আপুনি গাড়ী চলাওতে খিৰিকীৰ গ্লাছ খুলি থয় নেকি? ভয়ংকৰ বিপদ আহিব পাৰে আপোনাৰ জীৱনলৈ!

আপুনি গাড়ী চলাওতে খিৰিকীৰ গ্লাছ খুলি থয় নেকি? যদিহে আপোনাৰ গাড়ীৰ খিৰিকীৰ গ্লাছ খোলা ৰাখে তেন্তে সাৱধান হওক। কাৰণ শেহতীয়া গৱেষণাত প্ৰকাশ পাইছে যে খিৰিকীৰ গ্লাছ খুলি গাড়ী চলালে কোনো এজন লোক ৮০% বেছিকৈ বায়ু প্ৰদূষণৰ গ্ৰাসত পৰে। বিশ্বৰ তুলনামূলকভাৱে কম ধনী দেশসমূহত খিৰিকীৰ গ্লাছ খোলা ৰখা গাড়ীৰ ভিতৰত অত্যাধিক মাত্ৰাত পোৱা যায় বায়ু প্ৰদূষকসমূহ। কাৰণ বহু লোকে বতাহ চলাচলৰ বাবে গাড়ীৰ খিৰিকীৰ গ্লাছ খুলি থবলৈ ভাল পায়। বিশ্ব স্বাস্থ্য সংস্থাৰ তথ্য অনুসৰি বছৰি প্ৰায় ৭০ লাখ লোকৰ মৃত্যু হয় বায়ু প্ৰদূষণৰ ফলত। WHOৰ তথ্য অনুসৰি ১০জন লোকৰ ভিতৰত ৯ জনেই উশাহত অত্যধিক মাত্ৰাত প্ৰদূষিত বায়ু সেৱন কৰে।

বিজ্ঞানীসকলে বিশ্বৰ দহখন নগৰত নাগৰিকসকলে সেৱন কৰি অহা বায়ু প্ৰদূষকবোৰৰ ওপৰত বিস্তৃত গৱেষণা চলায়। বিশ্বৰ বিভিন্ন প্ৰান্তৰ এই নগৰসমূহৰ ভিতৰত আছে ঢাকা, চেন্নাই, গুৱাঞ্জহো, চাও পাওলো, কাইৰো, চুলেইমানিয়া আৰু আদিছ আবাবা।

বিজ্ঞানীৰ দলটোৱে গাড়ীসমূহৰ ভিতৰত নগৰৰ ব্যস্ততা পূৰ্ণ সময়ত  PM 2.5 আৰু PM10ৰ দৰে বায়ু প্ৰদূষকসমূহৰ মাত্ৰাৰ জোখ লয়। ইয়াৰ জৰিয়তে বায়ুমণ্ডলত থকা সুক্ষ্ম প্ৰদূষকসমূহৰ পৰিমাণৰ বিষয়েও জানিব পৰা যায়। গৱেষকৰ দলটোৱে এই নগৰসমূহত দিনটোৰ কম ভিৰ থকা সময়তো প্ৰদূষকসমূহৰ তথ্য সংগ্ৰহ কৰে। গৱেষকৰ দলটোৱে এই প্ৰদূষকসমূহৰ মাত্ৰাৰ ওপৰত গাড়ীৰ ভিতৰত ফেন চলালে বা খিৰিকীৰ গ্লাছ খুলি থলে কি প্ৰভাৱ পৰে সেয়া নিৰ্ণয় কৰাৰ চেষ্টা কৰে।

দলটোৰ অধ্যয়নত পোহৰলৈ আহে যে একাংশ দুখীয়া দেশত গাড়ীৰ ভিতৰত এজন লোক অধিক বায়ু প্ৰদূষণৰ বলি হ’ব লগা হয়। আৰু ইয়াৰ এক অন্যতম কাৰণ ৰূপে বিবেচিত হয় গাড়ীৰ খিৰিকীৰ গ্লাছ খুলি থোৱাটো। অধ্যয়নটোত পোৱা তথ্য অনুসৰি, নগৰসমূহত পুৱা আৰু সন্ধিয়াৰ ব্যস্ততাপূৰ্ণ সময়তকৈ কম ভিৰ থকা সময়ত এই প্ৰদূষণৰ মাত্ৰা ক্ৰমে ৯১% আৰু ৪০% কম হয়। গাড়ীৰ খিৰিকীৰ গ্লাছ খোলা ৰাখি নগৰত যাত্ৰা কৰিলে যাত্ৰাকালৰ বহু সময়ত বিপজ্জনক প্ৰদূষণৰ গ্ৰাসত পৰিব লগা হয় বুলি অধ্যয়নটোত প্ৰকাশ পাইছে।

আনহাতে, খিৰিকী বন্ধ কৰি গাড়ীৰ ভিতৰত Re-circulation system চলাই ৰাখিলে এনে প্ৰদূষণৰ পৰা ৮০% সকাহ লাভ কৰিব পাৰি বুলি গৱেষণাটোত প্ৰকাশ। গাড়ীৰ ভিতৰত থকা car cabin filter সমূহে এনে প্ৰদূষণ ৰোধ কৰাত ভাল কাম কৰে যদিও সুক্ষ্ম প্ৰদূষক কণিকাসমূহৰ ক্ষেত্ৰত কিন্তু ই বিশেষ কাৰ্যকৰী নহয়। সেয়েহে গাড়ীৰ ভিতৰত অধিক কাৰ্যক্ষম ফিল্টাৰ লগাবলৈ পৰামৰ্শ দিছে দলটোৱে। কিন্তু এই সমস্যাৰ পৰা হাত সাৰিবলৈ আটাইতকৈ ফলপ্ৰসূ উপায় ৰূপে বিবেচিত হৈছে গাড়ীৰ ব্যৱহাৰ হ্ৰাস কৰা আৰু অধিক হাৰত সেউজ গাড়ীৰ ব্যৱহাৰ কৰাটো।