দেশত আজিৰে পৰা বন্ধ হ’ব নেকি ফেচবুক, টুইটাৰ আদি ছচিয়েল মিডিয়া এপ?

ভাৰতত আজিৰে পৰা ফেচবুক, টুইটাৰকে ধৰি ভিন্ন সামাজিক মাধ্যম নিষিদ্ধ হোৱাৰ খবৰ বিয়পি পৰিছে সকলোতে। ছচিয়েল মিডিয়া কোম্পানীবোৰে নতুন মধ্যস্থতাকাৰী নিৰ্দেশনা পালন কৰাত বিফল হ'লেই ভাৰতত নিষেধাজ্ঞাৰ সন্মুখীন হ'ব বুলি কৈ থকা হৈছে।

দৰাচলতে দেশৰ তথ্য প্ৰযুক্তি মন্ত্ৰণালয়ে এই ছচিয়েল মিডিয়া কোম্পানীবোৰক ২৫ মে'ৰ ভিতৰত চৰকাৰৰ নতুন নিৰ্দেশনা পালন কৰিবলৈ তিনি মাহৰ সময়সীমা বান্ধি দিছিল, কিন্তু এতিয়ালৈকে স্ব-দেশী এপ Kooক বাদ দি আন ছচিয়েল মিডিয়া কোম্পানীবোৰে এই নিৰ্দেশনা মানি লোৱা পৰিলক্ষিত হোৱা নাই।

২৬ মে' অৰ্থাৎ আজিৰে পৰা এই নিয়মবোৰ কাৰ্যকৰী হ'ব যদিও ফেচবুক টুইটাৰকে আদি কৰি আন কোম্পানীবোৰে নতুন নিয়ম কাৰ্যকৰীকৰণৰ বাবে অতিৰিক্ত ৬মাহৰ সময় বিচাৰিছে কেন্দ্ৰৰ পৰা।

এতিয়া প্ৰশ্ন হয়, এই নতুন নিয়ম পালন কৰাত ব্যৰ্থ হ'লে সঁচাকৈয়ে দেশত নিষিদ্ধ কৰা হ'ব নেকি ফেচবুক, টুইটাৰ?

যদিহে এই ছচিয়েল মিডিয়া প্লেটফৰ্মবোৰৰ কোনোৱে চৰকাৰৰ নতুন নিৰ্দেশনাবোৰ পালন নকৰে তেন্তে আইন অনুসৰি তেওঁলোকৰ বিৰুদ্ধে ব্যৱস্থা ল'ব পাৰে চৰকাৰে। অৱশ্যে, ইয়াৰ অৰ্থ এইটো নহয় যে ভাৰতৰ ব্যৱহাৰকাৰীসকলে এই ছচিয়েল মিডিয়া প্লেটফৰ্মসমূহত প্ৰৱেশ কৰিব নোৱাৰিব।

ডিজিটেল অধিকাৰ কৰ্মী আৰু মিডিয়ানামাৰ প্ৰতিষ্ঠাপক নিখিল পাহৱাই এই সম্পৰ্কত কয় এনেদৰে - এইটো সম্ভৱ নহয় যে চৰকাৰে সকলো নীতি–নিয়ম বলবৎ কৰিব আৰু সামাজিক মাধ্যমৰ প্লেটফৰ্মসমূহক জবাবদিহি কৰিব। কিয়নো প্লেটফৰ্মবোৰেও নিৰ্দেশনাসমূহক প্ৰত্যাহ্বান জনোৱাৰ বাবে আদালতলৈ যাব পাৰে।

তেওঁ কয়, "চৰকাৰে ফেচবুক আৰু টুইটাৰক আদালতলৈ যোৱাৰ কাৰণ দিব নিবিচাৰে, কিয়নো এই নিয়মবোৰ "অসাংবিধানিক", আৰু কেন্দ্ৰই আদালতত লাজ পোৱাৰ আশংকা কৰিব নিবিচাৰে।" তেওঁ লগতে কয়, " এই নিয়মবোৰক ইতিমধ্যেই এনেদৰে প্ৰত্যাহ্বান জনোৱা হৈছে।"

ইয়াৰ উপৰিও, এই নিৰ্দেশনাবোৰ কেনেদৰে কাৰ্যকৰী কৰা হৈছে সেয়া বুজাবলৈ ভিন্ন প্ৰশ্নাৱলী জাৰি কৰিব বুলি আশা কৰা হৈছিল। কিন্তু সেইবোৰ এতিয়ালৈকে মুকলি কৰা হোৱা নাই আৰু মন্ত্ৰণালয়ে সকলো তথ্য জানিবলৈ সময়সীমা বৃদ্ধি কৰাৰো সম্ভাৱনা আছে।

পাহৱাই লগতে কয়, "আমেৰিকা যুক্তৰাষ্ট্ৰৰ চৰকাৰৰ প্ৰভাৱৰ বাবে দেশখনৰ প্লেটফৰ্মসমূহ ভাৰতত নিষিদ্ধ কৰাৰ শূন্য সম্ভাৱনা আছে।"

কেন্দ্ৰই সকলো ছচিয়েল মিডিয়া প্লেটফৰ্মৰ বাবে বান্ধি দিয়া নতুন নিৰ্দেশনাবোৰত কি আছে?

