CAAৰ বিধি নিৰ্ধাৰণ কৰিবলৈ ৯জুলাইৰ সময়সীমা বান্ধি দিলে সংসদীয় কমিটীয়ে

নাগৰিকত্ব সংশোধনী আইনৰ বিধি সমূহ প্ৰস্তুত কৰিবলৈ কেন্দ্ৰীয় গৃহ মন্ত্ৰণালয়ক ৯ জুলাইৰ সময়সীমা বান্ধি দিলে সংসদীয় কমিটীয়ে । Rajya Sabha Committee on Subordinate Legislationএ কেন্দ্ৰীয় গৃহ মন্ত্ৰণালয়ক এই কামৰ কাৰণে এই বছৰৰ ৯ জুলাইৰ সময়সীমা নিৰ্ধাৰণ কৰি দিছে । আনহাতে Lok Sabha Committee on Subordinate Legislationএ সেই একে কামৰ কাৰণে সময়সীমা বান্ধি দিছে ৯এপ্রিলৰ।  কেন্দ্ৰীয় গৃহ মন্ত্ৰণালয়ে নিৰ্দিষ্ট সময়ৰ ভিতৰত বিধি সমূহ প্ৰস্তুত কৰি কমিটী দুখনক জমা দিব লাগিব । কমিটীখনে বিধি সমূহ পৰীক্ষা কৰি অনুমোদন জনোৱাৰ পাছতহে কেন্দ্ৰীয় গৃহ মন্ত্ৰণালয়ে কাৰ্যকৰী কৰিব পাৰিব সেই সমূহ । আৰু তেতিয়াহে আইনখন সঁচা অৰ্থত প্ৰযোজ্য হ’ব ।

উল্লেখযোগ্য যে নাগৰিকত্ব সংশোধনী আইন ২০১৯ত ২০১৯চনৰ ১২ ডিচেম্বৰ তাৰিখে ৰাষ্ট্ৰপতিয়ে মোহৰ মাৰিছিল আৰু ২০২০চনৰ ১০জানুৱাৰীৰ পৰা আইনখন দেশত কাৰ্যকৰী হৈছিল । আইনখনৰ বিৰোধিতা কৰি অসমকে সমগ্ৰ দেশত তুমুল প্ৰতিবাদ সাব্যস্ত হৈছিল । এই আইনখনৰ যোগেদি ভাৰতৰ চুবুৰীয়া দেশ ক্ৰমে পাকিস্তান, বাংলাদেশ আৰু আফগানিস্তানৰ অনা-মুছলমান লোকে ভাৰততে ২০১৪চনৰ ৩১ ডিচেম্বৰ পূৰ্বে অবৈধ ভাৱে প্ৰৱেশ কৰিলেও নাগৰিকত্ব লাভ কৰিব পাৰিব । অৱশ্যে উত্তৰ পূৱৰ ষষ্ঠ অনুসূচী আৰু অন্তৰাজ্যিক পাৰপত্ৰৰে সুৰক্ষিত অঞ্চল সমূহত এই আইন প্ৰযোজ্য নহয় ।