সময় ল'লে ৯ দিন, গুজৰাটৰ পৰা চাইকেল চলাই অৰুণাচলৰ ভাৰত-চীন সীমান্ত পালেগৈ সেনা বিষয়া

ভাৰতবৰ্ষৰ পশ্চিম প্ৰান্তৰ গুজৰাটৰ পৰা উত্তৰ-পূৰ্বাঞ্চলৰ পূব প্ৰান্তৰ অৰুণাচল প্ৰদেশৰ কিবিথুলৈ মুঠ ৩৮০০ কিমি পথ চাইকেল চলাই নিজৰ নাম গিনিজ ৱৰ্ল্ড ৰেকৰ্ডত সন্নিৱিষ্ট কৰিলে এজন সেনা বিষয়াই ৷

সেনা বিষয়া ভাৰত পান্নুৱে যোৱা ১৭ অক্টোবৰত গুজৰাটৰ কোটেশ্বৰৰ পৰা আৰম্ভ কৰা চাইকেল যাত্ৰা ২৬ অক্টোবৰ তাৰিখে অৰুণাচল প্ৰদেশৰ কিবিথুত অন্ত পৰে ৷  ৯ দিন ৭ ঘণ্টাত ৩৮০০ কিলোমিটাৰ পথ চাইকেল চলাই গিনিজ ৱৰ্ল্ড ৰেকৰ্ডত নিজৰ ৰাম সন্নিৱিষ্ট  কৰিলে বিষয়াজনে ৷

ইয়াৰ পূৰ্বেও সেনা বিষয়া ভাৰত পান্নুৰ নামত দুটা গিনিজ ৱৰ্ল্ড ৰেকৰ্ড আছে। দ্ৰুততম একক চাইকেল চালক হিচাপে লেহৰ পৰা মানালীলৈ, ৩৫ ঘণ্টা, ৩২ মিনিট আৰু ২২ ছেকেণ্ডত ৪৭২ কিলোমিটাৰ দূৰত্ব আৰু তেওঁৰ দ্বিতীয় অভিলেখ হৈছে ৫৯৪২ কিলোমিটাৰ দীঘল 'গোল্ডেন কোৱাড্ৰিলেটাৰেল' পথ, যি দিল্লী, মুম্বাই, চেন্নাই আৰু কলকাতাক সংযোগ কৰে।

এইবাৰ তেওঁ গুজৰাটৰ কোটেশ্বৰৰ পৰা অৰুণাচল প্ৰদেশৰ কিবিথুলৈ ৯ দিন ৭ ঘণ্টাত ৩৮০০ কিলোমিটাৰ পথ চাইকেল চলাই গিনিজ ৱৰ্ল্ড ৰেকৰ্ডৰ পুৰণি অভিলেখ ভংগ কৰিলে। ইয়াৰ পূৰ্বে নৰেশ কুমাৰ নামৰ চাইকেলিষ্টিত জনে ১১ দিন, ২১ ঘণ্টা, ৫৭ মিনিট আৰু ২ ছেকেণ্ড চাইকেল চলাই এই অভিলেখ অৰ্জন কৰিছিল।