লোকসভা নিৰ্বাচনৰ পূৰ্বে বিত্ত মন্ত্ৰণালয়ে আৰম্ভ কৰিলে বাজেটৰ কাম

লোকসভা নিৰ্বাচনৰ ভোটগণনাৰ এদিন পূৰ্বে অৰ্থাৎ ২২ মে’ত বিত্ত মন্ত্ৰণালয়ে ২০১৯–২০ বৰ্ষৰ বাবে পূৰ্ণাংগ বাজেটৰ প্ৰস্তুতি আৰম্ভ কৰিছে। কেন্দ্ৰৰ মোদী চৰকাৰে ২০১৯ চনৰ ১ ফেব্ৰুৱাৰীত পৰম্পৰা অনুসৰি দাখিল কৰিছিল অন্তৰ্ৱৰ্তীকালীন বাজেট। বাজেট দাখিলৰ পূৰ্বে চৰকাৰৰ তৰফৰ পৰা কোৱা হৈছিল যে এই বাজেট পূৰ্ণাংগ বাজেটৰ দৰেই হ’ব।

বিত্ত মন্ত্ৰী অৰুণ জেটলীৰ অনুপস্থিতিত কেন্দ্ৰীয় মন্ত্ৰী পীয়ুষ গোৱেলৰ ওপৰত আছিল বিত্ত মন্ত্ৰণালয়ৰ দায়িত্ব। আৰু সেইবাবে গোৱেলেই দাখিল কৰিছিল বাজেট। আশা কৰা হৈছে যে নতুন চৰকাৰ হোৱাৰ পিছত ২০১৯ৰ জুলাইত পূৰ্ণাংগ বাজেট দাখিল কৰিব। সেয়েহে বিত্ত মন্ত্ৰণালয়ে উদ্যোগিক সংগঠনসমূহৰ সৈতে পূৰ্ণাংগ বাজেটক লৈ আলোচনা আৰম্ভ
কৰিছে। বিত্ত মন্ত্ৰণালয়ৰ বিষয়াই বুধবাৰে ছ’চাইটী অৱ ইণ্ডিয়া অটোম’বাইল মেনুফেকচাৰ্ছৰ প্ৰতিনিধিক সাক্ষাৎ কৰিছে।

বাজেট প্ৰস্তুতৰ প্ৰক্ৰিয়াৰ বাবে বিত্ত মন্ত্ৰণালয়ে পূৰ্বেও অন্য মন্ত্ৰণালয় আৰু চৰকাৰী বিভাগসমূহৰ সৈতে বৈঠকত বহিছে। সূত্ৰ অনুসৰি, ছ’চাইটী অৱ ইণ্ডিয়া অটোম’বাইল মেনুফেকচাৰ্ছৰ বিষয়াৰ আগত নিজৰ পৰামৰ্শ ৰাখিছে। লগতে অটোম’বাইল উদ্যোগক গতি প্ৰদানৰ বাবে উপায়ো আলোচনা কৰিছে।