প্ৰদূষণ নিয়ন্ত্ৰণৰ নাই কোনো অন্য উপায়! সোমবাৰৰ পৰা এসপ্তাহৰ বাবে দিল্লীত লকডাউন, বন্ধ স্কুল-কলেজ, কাৰ্যালয়

দিল্লীত সোমবাৰৰ পৰা এক সপ্তাহৰ কাৰণে বন্ধ কৰি দিয়া হ’ল সকলো বিদ্যালয়। এসপ্তাহৰ কাৰণে বন্ধ থাকিব চৰকাৰী কাৰ্যালয়। স্কুল আৰু চৰকাৰী কাৰ্যালয় সমূহ ইণ্টাৰনেটৰ যোগেদি ঘৰৰ পৰাই পৰিচালনা কৰা হ’ব। নৱেম্বৰৰ ১৪ৰ পৰা ১৭ তাৰিখলৈ বন্ধ থাকিব সকলো নির্মাণ কাৰ্য। এইবাৰ দিল্লীত আংশিক লকডাউন কোৰোণা প্ৰতিৰোধ কৰিবলৈ ঘোষণা কৰা হোৱা নাই। বৰঞ্চ ভয়ংকৰ ৰূপ ধাৰণ কৰা বায়ু প্ৰদূষণ হ্ৰাস কৰিবলৈ এই পদক্ষেপ গ্ৰহণ কৰিছে দিল্লী চৰকাৰে।

শনিবাৰে মুখ্যমন্ত্ৰী অৰবিন্দ কেজৰিৱালে এখন জৰুৰীকালীন বৈঠকৰ অনুষ্ঠিত কৰি এইসমূহ সিদ্ধান্ত গ্ৰহণ কৰে। সংবাদ মাধ্যমত চৰকাৰী সিদ্ধান্ত সমূহৰ কথা ঘোষণা কৰি মুখ্যমন্ত্ৰীয়ে ব্যক্তিগত খণ্ডৰ কাৰ্যালয় সমূহকো ঘৰৰ পৰা কাম কৰাৰ পদ্ধতি অৱলম্বন কৰিবলৈ আহ্বান জনাইছে।

উল্লেখযোগ্য যে, শনিবাৰে উচ্চতম ন্যায়ালয়ে দিল্লীৰ বায়ু প্ৰদূষণৰ পৰা পৰিত্ৰাণ পোৱাৰ উপায় বিচাৰি দাখিল কৰা প্ৰতিবেদনৰ এক শুনানি গ্ৰহণ কৰিছিল। দেশৰ মুখ্য ন্যায়াধীশ এন ভি ৰমনাৰ নেতৃত্বত গঠন হোৱা তিনিজনীয়া বিচাৰপীঠখনে দিল্লী চৰকাৰক অতি কমেও ২ দিনৰ কাৰণে  লকডাউন বলবৎ কৰাৰ পৰামৰ্শ আগবঢ়াইছিল। দেশৰ মুখ্য ন্যায়াধীশগৰাকীয়ে দিল্লীত ঘৰৰ ভিতৰতো মাস্ক পিন্ধি থকাৰ উপক্ৰম হৈছে বুলি মন্তব্য কৰিছিল। বিচাৰপীঠৰ আন এগৰাকী ন্যায়াধীশ ডি ওৱাই চন্দ্ৰচূড়ে বিদ্যালয়সমূহ খুলি এনে ভয়ংকৰ প্ৰদূষণৰ মাজলৈ শিশু সকলক ঠেলি দিয়াৰ কাৰণে দিল্লী চৰকাৰক সমালোচনা কৰে ।

দীপাৱলীৰ সময়ত ফটকা নিষিদ্ধ কৰাৰ পিছতো দিল্লী আৰক্ষীয়ে এই নির্দেশ কাৰ্যকৰী  কৰিব নোৱাৰাত অসন্তুষ্টি প্ৰকাশ কৰে উচ্চতম ন্যায়ালয়ে।