জানুৱাৰীৰ পৰা হিন্দু বাংলাদেশীক নাগৰিকত্ব প্ৰদানৰ প্ৰক্ৰিয়া আৰম্ভ কৰিব কেন্দ্ৰই!

সম্ভৱত জানুৱাৰী মাহৰ পৰাই হিন্দু বাংলাদেশীক নাগৰিকত্ব প্ৰদানৰ প্ৰক্ৰিয়া আৰম্ভ কৰিব কেন্দ্ৰীয় চৰকাৰে। এই কথা জনালে বিজেপিৰ সাধাৰণ সম্পাদক কৈলাশ বিজয়বৰ্গীয়ই।

শনিবাৰে নতুন দিল্লীত সংবাদ মাধ্যমৰ আগত বিজয়বৰ্গীয়ই কয়, ‘‘নাগৰিকত্ব সংশোধনী বিধেয়ক সংসদত গৃহীত হৈছিল। পশ্চিম বংগৰ মুখ্যমন্ত্ৰী মমতা বেনাৰ্জীৰ লগতে বহুতে এই আইনখনৰ বিৰোধিতা কৰি উচ্চতম ন্যায়ালয়ৰ দ্বাৰস্থ হৈছিল। বিজেপি চৰকাৰে ২০২১ চনৰ জানুৱাৰীৰ পৰা হিন্দু বাংলাদেশী শৰণাৰ্থীক নাগৰিকত্ব প্ৰদানৰ সিদ্ধান্ত লৈছে।’’

এই আইনৰ জৰিয়তে বাংলাদেশ, পাকিস্তান আৰু আফগানিস্তানৰ পৰা ধৰ্মীয় প্ৰতাৰণাৰ বলি হৈ ভাৰতত আশ্ৰয় লোৱা লোকসকলক প্ৰদান কৰা হ’ব নাগৰিকত্ব। ক’লে কৈলাশ বিজয়বৰ্গীয়ই।

Most probably from January the process of granting citizenship to refugees under CAA will be started by BJP government: BJP General Secretary & West Bengal In-charge Kailash Vijayvargiya. (5.12) pic.twitter.com/KDHl96PLBi

— ANI (@ANI) December 6, 2020

অধিসূচনা জাৰি নকৰাৰ বাবে CAA এতিয়াও কাৰ্যকৰী হোৱা নাই। চৰকাৰে আইনখনৰ অধিনিয়ম প্ৰস্তাৱ কৰাৰ বাবে এইপৰ্যন্ত পাৰ্লিয়ামেণ্টেৰী ষ্টেণ্ডিং কমিটীক কোনো সংকেত দিয়া নাই। অধিনিয়ম দাখিলৰ অন্তিম তাৰিখ আছিল ৩ নৱেম্বৰ।

উল্লেখযোগ্য যে অসমতো এই আইনখনৰ বিৰুদ্ধে তীব্ৰ প্ৰতিবাদ হৈছিল। বিভিন্ন দল–সংগঠনে জাতিদ্ৰোহী আইনখনৰ বিৰুদ্ধে অসমৰ ৰাজপথ কঁপাই তুলিছিল। এই আইনবিৰোধী প্ৰতিবাদত শ্বহীদ হৈছিল অসমৰ ৫জনকৈ যুৱক।