হিৰোৰ দৰেই বন্ধুক ছুইমিং পুলত ডুব যোৱাৰ পৰা ৰক্ষা কৰিলে এইটো কুকুৰে! চাওক ভাইৰেল ভিডিঅ’

সম্প্ৰতি ছচিয়েল মিডিয়াত ভাইৰেল হৈ পৰিছে জেছি নামৰ এটা পোহনীয়া কুকুৰ৷ হিৰোৰ দৰেই নিজৰ পোমেৰানিয়ান বন্ধুক ছুইমিং পুলত ডুব যোৱাৰ পৰা ৰক্ষা কৰি জেচি এতিয়া ভাইৰেল সকলোতে৷

দক্ষিণ আফ্ৰিকাত সংঘটিত হৈছে ঘটনা এয়া৷ জেছি নামৰ পোহনীয়া কুকুৰটোৱে দুঃসাহসিভাৱে মালিকৰ ছুইমিং পুলত পোমেৰানিয়ান বন্ধু চাকীক ডুব যোৱাৰ পৰা ৰক্ষা কৰাৰ ভিডিঅ’ই দৃষ্টি কাঢ়িছে সকলোৰে। মৰমলগা এই ভিডিঅ' চোৱাৰ পিছতেই আন এটা কুকুৰ তথা ১৫ বছৰীয়া পোমেৰানিয়ান চাকীক উদ্ধাৰৰ বাবে জেছিয়ে দেখুওৱা সাহসিকতা আৰু জ্ঞানৰ প্ৰশংসা কৰিছে ইণ্টাৰনেট ব্যৱহাৰকাৰীসকলে।

জোহান্সবাৰ্গৰ বায়ৰন থানাৰাইন আৰু মেলিছা থানাৰাইন নামৰ এক দম্পতীৰএটা ব্যক্তিগত পুলত সংঘটিত হোৱা এই ঘটনা CCTVত আৱদ্ধ হৈ পৰিছিল৷ যি ভিডিঅ’ পিছত ফেচবুকত শ্বেয়াৰ কৰা হৈছিল, য'ত জেছিয়ে বহু সময় ধৰি চেষ্টা চলাই চাকীক পানীৰ পৰা টানি আনিবলৈ সক্ষম হৈছিল।

ভিডিঅ'টোত দেখাবলৈ পোৱা গৈছিল যে চাকী পুলটোৰ কাষত থিয় হৈ থকাৰ কিছু মুহূৰ্তৰ পিছতে পিছলি পৰিছিল। চাকীয়ে পুলটোৰ পৰ উঠি আহিবলৈ পাৰ্যমানে চেষ্টা চলাই ব্যৰ্থ হৈছিল৷ তেনেতে চাকীক উদ্ধাৰ কৰিবলৈ আহিছিল জেছি। প্ৰথমে, জছি অলপ সতৰ্ক আছিল কিয়নো পানীৰ প্ৰতি ভয় আছিল। কিন্তু, নিজৰ সকলো ভয় একাষৰীয়া কৰি শেষত চাকীক দাঁতেৰে পুখুৰীৰ পৰা ওপৰলৈ লৈ আনিছিল।

ইফালে, খবৰ অনুসৰি এই ঘটনা সংঘটিত হোৱাৰ সময়ত দম্পতীহাল ঘৰত নাছিল। CCTV কেমেৰা পৰীক্ষা কৰাৰ পিছতে জানিব পাৰিছিল সকলো আৰু সেই ভিডিঅ'টো তেওঁলোকে ফেচবুকত পোষ্ট কৰাৰ পিছতেই ভাইৰেল হৈ পৰিছিল। জেছিৰ বুদ্ধিমত্তাৰ প্ৰশংসা কৰিছিল সকলোৱে।

সৌভাগ্যক্ৰমে চাকীৰ একো ন’হল, সেহেয়ে এনে ধৰণৰ দুৰ্ঘটনাৰ পৰা পোহনীয়া কুকুৰক বচাই ৰাখিবলৈ দম্পতীহালে ভৱিষ্যতে পুলটো ঢাকি ৰখাৰ পৰিকল্পনা কৰিছে। তেওঁলোকে কৈছিল যে পুল কভাৰ এটা স্থাপন কৰা হ'ব, যাতে এনে ধৰণৰ ঘটনা পুনৰ সংঘটি নহয়।