দুমহলীয়া হ’ব ৰাম মন্দিৰ, ১০৬টা স্তম্ভৰ সৈতে থাকিব পাঁচটা প্ৰৱেশ দ্বাৰ

দশক দশকজোৰা পুৰণি ৰাম জন্মভূমি বিবাদক লৈ উচ্চতম ন্যায়ালয়ৰ ৰায়ৰ পিছতে এতিয়া ৰাম মন্দিৰ নিৰ্মাণক লৈ প্ৰস্তুতি আৰম্ভ হৈছে। উচ্চতম ন্যায়ালয়কৰ নিৰ্দেশৰ পিছত এফালে কেন্দ্ৰীয় চৰকাৰে ৰাম মন্দিৰৰ বাবে ট্ৰাষ্ট গঠনক লৈ ব্যস্ত আছে, আনহাতে ৰাম মন্দিৰ কেনে হ’ব তাক লৈ চলিছে চৰ্চা।

প্ৰায় ৩০ বছৰ পূৰ্বে ৰাম মন্দিৰৰ আৰ্হি দাখিল কৰা প্ৰখ্যাত মন্দিৰ স্থপতিবিদ চন্দ্ৰকান্ত ভাই সোমপুৰাৰ মতে এই মন্দিৰ বিশ্বৰ আটাইতকৈ সুন্দৰ মন্দিৰসমূহৰ ভিতৰত এটা হ’ব।

চন্দ্ৰকান্ত ভাই সোমপুৰাই তৈয়াৰ কৰা ৰাম মন্দিৰৰ আৰ্হি অযোধ্যাৰ কাৰ্যসেৱকপুৰমত ৰখা হৈছে। এই আৰ্হি মতেই নিৰ্মাণ কৰা হ’ব প্ৰস্তাৱিত ৰাম মন্দিৰ। চন্দ্ৰকান্ত ভাইৰ মতে অযোধ্যাত হ’বলগীয়া ৰাম মন্দিৰত ১০৬টা স্তম্ভযুক্ত দুমহলীয়া মন্দিৰ হ’ব। যাৰ গৰ্ভগৃহত প্ৰভূ ৰাম বিৰাজমান হ’ব। ওপৰ মহলাত থাকিব ৰাম দৰবাৰ। চন্দ্ৰকান্ত ভাইৰ মতে, ৰাম মন্দিৰ নিৰ্মাণৰ বাবে প্ৰয়োজন হ’ব প্ৰায় তিনি বছৰ সময়।