ITBPৰ পশু চিকিৎসকৰ সফল অস্ত্ৰোপচাৰ, জীৱন দান দিলে ফেঁটী সাপৰ

আন্তঃ ৰাষ্ট্ৰীয় সীমান্তৰ অতন্দ্র প্ৰহৰীৰ দ্বাৰা পশুকুলক জীৱনদান কৰা এক দৃষ্টান্তমূলক ঘটনা পোহৰলৈ আহিছে । অতি সম্প্ৰতি চণ্ডীগড়ৰ সমীপৰ ভানুত Indo-Tibetan Border Force চমুকৈ ITBPয়ে এডাল আঘাতপ্ৰাপ্ত মৃত্যুমুখী ফেঁটী সাপৰ সফল অস্ত্ৰোপচাৰ কৰি জীৱন দান কৰিবলৈ সক্ষম হৈছে ।

নিৰাপত্তা সংস্থাটোৱে জনোৱা মতে, আজি কিছুদিনৰ আগতে পৃষ্ঠ ভাগ দীঘলীয়াকৈ কটাৰ ফলত বিষত ককবকাই থকা এডাল পোৱালি ফেঁটী উদ্ধাৰ কৰে ITBPৰ জোৱানে । তেওঁলোকে সাপ ডাল চণ্ডীগড়ৰ পৰা ২৬ কিলোমিটাৰ নিলগৰ ভানু নামৰ ঠাই ডোখৰত থকা ITBPৰ অধীনস্থ National Centre for Dogsলৈ আহে । ইয়াতে আৰম্ভ পশু চিকিৎসকৰ কুচকাৱাজ ।

ITBPৰ পশু চিকিৎসকে পোনতে সাপ ডালক anesthesia প্ৰদান কৰি অস্ত্ৰোপচাৰ আৰম্ভ কৰে । অতি অভিনৱ পদ্ধতিৰে সাপ ডালৰ কাটি যোৱা অংশ জোৰা লগোৱা হয় । তাৰ পাছত ১৫ দিন পর্যন্ত antibiotics প্ৰদান কৰি সাপ ডাল নিৰীক্ষণ কৰা হয় ।  ITBPয়ে জনোৱা মতে, সাপ ডাল সুস্থ হৈ উঠাৰ পিছত এতিয়া পুনৰ বনত এৰি দিয়া হৈছে ।

ITBPয়ে পূৰ্বতে বহু কেইটা বনৰীয়া স্তন্যপায়ী জন্তুক জীৱন দান কৰাৰ নজিৰ আছে । কিন্তু এটা সৰীসৃপ প্ৰাণীক জীৱন দান কৰাৰ ঘটনা এয়াই প্ৰথম বুলি জানিব পৰা গৈছে।