দিল্লী আৰক্ষীৰ ভূমিকাক ভৰ্ৎসনা কৰা ন্যায়াধীশক নিশাটোৰ ভিতৰতে বদলি

উত্তৰ পূব দিল্লীৰ নৰসংহাৰ সম্বন্ধীয় গোচৰৰ শুনানি গ্ৰহণ কৰি থকা দিল্লী উচ্চ ন্যায়ালয়ৰ ন্যায়াধীশ এছ মুৰুলীধৰণক বুধবাৰে নিশা বদলি কৰা হৈছে। বুধবাৰে অৰ্থাৎ ২৬ ফেব্ৰুৱাৰীত ন্যায়াধীশগৰাকীয়ে দিল্লীৰ হিংসাৰে জড়িত তিনিটা গোচৰৰ শুনানি গ্ৰহণ কৰে আৰু নিশালৈ তেওঁক বদলি কৰা হয় পঞ্জাব আৰু হাৰিয়ানা উচ্চ ন্যায়ালয়লৈ।

দিনৰ ভাগৰ এটা শুনানিত ন্যায়াধীশগৰাকীয়ে দিল্লী আৰক্ষীয়ে বিজেপি নেতা কপিল মিশ্ৰৰ বিৰুদ্ধে FIR ৰুজু নকৰাৰ কাৰ্যক তুলাধূনা দিয়ে। বিজেপি নেতাগৰাকীয়ে প্রৰোচনামূলক ভাষণ দিয়াৰ পিছতো দিল্লী আৰক্ষীয়ে FIR ৰুজু কৰাৰ ক্ষেত্ৰত ললিতা কুমাৰী নিয়মাৱলী মানি চলা নাই বুলিও মন্তব্য কৰে ন্যায়াধীশগৰাকীয়ে।

ন্যায়াধীশ গৰাকীয়ে দিল্লী আৰক্ষীক আনকি বৃহস্পতিবাৰৰ ভিতৰত তেনে ব্যক্তিৰ বিৰূদ্ধে FIR ৰুজু কৰিব নে নকৰে তাৰো উত্তৰ দিবলৈ নির্দেশ দিছিল। কপিল মিশ্ৰৰ প্রৰোচনামূলক ভাষণৰ বিষয়ে অৱগত নহয় বুলি দিল্লী আৰক্ষীৰ অধিবক্তাই ন্যায়ালয়ক অৱগত কৰোতে, ন্যায়াধীশগৰাকীয়ে ভিডিঅ’ বজাই দেখুৱাইছিল।

২৬ ফেব্ৰুৱাৰীৰ নিশা ১ বজাত দিল্লীৰ হিংসা সম্বন্ধীয় আন এক গোচৰৰো শুনানি গ্ৰহণ কৰিছিল ন্যায়াধীশ মুৰুলীধৰণে। এই শুনানিত ন্যায়াধীশগৰাকীয়ে দিল্লী আৰক্ষীক ২০জন আঘাতপ্ৰাপ্ত লোকক শীঘ্ৰেই এখন হাস্পতালৰ পৰা আন এখন হাস্পতাললৈ স্থানান্তৰ কৰাৰ নিৰ্দেশ দিছিল। ইয়াতো দিল্লী আৰক্ষীয়ে জনহিতৰ কাম কৰিবলৈ আদালতৰ নিৰ্দেশৰ অপেক্ষা কৰাৰ প্ৰয়োজন নাই বুলি মন্তব্য কৰিছিল ন্যায়াধীশগৰাকীয়ে।

আন এটা শুনানিত তেওঁ  ভুক্তভোগীক তৎক্ষণাত আশ্ৰয় আৰু চিকিৎসা সেৱা প্ৰদান কৰিবলৈ কেন্দ্ৰ আৰু ৰাজ্যক নির্দেশ দিছিল। ন্যায়াধীশ মুৰুলীধৰণে ন্যায়াধীশ তলৱন্ত সিঙৰ সৈতে এখন খণ্ড বিচাৰপীঠত বহিছিল।

অৱশ্যে ১২ ফেব্ৰুৱাৰীতে ন্যায়াধীশ মুৰুলীধৰণৰ লগতে ন্যায়াধীশ ৰঞ্জিত মোৰেক বোম্বে উচ্চ ন্যায়ালয়ৰ পৰা মেঘালয় উচ্চ ন্যায়ালয়লৈ আৰু ন্যায়াধীশ আৰ কে মালিমাথক কৰ্ণাটকৰ পৰা উত্তৰাখণ্ডলৈ বদলিৰ অনুমোদন জনাইছিল উচ্চতম ন্যায়ালয়ৰ কলেজিয়ামে। কিন্তু কেন্দ্ৰীয় আইন মন্ত্ৰণালয়ৰ ন্যায়াধীশ মুৰুলীধৰণৰ বদলিৰ ৰাজপত্ৰিত জাননী জাৰি কৰাৰ সময়ক সকলোৱে সন্দেহৰ চকুৰে চাইছে।

উচ্চতম ন্যায়ালয়ৰ অধিবক্তা ৰুণা ভূঞাৰ মতে কেন্দ্ৰৰ এই জাননী উদ্দেশ্যপ্ৰণোদিত; পিছদিনা অর্থাৎ আজি পুনৰ শুনানি আছিল য’ত দিল্লী আৰক্ষীয়ে নিজৰ স্থিতি স্পষ্ট কৰাৰ কথা আছিল এটা অতি সংবেদনশীল বিষয়ত। কিন্তু তেওঁক নিশাটোৰ ভিতৰতে বদলি কৰা হ’ল; তাকে নকৰি কেন্দ্ৰীয় চৰকাৰে আৰু এটা–দুটা দিন ৰাখিব পাৰিলেহেঁতেন।