৰু শচীনৰ ঘৰত উপস্থিত হৈছিল, যি বিয়াৰ স্থানৰ পৰা প্ৰায় ১২৮ মাইল দূৰত আছিল।

ৰোমাঞ্চকৰ আৰ্জেণ্টিনা বনাম ফ্ৰান্স বিশ্বকাপ ২০২২ৰ ফাইনেলে বিগত দেওবাৰে সমগ্ৰ বিশ্বৰ ফুটবলৰ অনুৰাগীসকলক একত্ৰিত কৰিছিল। শচীনে সমৰ্থন কৰি থকা আৰ্জেণ্টিনাই পেনাল্টি শ্বুটআউটত খেলখন ৪-২ গ'লত জিকি ফ্ৰান্সৰ পৰা বিজয় কাঢ়ি লয় আৰু এইখেলখন স্মৰণীয় কৰি তোলে।

দিনটো যিমান স্মৰণীয় আছিল, শচীন আৰু আথিৰাই বিয়া কৰাই আৰু তেওঁলোকৰ ক্ৰীড়া প্ৰেমক এক বিশেষ ধৰণে উদযাপন কৰি ইয়াক আৰু অধিক স্মৰণীয় কৰি তুলিছিল।

ইণ্টাৰনেটত মানুহে দম্পতীহালৰ ধাৰণাটো ভাল পাইছে। এজন ব্যক্তিয়ে লিখিছিল, "এইটো কেৰালাত ঘটিছিল। মানুহবোৰ ইয়াত অতি উৎসাহী, আনকি মোৰ সম্পৰ্কীয় ভাতৃয়ে আৰ্জেণ্টিনাৰ এঞ্জো ফাৰ্ণাণ্ডেজক দেখাৰ পিছত তেওঁৰ ২ মাহৰ কেঁচুৱাটোৰ নাম 'এঞ্জো' ৰাখিছিল।"

আন এজন ব্যক্তিয়ে লিখে যে এইটো "কেৱল ভাৰতত" হয়। আন এজন ব্যক্তিয়ে লিখিছিল, "মেছিয়ে বিশ্বকাপ লাভ কৰিছিল আৰু এই ব্যক্তিজনে এক সুন্দৰ জীৱন লাভ কৰিছিল।"

অসমীয়াত ব্ৰেকিং নিউজ সৰ্বপ্ৰথম News18 অসমত। শেহতীয়া খবৰ, লাইভ নিউজ আপডেট, সবাতোকৈ বিশ্বাসযোগ্য অসমীয়া নিউজ ৱেবছাইট News18 অসম।