জম্মু–কাশ্মীৰত এটা পৰিয়ালক সন্ত্ৰাসবাদীৰ কবলৰ পৰা বচাবলৈ গৈ শ্বহীদ হ’ল ৫ জোৱান

জম্মু–কাশ্মীৰৰ কুপৱাড়া জিলাৰ হণ্ডৱাড়াত শনিবাৰে সন্ত্ৰাসবাদীৰ গুলীত শ্বহীদ হয় ৫জন জোৱান। এটা পৰিয়ালক সন্ত্ৰাসবাদীৰ কবলৰ পৰা উদ্ধাৰ কৰিবলৈ গৈ নিজৰ জীৱন দান দিলে জোৱানকেইজনে। শ্বহীদসকলৰ ভিতৰত আছে সেনাৰ কৰ্ণেল আশুতোষ, মেজৰ অনুজ, আৰক্ষী উপ–পৰিদৰ্শক ছাকিল কাজী, এজন লেঞ্চ নায়ক আৰু এজন ৰাইফলমেন। কৰ্ণেল আশুতোষে পূৰ্বে সন্ত্ৰাসবাদীৰ বিৰুদ্ধে কেইবাটাও অভিযানৰ নেতৃত্ব দিছিল। আনহাতে, এই সংঘৰ্ষত নিহত হয় দুটা সন্ত্ৰাসবাদী।

শুকুৰবাৰে সনাই উক্ত অঞ্চলৰ এটা ঘৰত সন্ত্ৰাসবাদীৰ দল এটাই আত্মগোপন কৰাৰ তথ্য লাভ কৰিছিল। তাৰ পিছতে সেনা–আৰক্ষীয়ে চলাইছিল অভিযান। অভিযান কালত সেনা আৰক্ষীৰ সৈতে তুমুল সংঘৰ্ষ হয় সন্ত্ৰাসবাদীৰ দলটোৰ।

দেশৰ প্ৰতিৰক্ষা মন্ত্ৰী ৰাজনাথ সিঙে টুইটাৰযোগে এই ঘটনাত শোক প্ৰকাশ কৰে। ৰাজনাথ সিঙে কয় যে সৈনিকে দেশৰ বাবে দিয়া এই বলিদান পাহৰিব পৰা নাযায়। মই সন্ত্ৰাসবাদী আক্ৰমণত শ্বহীদ হোৱাসকললৈ শ্ৰদ্ধাঞ্জলি জনাইছো। দিল্লীৰ পৰা তেওঁলোকৰ পৰিয়াললৈ সমবেদনা জ্ঞাপন কৰিছো। শ্বহীদৰ পৰিয়ালৰ সৈতে কান্ধত কান্ধ মিলাই থিয় হৈ থাকিব ভাৰত।