মই জানিছিলোৱে মোক দলৰ পৰা বাহিৰ কৰা হ’ব – আন্তঃৰাষ্ট্ৰীয় ক্ৰিকেটৰ পৰা অৱসৰক লৈ মুখ খুলিলে যুৱৰাজে

টীম ইণ্ডিয়াৰ প্ৰাক্তন ক্ৰিকেটাৰ যুৱৰাজ সিঙে নিজৰ অৱসৰক লৈ ক্ষোভ প্ৰকাশ কৰিছে BCCIৰ ওপৰত। ভাৰতীয় ক্ৰিকেট দলৰ মেনেজমেণ্টৰ ব্যৱহাৰক লৈও প্ৰশ্ন উত্থাপন কৰে যুৱৰাজ সিঙে। যুৱৰাজে কয় – মোৰ এনেকুৱা লাগিছিল যেন টীম মেনেজমেণ্টে মোক দলৰ পৰা বাহিৰ কৰাৰ
সুযোগ বিচাৰি আছিল।

২০১৯ৰ বিশ্বকাপ খেলিব বিচাৰিছিল যুৱৰাজ সিঙে। ‘আজ টক’ক দিয়া এক সাক্ষাৎকাৰত যুৱৰাজে দুখ প্ৰকাশ কৰি কয় যে বিচিচিআয়ে বীৰেন্দ্ৰ ছেহৱাগ, জাহিৰ খানৰ দৰে জ্যেষ্ঠ ক্ৰিকেটাৰৰ সৈতে তেওঁৰ কেৰিয়াৰৰ শেষ দিনটোতো কথা নাপাতিলে। যুৱৰাজ সিঙে ভাৰতীয় দলৰ হৈ ২০১৭ চনত ইংলেণ্ডৰ বিৰুদ্ধে অন্তিমখন টি–২০ খেলিছিল, যিখন খেলত ৭৫ ৰানত জয়ী হৈছিল ভাৰত।

অৱসৰক লৈ যুৱৰাজে কয় – মই চেম্পিয়ন ট্ৰফী ২০১৭ৰ পিছত খেলা ৮–৯খন খেলৰ ভিতৰত দুখনত মেন অব দ্য মেচ নিৰ্বাচিত হৈছো আৰু মই কেতিয়াও ভৱা নাছিলো যে মোক দলৰ পৰা বাহিৰ কৰি দিয়া হ’ব। মই আঘাতপ্ৰাপ্ত হৈছিলো আৰু মোক শ্ৰীলংকাৰ পৰা ছিৰিজৰ প্ৰস্তুতিৰ বাবে কোৱা হৈছিল। কিন্তু হঠাৎ য়’ য়’ টেষ্ট আৰম্ভ কৰি দিয়া হ’ল। এয়া মোৰ নিৰ্বাচনত ইউ টাৰ্ণ আছিল। হঠাৎ মই উভতি গৈ ৩৬ বছৰ বয়সত য়’ য়’ টেষ্টৰ প্ৰস্তুতি চলাবলগীয়া হয়। য়’ য়’ টেষ্টত উত্তীৰ্ণ হোৱাৰ পিছতো মোক ঘৰুৱা ক্ৰিকেট খেলিবলৈ কোৱা হৈছিল।

যুৱৰাজে কয় – তেওঁলোকে ভৱা নাছিল যে মই এই বয়সত টেষ্টত উত্তীৰ্ণ হ’ম। আৰু এনে অৱস্থাত মোক বাধা দিয়াটো সহজ হ’ব। মই ভাবো যিয়ে ১৫–১৭ বছৰলৈ আন্তঃৰাষ্ট্ৰীয় ক্ৰিকেট খেলিছে তেওঁৰ সৈতে বহা আৰু আলোচনা নকৰাটো দুৰ্ভাগ্যজনক। কোনোৱে মোৰ সৈতে বা বীৰেন্দ্ৰ ছেহৱাগ বা জাহিৰ খানৰ সৈতে কথা নাপাতিলে।

২০১১ৰ বিশ্বকাপত মেন অব দ্য টুৰ্ণামেণ্ট নিৰ্বাচিত হোৱা যুৱৰাজে কয় যে মই ২০১৯ৰ বিশ্বকাপ খেলিব বিচাৰিছিলো। ২০১৫তো যেতিয়া দলত স্থান পোৱা নাছিলো তেতিয়া নিৰাশ হৈছিলো। সেই সময়ত ৰঞ্জী ট্ৰফীত ভাল প্ৰদৰ্শন কৰিছিলো। অৱশ্যে সঠিক সময়ত অৱসৰ লোৱাৰ সিদ্ধান্তক লৈ সন্তুষ্টি প্ৰকাশ কৰে যুৱৰাজে।