অহা ১৬ জানুৱাৰীৰ পৰা দেশজুৰি প্ৰদান কৰা হ’ব কোৰোণাৰ ভেকচিন, ঘোষণা স্বাস্থ্য মন্ত্ৰণালয়ৰ

অৱশেষত অপেক্ষাৰ অন্ত পৰিল। মাঘ বিহু, মকৰ সংক্ৰান্তী, লোহৰি আদি উত্‍সৱ হৈ যোৱাৰ হোৱাৰ পিছত অৰ্থাত্‍ অহা ১৬ জানুৱাৰীৰ পৰা দেশত আৰম্ভ হ’ব কোৰোণাৰ ভেকচিনেশ্যন প্ৰক্ৰিয়া। শনিবাৰে এই কথা জনালে কেন্দ্ৰীয় চৰকাৰে।

অগ্ৰাধিকাৰ দিয়া হ’ব স্বাস্থ্যকৰ্মীৰ লগতে কোৰোণাৰ বিৰুদ্ধে যুদ্ধত একেবাৰে সমুখত থকা যুদ্ধাসকলক। সেইদৰে  ৫০ উৰ্ধ্বৰ ব্যক্তিসকল বা বিভিন্ন ৰোগত আক্ৰান্ত লোকসকলেও  ভেকচিন লাভৰ ক্ষেত্ৰত পাব আগস্থান। এই আটাইখিনিকে সামৰি প্ৰথম পৰ্যায়ত প্ৰায় ৩ কোটি লোকে লাভ কৰিব কোৰোণাৰ ভেকচিন।

শনিবাৰে প্ৰধানমন্ত্ৰী নৰেন্দ্ৰ মোদীৰ অধ্যক্ষতাত অনুষ্ঠিত হোৱা বৈঠকৰ পিছতে এই সিদ্ধান্ত গ্ৰহণ কৰা হয়। বৈঠকত অংশগ্ৰহণ কৰিছিল ভাৰতৰ কেবিনেট সচিবৰ লগতে ৰাজ্যসমূহৰ মুৰব্বীসকলে। আৰু বৈঠকৰ পিছতে অহা ১৬ জানুৱাৰীৰ পৰা দেশত কোৰোণাৰ ভেকচিন প্ৰদানৰ কাম আৰম্ভ কৰাৰ সিদ্ধান্ত গ্ৰহণ কৰে।