ULFA-I, NDFB-S, KLO আদিক আশ্ৰয় দি জে’ললৈ যোৱা ৫ NSCN-K নেতা মুকলি হ'ল কেনেকৈ?

এঘাৰ মাহ৷ হয় এঘাৰ মাহ পূৰ্বে টাটমাদাউ খ্যাত ম্যানমাৰৰ সেনাই আটক কৰিছিল৷ এজন নহয়, প্ৰায় কুৰিজনক৷ তাৰ মাজত আছিল NSCN-Kৰ পাঁচ শীৰ্ষ নেতা৷ ইষ্টাৰ্ণ নাগালেণ্ড খ্যাত ম্যানমাৰৰ ছাগায়িং প্ৰদেশত সমান্তৰাল চৰকাৰ চলোৱা NSCN-Kৰ নেতাক ম্যানমাৰ সেনাই আটক কৰিব? বিষয়টো হজম নোহোৱা বিষয় আছিল৷ কিন্তু হজম নকৰি নোৱাৰি৷ আটক কৰিছিল৷ আটক কৰি ম্যানমাৰৰ খামতি আৰক্ষীক গতাই দিছিল৷

আৰক্ষীক গতাই দিয়াৰ পিছত জে’ল যাত্ৰা৷ জে’ললৈ যোৱাৰ পিছত ঘটিল বহু ঘটনা৷ সময়ৰ সোঁতত বহু ঘটনা প্ৰৱাহ৷ বহু দুৰ্যোগৰ মুখামুখি হ'ল আপোচহীন NSCN-K৷ শুকুৰবাৰ৷ ১৭ এপ্ৰিল, ২০২০৷ জে’লৰ পৰা মুকলি হ'ল তেওঁলোক৷ মানে NSCN-Kৰ শীৰ্ষ পাঁচ নেতা৷ যি সংগঠনৰ নীতি নিৰ্ধাৰণত বিশেষ ভূমিকা লৈ আহিছিল৷

খামতি জে’লৰ পৰা শুকুৰবাৰে আবেলি মুকলি আকাশৰ তললৈ আহে আটাইকেইজন৷ মুকলি হৈয়ে নিজ নিজ পৰিয়ালৰ কাষলৈ ৰাওনা হয়৷ আচলতে ম্যানমাৰৰ নতুন বছৰ 'তাজান পাৱে' উপলক্ষে দেশখনৰ ৰাষ্ট্ৰপতিয়ে এক বিশেষ ক্ষমাদান ঘোষণা কৰে৷ কাৰাৰুদ্ধ কয়দীৰ বাবে ঘোষণা কৰে এই ক্ষমাদান৷ ম্যানমাৰৰ ৰাষ্ট্ৰপতিৰ ক্ষমাদানৰ তালিকাত মুঠ ২৪,৮৯৬জন কয়দীৰ নাম আছিল৷ এই দীঘলীয়া তালিকাতেই নাম সন্নিৱিষ্ট হ'ল পাঁচ NSCN-Kৰ শীৰ্ষ নেতাৰ নাম৷

২০১৯ৰ ৯ মাৰ্চত খামতি নগৰৰ সমীপৰ পৰা ম্যানমাৰৰ সেনাই আটক কৰিছিল তেওঁলোকক৷ তেওঁলোক আছিল ক্ৰমে- NSCN-Kৰ গৃহমন্ত্ৰী ৱাং মাই, ধৰ্মীয় মন্ত্ৰী ছাৱ এন ছিং, বন মন্ত্ৰী ইউ আকান, কেন্দ্ৰীয় কাৰ্যনিৰ্বাহক সদস্য এছ ছাওথিং আৰু নগা আৰ্মীৰ লেফটেনেণ্ট কৰ্ণেল য়াং ছায়িং৷

ছয় মাৰ্চৰ পুৱা পৰা ২৬ মাৰ্চৰ আবেলিলৈ পাঁচোজন নেতাই আছিল টাটমাদাউ খ্যাত ম্যানমাৰ সেনাৰ কব্জাত৷ এই সময়ছোৱাত NSCN-Kক বহুকেইটা চৰ্ত দিছিল টাটমাদউয়ে৷ কিন্তু সাৰ্বভৌম স্বাধীন নাগালিমৰ দাবীত অলৰ-অচৰ সংগঠনৰ অধ্যক্ষ য়ুং আঙে কোনো কথাই মানি নল'লে৷ সেনাৰ চৰ্ত বা কোনো সন্ধিৰ বাবে আগ্ৰহ প্ৰকাশ নকৰিলে অধ্যক্ষ য়ুং আঙে৷

পাঁচ NSCN-K নেতাৰ বিৰুদ্ধে ম্যানমাৰৰ সেনা আৰু আৰক্ষীৰ অভিযোগ- ভাৰতীয় মূলৰ বিদ্ৰোহী সংগঠনক ম্যানমাৰৰ ভূখণ্ডত আশ্ৰয় দিয়া৷ অভিযোগ- চুবুৰীয়া ৰাষ্ট্ৰৰ বিদ্ৰোহী সংগঠনসমূক আশ্ৰয় দি সামৰিক প্ৰশিক্ষণ প্ৰদান কৰা৷ ম্যানমাৰৰ আইন মতে ছেকছন ১৭/১ৰ অধীনত গোচৰ ৰুজু হৈছিল পাঁচ NSCN-K নেতাৰ বিৰুদ্ধে৷