চলিত বৰ্ষৰ ২৫ ফেব্ৰুৱাৰীতে কেন্দ্ৰীয় চৰকাৰে ছচিয়েল মিডিয়া প্লেটফৰ্মবোৰৰ বাবে কঠোৰ নিয়মাৱলী ঘোষণা কৰিছিল। য'ত তেওঁলোকে ৩৬ ঘণ্টাৰ ভিতৰত কৰ্তৃপক্ষৰ দ্বাৰা ফ্লেগ কৰা যিকোনো সমল আঁতৰাব লাগিব আৰু দেশত থকা এজন বিষয়াৰ সৈতে এক শক্তিশালী অভিযোগ নিষ্পত্তি কৰা কোষ স্থাপন কৰিব লাগিব।

চৰকাৰে ৫০ লাখ পঞ্জীভুক্ত ব্যৱহাৰকাৰীক ''গুৰুত্বপূৰ্ণ ছচিয়েল মিডিয়া মধ্যস্থতাকাৰী''ৰ সীমা হিচাপে নিৰ্ধাৰণ কৰিছিল, অৰ্থাৎ টুইটাৰ, ফেচবুক আৰু গুগলৰ দৰে ডাঙৰ প্লেটফৰ্মবোৰে অতিৰিক্ত নিয়ম পালন কৰিব লাগিব।

ফেব্ৰুৱাৰীত নিৰ্দেশনাবোৰ ঘোষণা কৰি চৰকাৰে কৈছিল যে নতুন নিয়মবোৰ তৎক্ষণাত কাৰ্যকৰী হ'ব, আনহাতে গুৰুত্বপূৰ্ণ ছচিয়েল মিডিয়া প্ৰদানকাৰীসকলে এই নিয়ম পালনৰ বাবে তিনিমাহৰ সময় লাভ কৰিব। অৰ্থাৎ তিনি মাহৰ সময়সীমাৰ অৰ্থ হৈছে ২৫ মে'ৰ ভিতৰত নিয়মসমূহ পালন কৰা।

গুৰুত্বপূৰ্ণ ছচিয়েল মিডিয়া কোম্পানীবোৰে লাভ কৰা অভিযোগ আৰু পদক্ষেপৰ বিৱৰণ প্ৰকাশ কৰি এখন মাহিলী অনুপালনৰ প্ৰতিবেদন প্ৰকাশ কৰিব লাগিব, লগতে সক্ৰিয়ভাৱে আঁতৰ কৰা সমলৰ বিৱৰণো প্ৰকাশ কৰিব লাগিব। তেওঁলোকৰ ৱেবছাইট বা ম'বাইল এপ বা দুয়োটাতে ভাৰতৰ এক ঠিকনা প্ৰদান কৰিব লাগিব।

ফেচবুক, হোৱাটছএপ, টুইটাৰ আৰু ইনষ্টাগ্ৰামৰ দৰে ছচিয়েল মিডিয়া প্লেটফৰ্ম প্ৰস্তুত কৰিবলৈ নতুন নিয়মবোৰ প্ৰৱৰ্তন কৰা হৈছিল, যিবোৰৰ ব্যৱহাৰ ভাৰতত বিগত কেইবছৰমানত অভূতপূৰ্ব হাৰত বৃদ্ধি পাইছে। তেওঁলোকে প্লেটফৰ্মত আয়োজিত কৰা ভিন্ন সমলৰ বাবে অধিক জবাবদিহি আৰু দায়বদ্ধ।

ইপিনে ছচিয়েল মিডিয়া কোম্পানীবোৰে অভিযোগ লাভৰ ২৪ ঘণ্টাৰ ভিতৰতে যিকোনো অশ্লীল ফটো দেখুওৱা পোষ্টবোৰ তললৈ নিব লাগিব বুলি নিয়ম বান্ধি দিয়া হৈছিল।

নিয়মবোৰত লগতে কোৱা হৈছে যে যিসকল ব্যৱহাৰকাৰীয়ে স্ব-চ্ছাই তেওঁলোকৰ একাউণ্টবোৰ প্ৰমাণিত কৰিব বিচাৰে, তেওঁলোকক এনে কৰিবলৈ এক উপযুক্ত প্ৰণালী প্ৰদান কৰিব লাগে আৰু প্ৰমাণীকৰণৰ দৃশ্যমান চিহ্ন প্ৰদান কৰিব লাগে।

লগতে যেতিয়া এগৰাক সামাজিক মাধ্যম মধ্যস্থতাকাৰীয়ে নিজে সমলবোৰ আঁতৰ কৰিব তেতিয়া ব্যৱহাৰকাৰীসকলক আগতীয়াকৈ এই সম্পৰ্কে অৱগত কৰাৰ লগতে ব্যাখ্যা প্ৰদান কৰিব লাগিব।

চৰকাৰে বান্ধি দিয়া এই নিয়মবোৰক লৈ মত প্ৰকাশ কৰি গুগলৰ মুখপাত্ৰই কয় এনেদৰে, "আমি ভাৰতৰ আইনী প্ৰক্ৰিয়াক সন্মান কৰো আৰু সমলবোৰে স্থানীয় আইন বা আমাৰ সামগ্ৰী নীতি উলংঘা কৰিলে তেনে সমল আঁতৰাবলৈ চৰকাৰী অনুৰোধৰ প্ৰতি সঁহাৰি দিয়াৰ এক দীঘলীয়া ইতিহাস আছে। মধ্যস্থতাকাৰী নিৰ্দেশনা ৰূপায়ণৰ প্ৰতি আমি সঁহাৰি জনাওঁ।"