৫০ ৰাউণ্ড পৰ্যন্ত গণনা! বিহাৰৰ চূড়ান্ত ফলাফল লাভ কৰিবলৈ নিশালৈকে অপেক্ষা কৰিব লাগিব, জনালে নিৰ্বাচন আয়োগে

আমেৰিকা যুক্তৰাষ্ট্ৰৰ ৰাষ্ট্ৰপতি নিৰ্বাচনৰ ভোট গণনাৰ চূড়ান্ত ফলাফল লাভ কৰিবলৈ চাৰি দিন অপেক্ষা কৰিবলগীয়া হৈছিল। সেইদৰে বিহাৰৰ চূড়ান্ত ফলাফল লাভ কৰিবলৈ মঙলবাৰে নিশালৈকে অপেক্ষা কৰিব লাগিব। এই কথা জনাইছে নিৰ্বাচন আয়োগৰ ফালৰ পৰা।

২০১৫ চনত বিহাৰত বুথৰ সংখ্যা আছিল ৬৫ হাজাৰৰ ওচৰা-ওচৰি। কোৰোণাৰ বাবে বুথত ভিৰ কম হ’বলৈ এই সংখ্যা ১ লাখ ৬ হাজাৰলৈ বৃদ্ধি কৰা হৈছিল। অৰ্থাত্‍ ১ লাখ ৬ হাজাৰ ইভিএমৰ গণনা কৰিব লাগিব এইবাৰ। বিহাৰৰ মুখ্য নিৰ্বাচন আয়ুক্ত এইচ এন শ্ৰীনিৱাসে জনাইছে যে, ‘সাধাৰণতে ২৫ৰ পৰা ২৬ ৰাউণ্ডৰ গণনা হয়। সেই ঠাইত এইবাৰ প্ৰতিটো বিধানসভা কেন্দ্ৰত ৫০ৰ পৰা ৫১ ৰাউণ্ড পৰ্যন্ত গণনা হোৱাৰ সম্ভাৱনা আছে। প্ৰতিটো কেন্দ্ৰত গড়ে ৩৫ ৰাউণ্ডত ভোট গণনা হ’ব পাৰে বুলি জনািছে নিৰ্বাচন আয়ুক্তই। সেয়েহে ভোটৰ চূড়ান্ত ফলাফল লাভ কৰিবলৈ নিশালৈ অপেক্ষা কৰিব লাগিব।’

ইফালে বিহাৰত ভোটগণনা এইপৰ্যন্ত যি হৈছে তাৰ পৰা ক’ব পৰা যায় যে বৃহত্তম শক্তিৰ দাবীদাৰ হোৱাৰ দিশত আগবাঢ়িছে বিজেপি। এনডিএ জোঁট তথা নীতিশৰ দল একপ্ৰকাৰ ম্লান। ইয়াৰ মাজতে যুঁজিছে আৰজেডিয়ে। সংখ্যাগৰিষ্ঠতা কোনে লাভ কৰিব সেয়া এতিয়াই সম্পূৰ্ণ স্পষ্ট নহয় যদিও একক দল হিচাপে বিজেপি আগে আগে গৈ আছে।

বিহাৰত মুঠ যুঁজ চলিছে ২৪৩খন আসনত। চৰকাৰ গঢ়াৰ মেজিক অংক ১২২। যিসকলে এইসংখ্যক আসন আগত দখল কৰিব পাৰিব বিহাৰৰ মচনদ তেওঁলোকেই দখল কৰিব পাৰিব। শেষ আপডেট অনুসৰি এনডিএ জোঁট ১২৪খন আসনত আগবাঢ়ি আছে। এইখিনি ৰাখি দিব পাৰিছে আসনত চতুৰ্থবাৰলৈ বহিব নীতিশ কুমাৰ। এই বাজীমাতত গুৰুত্বপূৰ্ণ ভূমিকা ল’ব বিজেপিয়ে।